1 Imsar di ssebt aqa Yeccu icuqq deg iyyaren n imendi. Tuɣa imeḥḍaren nnes ttekksen tidrin, ttḥekkan tent s ifassen nsen, ttᵉtten tent. ^■   2 Ca n Ifarisiyyen nnan asen: “Mayemmi tᵉtteggem min war iḥeǧřen ad ittwagg di ssebt?” ^■   3 Yarra-dd Yeccu, inna asen: “Ma war teɣrim uřa d min igga Dawud umi iǧuẓ netta d yenni tuɣa iǧan akides? 4 Mammec yudef ɣar taddart n AREBBI, iksi aɣrum n wescan i iǧan x ṭṭabřa n SIDI i war iḥeǧřen macca nnes mɣir i ikehhanen waha, uca icca zzayes u iwca ɛawed i yenni tuɣa iǧan akides?” 5 Xenni inna asen: “Aqa Mmis n bnadem d Bab n ssebt.” ^■  

6 Imsar ɛawed di ssebt nneɣni, yudef ɣar temzida, ibda issɣara. Tuɣa din ijj n bnadem wenni umi afus nnes iqucceḥ. ^■   7 Ḥḍan t imseřmaden n idlisen d Ifarisiyyen, ma ad issgenfa di ssebt, ḥima ad xas afen ca n ttuhmet. 8 Maca Netta yargeb x ixarriṣen nsen uca inna i bnadem wenni umi iqucceḥ ufus nnes: “Kkar, bedd di řwest n temzida.” Umi ikkar u tuɣa ibedd din, 9 inna asen Yeccu: “Ad kenniw sseqsiɣ x min iḥeǧeř ad ittwagg deg wass n ssebt: Ma iɛeddeř i bnadem maḥend ad igg řxar niɣ řɣar, ad issenjem tudart niɣ ad tt yareddeǧ?”

10 Tuɣa ixezzar ɣar marra inni d as dd-innḍen, inna as i bnadem nni: “Swiẓẓeḍ afus nnek!” Isswiẓẓeḍ netta afus nnes uca idweř ufus nnes iṣeḥḥ am wenneɣni. ^■  

11 Maca nitni dewřen ccuren s zzɛaf uca ssiwřen jar asen x min ɣa ggen i Yeccu.

12 Imsar deg wussan nni, aqa iffeɣ Yeccu ɣar ijj n wedrar ḥima ad iẓẓaǧ uca isseɛdu din ǧiřet ittẓaǧa i AREBBI.

13 Umi tuɣa d aziř, iřaɣa-dd i imeḥḍaren nnes, uca ixḍar zzaysen tenɛac, isemma ten rrusul. ^□  ■  

14 Cimɛun, wenni ittkennan Buṭrus, d Andrawus umas d Yaɛqub d Yuḥanna, d Filippus d Bar-Tulumawus

15 d Matta d Tuma d Yaɛqub mmis n Ḥalfa d Cimɛun wenni umi ttkennan ‘Amɛessab’,

16 Yahuda umas n Yaɛqub, d Yahuda Isxariyuṭi wenni iǧan d aɣeddar.

17 Ihwa-dd Yeccu akidsen uca ibedd deg wemcan n řewḍa. Tuɣa akides ijj n ubarru n imeḥḍaren nnes d ijj n ubarru n iwdan zi marra Yahudiyya d Urcalim u zi tma n řebḥar ɣar Ṣur d Ṣaydun. ^■  

18 Nitni usin-dd ḥima ad as sřen u ad ttwasgenfan zi řehřac nsen, akidsen uřa d inni ittwaɣezzan zi řaryaḥ imengas, uca ttwasgenfan.

19 Marra řɣaci tuɣa ittexs ad t iḥada minzi tuɣa itteffeɣ-dd zzayes jjehd nni issgenfan kuřci. ^■  

20 Issgeɛɛed tiṭṭawin nnes ɣar imeḥḍaren nnes, inna:

“Sseɛd nwem, kenniw, a imezřaḍ minzi Tageldit n AREBBI i kenniw. ^■  

21 Sseɛd nwem, kenniw, a yenni iǧuẓen řexxu, minzi kenniw ad tᵉttwasjiwnem.

Sseɛd nwem, kenniw, yenni ittrun řexxu, minzi kenniw ad tdehcem. ^■  

22 Sseɛd nwem, umi kenniw carrhen iwdan, ttaẓẓřen xawem, ttekkwaren kenniw, uca ssfeṭṭaḥen zeg yisem nwem x ssibbet n Mmis n bnadem. ^■  

23 Farḥem deg wass nni, negzem s řefraḥet, minzi, aqa řajar nwem imɣar deg ujenna, minzi ammu tuɣa tteggen řejdud nsen deg inabiyyen. ^■  

24 Maca uct xawem, kenniw, aytbab n wagřa, minzi aqa tᵉṭṭfem afewwej nwem. ^■  

25 Uct xawem, kenniw, inni ijjiwnen, minzi ad teǧaẓem.

Uct xawem, kenniw inni iḍeḥḥcen řexxu, minzi ad tceḍnem, ad trum. ^■  

26 Uct xawem umi iwdan ad xawem ssiwřen mliḥ, minzi ammu tuɣa tteggen babatsen ak-d inabiyyen issxarriqen.”

27 “Maca Necc ad awem iniɣ, inni i ɣa isřen i waya: Xsem řɛedyan nwem, thillam deg inni kenniw icarrhen, ^■   28 barkem i yenni kenniw ineɛɛřen, ẓaǧem x yenni xawem ittɛeddan. ^■   29 I wenni i cek iwtin ɣar umeggiz, arr as-dd s wenneɣni, u wenni d ac i ɣa ikksen ajeǧab, war t ttᵉṭṭef ad iksi uřa d tcamir nnek. ^■   30 Marra wenni d ac i ɣa ittaren ewc as t, u wenni i ɣa iksin min iǧan nnek war d as t ttᵉttar. ^■   31 Am mammec texsed ad awem ggen iwdan, ggem uřa d kenniw daysen amenni. ^■   32 Mařa texsem ɣar yenni kenniw ittexsen, man řajar i ɣarwem. Aqa uřa d imednab ttexsen inni i ten ittexsen. ^■   33 Mařa teggem řxar i yenni d awem itteggen řxar, man řajar i ɣarwem. Aqa uřa d imednab tteggen amenni. 34 U mařa tarḍřem i iwdan i zi tᵉttrajam ad awem dd-arren, man řajar ɣarwem? Aqa uřa d imednab arḍřen i imednab, ḥima ad asen dd-idweř amenni ɛawed. ^■   35 Maca xsem řɛedyan nwem, ggem tcuni, arḍřem, war tqeṭṭɛem řayas i ca n yijjen, uca ad yiři řajar nwem imɣar, ad tiřim d tarwa n Umɛuǧi x kuřci, minzi aqa ittegg s ttasiɛ n řxaḍar ak-d iɛeffanen d yenni war t icekkaren. ^■  

36 Ařehmem am mammec iǧa Babatwem d arḥim.”

37 “War ḥekkem, ḥima war tᵉttwaḥakamem. War ttḥasabem, ḥima war kenniw ttḥisiben. Ɣfarem, ad awem ittwaɣfar. ^■  

38 Wcem, ad awem immewc. Ad nḍaren ijj n řmud icna, ideqqes, ittwassenhezz, ifeyyeḍ deg weḥsin nwem, minzi s řmud i zi ɣa tweznem kenniw, ad zzayes tᵉttwaweznem uřa d kenniw.” ^■  

39 Netta inna asen ijj n umedya: “Ma izemmar udarɣař ad indeh adarɣař? Ma war weṭṭin s tnayen idsen deg weḥfur? ^■   40 Ameḥḍar war iǧi ca ḥsen zeg umseřmad nnes, maca kuř ameḥḍar nican ad yiři amecnaw amseřmad nnes. ^■   41 Mayemmi txezzared ɣar uxecciw, tenni di tiṭṭ n umac, maca taḥnact, tenni di tiṭṭ nnek, war kis teřhid? ^■   42 Mammec tᵉttegged teqqared i umac: ‘Uma, ejj ayi ad ac dd-ssuffɣeɣ axecciw i dayek di tiṭṭ nnek!’, u cek simant nnek war tᵉttwiřid ca taḥnact i ɣarek di tiṭṭ nnek. Cek, a amnafeq, suffeɣ-dd amezwaru taḥnact tenni ɣarek di tiṭṭ nnek, xenni ad tᵉttwařid mliḥ maḥend ad tessuffɣed axecciw zi tiṭṭ n umac.”

43 “War din bu tcejjart taṣebḥant i dd-issɣemmayen řɣiǧet texsar, niɣ tacejjart ixsaren i dd-issɣemmayen řɣiǧet taṣebḥant. ^□  ■   44 Minzi kuř tacejjart tᵉttwassen s řɣiǧet nnes, minzi war řeqqḍen zeg isennanen řbacur uřa zi cbarq ak-d isennanen aḍiř. ^■   45 Bnadem aṣebḥan zi řkenz n wuř nnes d aṣebḥan ad issuffeɣ min iṣebḥen uca bnadem aɛeffan zi řkenz n wuř nnes d aɛeffan ad dd-issuffeɣ tuɛeffna. S min zi iccur wuř, zzayes issawař uqemmum nnes.” ^■  

46 “Mayemmi d ayi tᵉttřaɣam: ‘A Sidi, a Sidi’ uca war tᵉtteggem ca min qqareɣ? ^■   47 Marra wenni ɣari i dd ɣa yasen, ad iseř i wawařen inu uca ad zzaysen igg, Necc ad awem ssecneɣ min di yarwes netta. ^■   48 Netta yarwes deg ijj n bnadem i ibnan ict n taddart: iɣza, iḥfar uca issars dsas x sseǧaḥ. Umi dd-tusa sseḥřet, tqebbeḍ řḥemřet taddart nni uca war tzemmar ad tt tessenhezz, minzi tuɣa tebna x sseǧaḥ. 49 Maca wenni ittesřan war ittegg, yarwes di bnadem i ibnan taddart nnes x temmurt břa dsas. Umi t i-dd tqebbeḍ řḥemřet, řexdenni tewḍa. Tuɣa afartek n taddart nni d ameqqran.”