1 Ařami xas imun řɣaci ḥima ad sřen i Wawař n AREBBI, am tuɣa Netta ibedd x tma n řebḥar n Jinnisaret, ^■   2 iẓra tnayen n tɣarruba beddent x tma n řebḥar u ineymaren n iseřman ffɣen-dd zzayes, tuɣa ssizdigen tiracciwin. 3 Ict zi tɣarruba nni tuɣa n Cimɛun Buṭrus. Inya Yeccu di tɣarrabut, isseqsa ten ad aggʷejen cwayt x tma ɣar řebḥar. Xenni iqqim uca tuɣa isseřmad řɣaci zi tɣarrabut.

4 Umi ikemmeř awař, inna i Cimɛun: “Ruḥem ɣar řaǧaɣ, nḍarem tiracciwin nwem i tneymart.” 5 Yarra-dd Cimɛun, inna as: “A Amseřmad inu, aqa nuḥeř ǧiřet tekmeř, war neymar walu, maca x wawař nnek ad nḍareɣ tracca.” 6 Umi ggin man aya, ṭṭfen aṭṭas n iseřman ařami dewřent tracciwin nsen ttcarragent. 7 Aqa ciyyaren ɣar imeddukkař nsen inni tuɣa di tɣarrabut nneɣni, ḥima ad dd-asen ad ten ɛawnen. Nitni usin-dd uca ttwaccurent tnayen n tɣarruba ařami ɛřayen ad ɣarqen.

8 Ařami iẓra Cimɛun Buṭrus man aya, iwḍa ɣar iḍaren n Yeccu, inna as: “Aggʷej xafi, a Sidi, aqa necc d bnadem d amednub.” 9 Ittebhet netta d marra inni iǧan akides x tneymart n iseřman i ṭṭfen,

10 uřa d Yaɛqub d Yuḥanna, tarwa n Zabdi, inni tuɣa d icricen n Cimɛun. Inna Yeccu i Cimɛun: “War tteggʷed ca, zi řexxu ssa tsawent ad tafed tyemmared iwdan i usenjem.” ^■  

11 Nitni iwyen-dd tiɣarruba ɣar řbarr, jjin kuřci uca ḍfaren t. ^■  

12 Umi tuɣa Yeccu deg icten zi tneddam nni, yusa-dd ɣares ijj n weryaz iřqef i-t marra řbarṣ. Umi iẓra netta Yeccu, iwḍa x uɣembub nnes uca izaweg i-t, inna: “A Sidi inu, mařa texsed, tzemmared ad ayi tessizdeged!” ^■  

13 Isswiẓẓeḍ s ufus ɣares, iḥada t, inna: “Necc xseɣ, iři tizdiged!” Řexdenni iruḥ xas řbarṣ.

14 Yumur i-t: “War teqqar i ḥed, maca ruḥ, scen ixef nnek i ukehhan, ewc tawhibt x usizdeg nnek, am mammec t yumur Musa, d cchadet i nitni.” ^■  

15 Ccenɛet nnes tuyur mani mma ktar ɛad uca inneyru řɣaci aṭṭas ḥima ad as sřen u ḥima ad zzayes ttwasgenfan zi řehřacat nsen.

16 Maca Netta iffeɣ-dd ɣar řexřa, ittẓaǧa din.

17 Deg ijj n wass zeg wussan nni am tuɣa isseřmad uca Ifarisiyyen d imseřmaden n Ccariɛa qqimen din, usin-dd iwdan zi marra dcurat n Ljalil d Yahudiyya, u zi Urcalim. Tuɣa din jjehd zi SIDI maḥend ad ttwasgenfan.

18 Xenni iwyen-dd ca n yeryazen ijj n weryaz d aneɛḍab x qama, tuɣa arezzun ad t ssidfen ɣar daxeř maḥend ad t ssarsen zzates. ^■  

19 Umi war ufin manis t i ɣa ssidfen zi ssibbet n řɣaci, geɛɛden x tzeqqa uca seyyben t zeg uqarmud ɣar wadday ak-d qama, nican ɣar řwest, zzat i Yeccu. 20 Umi iẓra Yeccu l’iman nsen, inna i uneɛḍab: “A bnadem, ddnub nnek ttwaɣfaren ac.”

21 Bdan imseřmaden n idlisen d Ifarisiyyen ttxarraṣen, nnan: “Min iɛna Wa, řami Netta ittceqqaf ammu. Wi izemmaren ad iɣfar ddnub mɣir AREBBI weḥḥdes?” ^■   22 Yargeb Yeccu x ixarriṣen nsen, yarra-dd, inna asen: “Min tᵉttxarraṣem deg wuřawen nwem? 23 Min ihewnen ad iniɣ, ma: ‘Ttwaɣfaren ddnub nnek!’, niɣ ad iniɣ: ‘Kkar, uyur!’? 24 Maca ḥima ad tessnem belli Mmis n bnadem ɣares ṣṣulṭa x temmurt ḥima ad iɣfar ddnub - inna i uneɛḍab - I cek umi ɣa iniɣ, kkar, ksi qama nnek uca ruḥ ɣar taddart nnek!” 25 Řexdenni ikkar zzat i tiṭṭawin nsen, iksi qama nnes uca iruḥ ɣar taddart nnes, issemɣara di AREBBI. 26 Atebhet ihwa-dd x marra iwdan, ssemɣaran di AREBBI uca tudef i-ten tiggʷudi, nnan: “Aqa ass-a neẓra řeɛjayeb!”

27 Awarni man aya iffeɣ Yeccu, iẓra ijj n bu-ḍḍariba, qqaren as Lawi, iqqim deg wemcan n ḍḍariba, inna as: “Ḍfar ayi-dd!” ^■   28 Ijja kuřci, ikkar uca iḍfar i-t-i-dd.

29 Igga as Lawi ijj n umensi imɣar di taddart nnes. Inni akides iqqimen ɣar ṭṭabřa tuɣa aten deg waṭṭas n řɣaci zeg ayt n ḍḍariba d inneɣni. ^■   30 Maca imseřmaden n idlisen d Ifarisiyyen cetcan, nnan i imeḥḍaren nnes: “Mayemmi tᵉttettem, tessessem ak-d ayt n ḍḍariba d imednab?” 31 Yarra-dd Yeccu, inna asen: “Inni iṣeḥḥen war ḥdijen ca aḍbib, maca imehřac wah. 32 War dd-usiɣ ad řaɣiɣ x imseggaden, maca x imednab ɣar ttubet.” ^■  

33 Nnan as: “Mayemmi tẓumman u ttẓaǧan imeḥḍaren n Yuḥanna aṭṭas uřa d yenni n Ifarisiyyen, maca inni nnek ttᵉtten, sessen?” ^■   34 Inna asen: “Ma texsem ad tejjem ayt n umuřay ad ẓummen mařa amuřay aqa-t ɛad akidsen! ^■   35 Maca ad dd-awḍen wussan xmi xasen ɣa ittwammeksi Umuřay, řexdenni ad ẓummen deg wussan nni.”

36 Inna asen ɛawed ijj n umedya: “War din ḥed ittegg taneqqič n warruḍ n jdid x warruḍ abuřay, mařa lla, ad iɣarṣ jdid uřa taneqqič n jdid war tᵉttřiqi abuřay. 37 War iǧi ḥed ittegg binu n jdid di txuncay tiqdimin, ḥima binu n jdid war isscarrig ca tixuncay uca binu ad izeǧeɛ u txuncay ad ḍeyyɛent. ^■   38 Maca tteggen binu n jdid di txuncay n jdid uca ad xemmřen s tyuya. 39 Uřa d ijj, mařa iswa aqdim, war ittexs ɛad řexdenni jdid, minzi netta ad yini: ‘Aqdim ittfuḥ!’ ”