1 Yeccu iɛqeb-dd zi L'Urdun am tuɣa iccur s Arruḥ Iqeddsen uca Arruḥ indeh i-t ɣar řexřa ^■   2 ḥima ad ittwajarreb zeg ibřis arebɛin n wussan. War icci walu deg wussan nni uca awarni řami ɛdun wussan nni, iṭṭef i-t i-dd řaẓ ɣar uneggar. ^■  

3 Inna as ibřis: “Mařa Cek d mmis n AREBBI, ini i weẓru aya ad idweř d aɣrum.” 4 Yarra-dd xas Yeccu, inna: “Aqa tura: ‘Bnadem war itteddar s weɣrum waha, maca s kuř awař n AREBBI.’ ” ^■  

5 Xenni issgeɛɛed i-t cciṭan ɣar ijj n wedrar yuɛřan, isscen as marra tigeldiwin n ddunect deg ijjen wermac. 6 Inna as ibřis: “Ad ac wceɣ ṣṣulṭa aya marra d uɛuǧi nnes, minzi i necc umi temmewc u tticeɣ tt i wenni xseɣ. 7 Mařa tɛebded ayi, ad ɣarek yiři marra aya.” 8 Yarra-dd xas Yeccu, inna as: “Aqa tura: ‘SIDI, AREBBI nnek, umi ɣa tsejded u i Netta weḥḥdes umi ɣa tsexxared.’ ” ^■  

9 Yiwyi t ɣar Urcalim uca issbedd i-t x tqiccet n tzeqqa n Zzawect Tameqqrant, inna as: “Mařa Cek d Mmis n AREBBI, nḍar ixef nnek ssa ɣar wadday,

10 minzi tura: ‘Ad yumur lmalakat nnes xak maḥend ad Cek ḥḍan,

11 aqa x ifassen nsent ad Cek ksint ḥima aḍar nnek war ineggeḥ ca aẓru.’ ” ^■  

12 Yarra-dd xas Yeccu inna as: “Aqa ittwanna: ‘War ttjarrab SIDI, AREBBI nnek.” ^■  

13 Umi ikemmeř ibřis marra aɣekkʷi nnes, yuyur xas ca n řweqt.

14 Iɛqeb-dd Yeccu s jjehd n Arruḥ ɣar Ljalil uca iffeɣ řexbar xas di marra jjwayeh i d as dd-innḍen. ^■  

15 Tuɣa isseřmad di temzidawin nsen, ssɛuǧan t iwdan marra.

16 Yusa-dd ɣar Nnaṣira mani yarebba, uca yudef ɣar temzida n Wudayen deg wass n ssebt ɛlaḥsab tanamit nnes, uca ikkar ḥima ad issɣar. ^■  

17 Immewc as adlis ittwannḍen n unabi Icaɛya uca yarzem Yeccu adlis ittwanḍen, yufa amcan mani tura:

18 “Arruḥ n SIDI xafi,

minzi Netta idhen ayi

ḥima ad barrḥeɣ s Řexbar Aṣebḥan i imezřaḍ,

issekk ayi-dd ḥima ad ssgenfiɣ inni umi yarẓ wuř,

ḥima ad barrḥeɣ i imeḥbas s usarreḥ,

i idarɣařen s řxeẓrat,

u ḥima ad ssfewwjeɣ inni ittwarẓen

řami din abarreḥ n weɣfar n ddnub nsen,

19 ḥima ad barrḥeɣ s useggʷas aṣebḥan n SIDI.” ^■  

20 Xenni yenneḍ adlis, iwca i-t i umsexxar, iqqim, am dayes nḍaren marra inni tuɣa di temzida tiṭṭawin nsen. 21 Xenni ibda iqqar asen: “Aqa ass-a ttwakemmřent tira aya deg imezzuɣen nwem.”

22 Tuɣa marra cehhden xas, ttbehten s wawařen n arḍa i dd-iffɣen zeg uqemmum nnes uca nnan: “Ma war iǧi wa d mmis n Yusuf?” ^■   23 Inna asen Yeccu: “Nican ad ayi tinim lmatal-a: ‘A Aḍbib, sgenfa yixef nnek! Mecḥař nesřa belli ijra di Kafarnaḥum, egg man aya ɛawed di tendint nnek’.” ^■   24 Xenni inna: “S tidett, ad awem iniɣ, war iǧi unabi d ameqbuř di temmurt nnes. ^■   25 S tidett ad awem iniɣ: Tuɣa din tijjař aṭṭas di taddart n Israil deg wussan n Iliya umi ittwabelleɛ ujenna třata n iseggʷusa d setta n iyuren, ařami tuɣa řaẓ imɣar di temmurt marra. 26 War dd-ittwassekk Iliya uřa ɣar icten zzaysent, mɣir ɣar Ṣarfat i iǧan di jjwayeh n Ṣaydun, ɣar ict n tajjač. 27 Tuɣa din di Israil di řweqt n unabi Ilicaɛ aṭṭas n iwdan i di iǧa řbarṣ, uca uřa d ijj zzaysen war ittwasizdig mɣir Naɛman zi Aram waha.” ^■  

28 Umi sřin aya, ttwaccuren marra inni iǧan di temzida s tefqeḥt. 29 Kkaren, ssuffɣen t barra i tendint, iwyen t ɣar tqiccet n wedrar i xef tuɣa tebna tendint nsen ḥima ad t nḍaren zeg ijj n jjarf yuɛřan. 30 Maca Netta icuqq di řwest nsen uca iruḥ.

31 Ihwa ɣar Kafarnaḥum, ict n tendint di Ljalil, tuɣa isseřmad i-ten deg wussan n ssebt. ^■   32 Ttbehten s useřmed nnes, minzi awař nnes tuɣa t s ṣṣulṭa. ^■   33 Tuɣa di temzida ijj n weryaz dayes buḥbeř n ijj n cciṭan amengus uca isɣuyyu s jjehd aṭṭas, ^■   34 inna: “Tewwej xafi! Min din jar aneɣ akidek, a Yeccu Nnaṣiri? Ma tusid-dd da ḥima ad aneɣ tᵉtteḥḥid? Necc ssneɣ min teɛnid, aqa Cek d Amqeddas n AREBBI.” 35 Iwebbex i-t Yeccu, inna as: “Sqar, ffeɣ-dd zzayes!” Inḍar i-t cciṭan di řwest, iffeɣ zzayes, břa ma ad as issexsar ca. 36 Yarsa utebhet x marra uca bdan ssawařen jar asen, nnan: “Mana awař-a? Aqa s ṣṣulṭa d jjehd ittamar řaryaḥ imengas, uca ffɣen!” 37 Iffeɣ-dd xas řexbar ɣar marra jjwayeh i d as dd-innḍen.

38 Řami dd-iffeɣ Yeccu zi temzida, yudef ɣar taddart n Cimɛun. Tuɣa taḍekkʷač n Cimɛun dayes timessi aṭṭas u ttaren zzayes di ṭṭweɛ nnes. ^■   39 Iɣnes xas uca iwebbex timessi uca tejja xas tmessi. Řexdenni tekkar, tedweř tᵉttsexxar xasen.

40 Řami teɣři tfuct, iwyen-dd ɣares marra inni i tuɣa ɣar iǧa imehřac i di iǧa ɛřam kuř řehřacat, uca Netta issars afus nnes x kuř ijjen zzaysen, issgenfa ten. ^■   41 Tuɣa ccwaṭen tteffɣen-dd ɛawed zeg waṭṭas idsen, tuɣa sɣuyyun, qqaren: “Cek d Lmasiḥ Mmis n AREBBI!” Maca iwebbex i-ten, war ten ijji ad ssiwřen, minzi ssnen belli Netta d Lmasiḥ. ^■  

42 Řami tuɣa d aziř, iffeɣ-dd, iruḥ ɣar ijj n wemcan ixřan, tuɣa řɣaci yarezzu xas, usin-dd ɣares uca ṭṭfen t ḥima war xasen ittbeɛɛid. ^■   43 Inna asen Yeccu: “Aqa ittxeṣṣa ayi ad barrḥeɣ ɛawed i tneddam nneɣni s Tgeldit n AREBBI, minzi i man aya umi dd-ttwasekkeɣ.” 44 Xenni tuɣa ittbarreḥ di temzidawin n Ljalil.