1 Di řweqt nni usin-dd ɣares ca n iwdan, xebbaren t x Ijaliliyyen inni ixeǧeḍ Pilaṭus idammen nsen ak-d tɣarṣin nsen. 2 Yarra-dd Yeccu, inna asen: “Ma ittɣiř awem belli Ijaliliyyen-a d imednab ktar zeg Ijaliliyyen nneɣni umi d asen imsar uweddeb-a? 3 Lla! Maca Necc ad awem iniɣ, aqa uřa d kenniw, mɣir mařa tᵉtubem, ad tᵉttwahellkem marra ammu. 4 Niɣ ittɣiř awem belli tmenṭac n iwdan i xef dd-tewḍa ṣṣumɛet di Siluwam uca mmuten zzayes, ma aqa aten d imednab ktar zeg iwdan nneɣni i izeddɣen di Urcalim? 5 Lla! Maca Necc ad awem iniɣ, aqa uřa d kenniw, mɣir mařa tᵉtubem, ad tᵉttwahellkem marra am nitni!”

6 Inna asen amedya aya: “Tuɣa ɣar ijj n weryaz ijj n wartu i ittwaẓẓun deg umarjuɛ nnes n uḍiř, uca netta yusa-dd, yarezzu dayes tazart, maca war tt yufi. 7 Inna i bab n umarjuɛ n uḍiř: ‘Aqa třata n iseggʷusa ttaseɣ-dd, arezzuɣ tazart deg wartu aya, war tt ufiɣ. Qess i-tt xenni, mayemmi tessaḥař ɛad tammurt?’ 8 Yarra-dd xas ufeǧaḥ: ‘A sidi, ejj i-tt ad tbedd ɛad aseggʷas-a. Ad tt ɣziɣ, u ad as ggeɣ řeɣbar. 9 Ad taɣ ad yarr řɣiǧet, mařa lla, xenni qess i-tt deg useggʷas i dd ɣa yasen.’ ”

10 Řami tuɣa isseřmad Yeccu deg icten zi temzidawin di ssebt,

11 tuɣa din ict n temɣart tiweḍ řmijař n tmenṭac n iseggʷusa buḥbeř nnes iwɛar. Tuɣa teqwes, war tzemmar ad tseggem aɛrur.

12 Umi tt iẓra Yeccu, iřaɣa-dd xas ɣares, inna as: “A tamɣart, aqa cem tenfekked zi řehřac nnem!”

13 Issars xas afus nnes uca nettat tedweř tseggem řexdenni, tebda tessemɣara di AREBBI!

14 Maca ameqqran n temzida, umi ixeyyeq minzi Yeccu issgenfa ijjen di ssebt, iṭṭef deg wawař, inna i řɣaci: “Aqa di setta n wussan ittxeṣṣa řxedmet, asem-dd deg wussan nni maḥend ad tᵉttwasgenfam, maci deg wass n ssebt!” ^■  

15 Yarra-dd Yeccu, inna as: “A cek, amnafeq! Ma war ifessi kuř ijjen zzaywem deg wass n ssebt i ufunas nnes niɣ i weɣyuř nnes zi řkuri, xenni ad t indeh maḥend ad t iward? ^■  

16 Maca tamɣart-a aqa-tt d yeǧis n Ibrahim, tenni icedd cciṭan, xzar, ɛad řmijař n tmenṭac n iseggʷusa, ma war d as dd-yusi ad tᵉttwafekk zeg uceddi aya deg wass n ssebt?”

17 Am inna man aya, sseḍḥan marra inni tuɣa akides ittemɛařan, maca marra řɣaci ifarḥ zi lmuɛjizat nni tuɣa ittwaggen s ufus nnes.

18 Yeccu inna: “Min di tarwes Tgeldit n AREBBI uca min zi tt ɣa ssemquddeɣ? ^■  

19 Aqa-tt amecnaw ict n tḥebbuct n zzariɛet n uxerdel iksi tt ijj n bnadem, inḍar i-tt di teḥwict nnes, uca teɣmi-dd, tedweř d tacejjart temɣar uca ggin ijḍaḍ n ujenna řeɛwacc nsen di řefruɛ nnes.” ^□   20 Yeccu inna ɛawed: “S min zi ɣa ssemquddeɣ Tageldit n AREBBI? ^■   21 Aqa-tt amecnaw antun, teysi t temɣart, teffar i-t di třata n řemdud n waren, ařami issmemm marra!”

22 Iẓwa tineddam d dcurat, am tuɣa isseřmad deg webrid ɣar Urcalim. ^□  ■   23 Ijjen isseqsa i-t, ma aqa din drus n yinni i ɣa ittwasnejmen. Yarra-dd Yeccu, inna asen: 24 “Ggem jjehd nwem ḥima ad tadfem zi tewwart iḥṣaren, aqa Necc ad awem iniɣ, aṭṭas arezzun ad dd-adfen, maca war zemmaren. ^■   25 Zeg wami i ɣa ikkar bab n taddart maḥend ad ibelleɛ tawwart, xenni ad tbeddem di barra, ad tessqareqbem, ad tebdam ad tinim: ‘A Siditneɣ a Siditneɣ, arzem aneɣ!’ Maca Netta ad dd-yarr, ad yini: ‘Necc war kenniw ssineɣ, manis kenniw?’ ^■   26 Ad tebdam ad tinim: ‘Neccin aḥeqqa tuɣa necca neswa qibač nnek uca Cek tuɣa tesseřmaded deg imesraq nneɣ!’ 27 Maca Netta ad yini: ‘War kenniw ssineɣ, manis kenniw war ssineɣ! Aggʷejem xafi marra kenniw inni itteggen min war iseggden!’ ^■   28 Ad din tiři tɣuyyit d uɣezzi n teɣmas, xmi i ɣa tẓarem Ibrahim d Isḥaq d Yaɛqub d marra inabiyyen di Tgeldit n AREBBI, maca kenniw ad temmenḍarem barra. ^■   29 Ad dd-asen zi manis d tneqqar tfuct u zi mani tɣeǧi tfuct uřa zi ccamal uřa zi ljanub, ad qqimen ɣar ṭṭabřa di Tgeldit n AREBBI. ^■   30 Xzar, aqa din ineggura inni i ɣa yiřin d imezwura u d imezwura inni i ɣa yiřin d ineggura.” ^■  

31 Deg wass nni qarrben-dd ca n Ifarisiyyen, nnan as: “Ffeɣ, ruḥ ssa, minzi Hirudus ixs ad Cek ineɣ!” 32 Yeccu inna asen: “Ruḥem, inim as i wecɛeb-a: ‘Xẓar, aqa Necc ssuffuɣeɣ ccwaṭen, ssgenfiɣ ass-a d tiwecca, uca deg wass wiss třata ggur ad kemmřeɣ.” ^□   33 Maca ittxeṣṣa ayi ad xedmeɣ ass-a d tiwecca, uca deg wass awarni as ad raḥeɣ, minzi war izemmar ad ittwaneɣ ijj n unabi barra i Urcalim. 34 A Urcalim, a Urcalim, tenni ineqqen inabiyyen d tenni yarejmen inni i ɣarem dd-ittwassekken, mecḥař n twařawin tuɣa xseɣ ad ssmuneɣ tarwa nnem amecnaw mammec tessmuna tyaẓiḍt ifiǧusen nnes sadu wafriwen nnes, maca kenniw war texsem. ^■   35 Xzar, tadart nwem ad awem iqqim d řxarbet. S tidett, Necc ad awem iniɣ, aqa war d ayi tẓarrem ař dd ɣa tas řweqt i di i ɣa tinim: ‘Sseɛd n wenni dd ɣa yasen s Yisem n SIDI’.” ^■