1 Iṭṭef Yeccu ɛawed deg wawař uca issiweř akidsen ɛawed s imedya, inna: 2 “Tageldit n ijenwan amecnaw ijj n ujeǧid igga urar i mmis. ^■   3 Issekk-dd imsexxaren nnes ḥima ad řaɣan x yenni ittwaɛarḍen ɣar wurar, maca ugin ad dd-asen.

4 Ɛawed issekk-dd imsexxaren nneɣni, inna: ‘Inim i yenni ittwaɛarḍen: Aqa ssewjdeɣ awem amecři, ɣarṣeɣ iyenduzen inu u řmař inu iṣeḥḥen, aqa marra iwjed, asem-dd ɣar wurar!’ ” 5 Nitni maca war wcin ca taynit i man aya, ruḥen, ijjen ɣar řeɛraṣi nnes u wenneɣni ɣar ttijara nnes. 6 Inni iqqimen ṭṭfen imsexxaren nnes, ɣezzan daysen uca nɣin ten.

7 Řami isřa ujeǧid man aya, ixeyyeq aṭṭas, issekk-dd řɛeskar nnes uca yareyyeb imenɣayen nni uca issecmeḍ tandint nsen. 8 Xenni inna i imsexxaren nnes: ‘Aqa urar iwjed maca inni tuɣa ittwaɛarḍen war t sdihiǧen ca. 9 S uyenni uyurem ɣar mani ttemsebḍan ibriden, řaɣam-dd x marra inni i ɣa tafem din ɣar wurar.’

10 Xenni ffɣen-dd imsexxaren nni ɣar ibriden uca ssmunen marra inni ufin, am iṣebḥanen am iɛeffanen, uca amcan n wurar idweř iccur s inewjiwen i iqqimen dinni.

11 Řami dd-yudef ujeǧid maḥend ad iẓar inewjiwen nni iqqimen dinni, iḥekkar i yijj n bnadem war yarḍ ca arruḍ n wurar.

12 Inna as: ‘A ameddukkeř inu, mammec dd-tudfed danita břa arruḍ n wurar?’ Uca netta idweř ignu.

13 Xenni inna ujeǧid i imsexxaren nnes: ‘Carfem t s ifassen d iḍaren uca nḍarem t barra ɣar uneggar n taǧest mani i ɣa iřin imeṭṭawen d uɣezzi n teɣmas.’ ^■  

14 Minzi aqa din aṭṭas inni ittwařaɣan maca drus inni ittwafarzen.” ^■  

15 Xenni ruḥen Ifarisiyyen, mcawaren maḥend ad as ggen taxceft di ssibbet n wawařen nnes. ^■  

16 Uca ssekken ɣares imeḥḍaren nsen ak-d inni zi taddart n Hirudus. Nitni nnan: “A Amseɣɣar, aqa nessen belli Cek d tidett, tesseřmaded abrid n AREBBI s tidett, nhřa ma tesseřqid uřa x yijj, minzi Cek war tqebbřed ca řxezrat ɣar iɣembab n yewdan.

17 Iwa ini aneɣ mammec i twařid Cek: ‘Ma iḥeqq ɛlaḥsab Ccariɛa ad tᵉttwaxeǧeṣ ḍḍariba i qayṣar niɣ lla?’ ”

18 Maca Yeccu issen taḥraymect nsen uca inna: “Mayemmi d ayi tᵉttjarrabem, kenniw, a imnafqen?

19 Seccnem ayi uqiyya n dinar n ḍḍariba x kuř azeǧif!” Iwyen as-dd ijj n dinar. 20 Xenni inna asen: “Wi yiřan taṣwirt-a d tira aya?” 21 Nnan as: “N qayṣar!” Xenni inna asen: “Wcem i qayṣar min iǧan i qayṣar, u i AREBBI min iǧan i AREBBI.” ^■   22 Řami sřin man aya, tbehten, semḥen dayes uca ruḥen.

23 Deg wass nni usin-dd ɣares Iṣaduqiyyen inni iqqaren aqa war din bu tnukra uca sseqsan t, ^■   24 nnan as: “A Amseɣɣar, Musa aqa inna: ‘Mařa immut ḥed war dd-yejji bu tarwa, ittxeṣṣa i umas ad imřec ak-d temɣart nnes ad kides dd-yejj aḥenjir i umas.’ ^■   25 Tuɣa ɣarneɣ sebɛa n wawmaten. Amezwaru imřec, immut. Umi war dd-yejji ca tarwa, aqa ijja tamɣart nnes i umas. 26 Ammu i immut uřa d wenni wiss tnayen d wiss třata ař wenni wiss sebɛa. 27 Ɣar uneggaru nsen marra temmut temɣart. 28 I man wen zzaysen i ɣa tiři temɣart di tnukra, minzi tuɣa-tt d tamɣart nsen marra?”

29 Yeccu maca yarra-dd, inna asen: “Aqa kenniw tweddarem minzi war tessinem ca Tira Iqeddsen uřa d jjehd n AREBBI. 30 Minzi di tnukra war ttiwyen nitni timɣarin, u timɣarin war ttiřint i yeryazen, maca ad iřin am lmalakat n AREBBI deg ujenna. 31 Maca zi jjihet n tnukra jar n imettinen, ma war teɣrim ca min d awem inna AREBBI i iqqaren: 32 ‘Aqa d NECC, AREBBI n Ibrahim, AREBBI n Isḥaq, AREBBI n Yaɛqub!’ AREBBI war iǧi d AREBBI n imettinen maca n yinni iddaren.” ^■   33 Řami sřin řɣaci man aya, tbehten deg useřmed nnes. ^■  

34 Řami sřin Ifarisiyyen belli Netta ibelleɛ aqemmum n Iṣaduqiyyen, munen jar asen. ^■   35 Ijjen zzaysen, ijjen wenni issnen Ccariɛa mliḥ, isseqsa t ḥima ad t ijarreb: ^■   36 “A Amseɣɣar, man tawṣeyyet i iǧan d tameqqrant di Ccariɛa?” 37 Inna as Yeccu: “Ad texsed SIDI, AREBBI nnek, s marra wuř nnek, s marra řeɛmar nnek, s marra jjehd nnek u s marra řeɛqeř nnek. ^■   38 D ta d tawṣeyyet tameqqrant d tamezwarut. 39 Tenni wiss tnayen tarwes dayes, aqa nettat: ‘Ad texsed amqarreb nnek amecnaw ixef nnek’. ^■   40 X tnayen n tweṣṣa aya ittwabna marra adlis ittwannḍen n Ccariɛa d inabiyyen.”

41 Am tuɣa munen Ifarisiyyen, isseqsa ten Yeccu, ^■   42 inna: “Min dd awem iḍharen di Lmasiḥ? Umi igga mmis?” Nnan as: “N Dawud.” 43 Inna asen: “Mammec i ɣa yegg Dawud ad as isemma zi Arruḥ ‘SIDI’, am iqqar: 44 ‘SIDI inna i Sidi inu: Qqim-dd x ufusi inu ař ɣa ggeɣ řɛedyan nnek d tanebdat sadu iḍaren nnek.’ ^■   45 Mařa Dawud iřaɣa as ‘SIDI’, mammec i ɣa yiři d Mmis?” 46 Uřa d ijjen war izemmar ad xas dd-yarr u uřa d ijj war iqqim izeɛɛem ittseqsa t ca ɛad zeg wass nni.