1 Řexdenni issiweř Yeccu ak-d řɣaci d imeḥḍaren nnes, 2 inna: “Imseřmaden n idlisen d Ifarisiyyen ssɣimen simant nsen x řkursi n Musa. ^■   3 S uyenni marra min d awem qqaren maḥend ad dayes tcebbarem, ggem t, maca war tteggem ɛlaḥsab řexdayem nsen, minzi nitni waxxa qqaren t, war t tteggen maca. ^■   4 Ttceddan řeḥmeř iḍeqřen, ssrusan ten x tɣardin n iwdan, maca nitni s yixef nsen war xsen ad ten ssenhezzen uřa s yijj n uḍaḍ. ^■   5 Marra řexdayem nsen i itteggen, tteggen tent ḥima ad ten ẓaren iwdan minzi nitni tteggen tiḥezzanin nsen n tẓaǧit d imiriwen uca ticrurin i iǧan ɣar ubeḥřuř n řkacni n tẓaǧit nsen, ggin tent d timeqqranin. ^■   6 Nitni ttexsen imucan imezwura ɣar řeftuḥ u řekrasi ɣar zzat di temzidawin, ^■   7 uřa d ssřam di řeswaq, uca iɛjeb asen ad asen řaɣan iwdan ‘A amseřmad inu!’ ^■   8 Maca kenniw war tejjim ad awem řaɣan ‘Amseřmad!’, minzi Amseřmad nwem d Ijjen, u kenniw marra d awmaten. 9 War iɛeddeř ad třaɣam ixef nwem ‘Tababat!’ di temmurt, minzi Babatwem i iǧan deg ijenwan d Ijjen. ^■  

10 War tejjim ad awem řaɣan ‘Imgewwaden’ minzi Ijjen d wenni d Amgewwad nwem, aqa-t d Lmasiḥ.

11 Maca ameqqran nwem ad yiři d amsexxar nwem. ^■  

12 Wenni i ɣa issuɛřan ixef nnes, ad ittwassemẓi u wenni i ɣa issmeẓyen ixef nnes, ad ittwassuɛřa.” ^■  

13 “Uct xawem, a kenniw imseřmaden n idlisen d Ifarisiyyen, kenniw, a imnafqen, kenniw tᵉttettem tudrin n tijjař s ṣṣdaqi i di tmeẓẓřem di ṭṭweɛ n tẓaǧatin nwem tizirarin. S uyenni ad teksim řḥukm d ameqqran. ^■  

14 Uct xawem, a kenniw imseřmaden n idlisen d Ifarisiyyen, kenniw, a imnafqen, kenniw tᵉttbellɛem Tageldit n ujenna i iwdan, minzi kenniw simant nwem war tt tᵉttidfem, uca inni yarezzun ad dd-adfen, war ten tᵉttejjim ad dd-adfen. ^■  

15 Uct xawem, a kenniw imseřmaden n idlisen d Ifarisiyyen, kenniw, a imnafqen, kenniw tekkem x řbarr u x řebḥar, ḥima ad dd-tarrem ijjen ɣar webrid nwem u xmi i kidwem ɣa yiři, kenniw tᵉttarram t d mmis n jᵉhennama d aɛeffan mahu kenniw tnayen n tseqqar.

16 Uct xawem, a kenniw imgewwaden idarɣařen, inni iqqaren: ‘Wenni ijjuǧen ɣar Zzawect Tameqqrant, aqa tajaǧit nnes war tessekkwi walu, maca wenni i ɣa ijjuǧen s wureɣ n Zzawect Tameqqrant, aqa netta iqqen ɣar iřes nnes.’

17 A ifɣař, a idarɣařen, min isekkwan ktar, ureɣ niɣ Zzawect Tameqqrant tenni tessqeddes ureɣ.

18 Uca teqqarem ɛawed: ‘Wenni ijjuǧen ɣar uɛalṭar, aqa tajaǧit nnes war tsekkwi walu, maca wenni i ɣa ijjuǧen s tmewci i xas immarsen, aqa netta iqqen ɣar iřes nnes.’

19 A ifɣař, a idarɣařen, min isekkwan ktar, tamewci niɣ aɛalṭar wenni issqeddes tamewci? 20 Wi i ɣa ijjaǧen xenni ɣar uɛalṭar, aqa ijjuǧ ɣar uɛalṭar u ɣar marra min xas iǧan. 21 u wi i ɣa ijjaǧen ɣar Zzawect Tameqqrant, ijjuǧ ɣares u ɣar Wenni dayes izeddɣen. ^■   22 u wi i ɣa ijjaǧen ɣar ujenna, aqa ijjuǧ ɣar řɛarc n AREBBI d Wenni xas iqqimen. ^■  

23 Uct xawem, a kenniw imseřmaden n idlisen d Ifarisiyyen, kenniw, a imnafqen, minzi kenniw tᵉtticem taɛcart n nneɛnaɛ d ssanuǧ d řcemmum, maca war d awem icqi min iǧan d ameqqran di Ccariɛa, aqa řḥukm d arreḥmet d l’iman. Tina i ittxeṣṣa ad teggem nhřa ma ad tejjem tinneɣni. ^■   24 A imgewwaden idarɣařen inni ifarrnen tizit, maca tessɣeǧayem ařɣem.

25 Uct xawem, a kenniw imseřmaden n idlisen d Ifarisiyyen, kenniw, a imnafqen, minzi tessizdagem barra n uɣarraf d ṭṭebṣi maca ɣar daxeř teccurem s tucceffra d min war iseggden. ^■   26 A Afarisi adarɣař, sizdeg amezwar daxeř n uɣarraf d ṭṭebṣi, maḥend ad yiři izdig uřa min iǧan ɣar barra nsen. ^■  

27 Uct xawem, a kenniw imseřmaden n idlisen d Ifarisiyyen, kenniw, a imnafqen, minzi teggim am imeḍřan inni ittwajiyyaren, ttbanen d iṣebḥanen ɣar barra, maca ɣar daxeř aqa ccuren s ixsan n řxecbat u s marra řexmej. ^■   28 Amenni kenniw ɛawed, aqa teḍharem d imseggaden qibač i iwdan, maca ɣar daxeř aqa teccurem s řmuɛṣiyyet u s nnifaq.

29 Uct xawem, a kenniw imseřmaden n idlisen d Ifarisiyyen, kenniw, a imnafqen, minzi tbennam imeḍřan n inabiyyen u tzewwqem řqubbat n imeḍřan n imseggaden, ^■   30 teqqarem: ‘Mři tuɣa neǧa deg wussan n řejdud nneɣ, ad yiři war ncarrec deg usizzeř n idammen n inabiyyen.’ 31 S uya tcehhdem x yixef nwem belli kenniw d ayt n yinni inɣin inabiyyen. ^■   32 Iwa kemmřem kenniw xenni uřa řeqyas n min ggin řejdud nwem! 33 A iřefsawen, tarwa n ifiɣran, mammec i ɣa teggem ad ttwasnejmem zi řḥukm n tmessi n jᵉhennama? ^■   34 S uyenni xzarem, Necc ad ɣarwem-dd ssekkeɣ inabiyyen d imiɣisen d imseřmaden n idlisen. Ca zzaysen ad ten tenɣem, ca zzaysen ad ten tṣellbem u ca zzaysen ad ten thettkem s urekkuḍ di temzidawin nwem uca ad xasen taẓẓřem zi tendint ɣar tendint nneɣni, ^■   35 ḥima ad xawem iřin marra idammen iseggden i issizzřen x temmurt, zeg idammen n Habil amseggad ař idammen n Zakariyya, mmis n Birixya i tenɣim jar Zzawect Tameqqrant d uɛalṭar. ^■   36 S tidett, Necc ad awem iniɣ: Marra timesřayin-a ad dd-asent x jjiř-a.”

37 “A Urcalim, a Urcalim, cem i inɣin inabiyyen u i iyarjmen inni d awem dd-ittwassekken, mecḥař tuɣa xseɣ ad ssmuneɣ tarwa nnem amecnaw ict n tyaẓiḍt tegga ifiǧusen nnes sadu afriwen nnes, maca kenniw tuɣa war tᵉttexsem. ^■   38 Xzar, taddart nwem ad tᵉttwajj i cem d řxarbet, ^■   39 minzi Necc ad awem iniɣ: Kenniw war d ayi tẓarrem ař ɣa tinim: ‘D amimun Wenni i dd-yusin s Yisem n SIDI.’ ” ^■