1 Řḥukm issaggʷaden. Awař n SIDI i Israil s ufus n Malaxi.

2 “Necc tuɣa ttexseɣ cek, inna SIDI, maca kenniw teqqarem: ‘Mani d aneɣ texsed?’ Ma war iǧi Ɛisu d umas n Yaɛqub, iqqar SIDI, u Necc ttexseɣ Yaɛqub, ^■   3 maca carheɣ Ɛisu. Necc arriɣ idurar nnes d řxarbet uřa d tasɣart nnes i wuccanen n řexřa. 4 Waxxa Idum iqqar: ‘Neccin nettwareddeǧ, maca ad nebna řxirbat ɛawed!’, ammu i iqqar SIDI n řɛeskarat: Nitni ad bnan ɛawed, maca Necc ad hedmeɣ u ad asen řaɣan ‘Tammurt n uɛeffan’, u ɛawed: ‘Řgens wenni x isexxeḍ SIDI i řebda!’ 5 Tiṭṭawin nwem ad t ẓaren u kenniw ad tinim: ‘D ameqqran SIDI tiwa i temmurt n Israil!’ ”

6 “Mmis ittweqqar babas d umsexxar bab nnes. Mařa Necc aqa d Baba, mani iqqim xenni řewqar i Necc? Mařa Necc aqa d SIDI, mani teqqim tiggʷudi nni zzayi?, iqqar SIDI n řɛeskarat, i kenniw, a ikehhanen, inni isseḥqaren Isem inu. Maca kenniw teqqarem: ‘Min zi nesseḥqar neccin Isem nnek?’ 7 Kenniw tᵉttawyem-dd aɣrum ixemjen x uɛalṭar inu, teqqarem: ‘Min zi i cek nessxemmej?’ Min zi aqa kenniw teqqarem: ‘Ṭṭabřa n SIDI d tameḥqurt.’ 8 Xmi kenniw tᵉttawyem min iǧan d aḍarɣař i taɣarṣt, ma war iǧi aya d řɣar? U xmi i ɣa tawyem kenniw min iǧan d aqiḍar, ma war iǧi aya d řɣar! Siweḍ aya ict n twařa ɣar lwali. Ma cek ad as dd-tased x řxaḍar niɣ netta ad yiři mliḥ akidek?, iqqar SIDI n řɛeskarat.

9 Xenni řexxu, arzum udem n Arebbi, ḥima Netta ad xaneɣ iḥinn. Aya imsar s ufus nwem: Ma ad yiři s nneyyet tecna i yijj zzaywem?, iqqar SIDI n řɛeskarat.

10 Man wen zzaywem i ɣa ibellɛen xenni tiwwura, ařami nitni war ttesriqqin ɛad aɛalṭar inu baṭeř. Necc war daywem ttifeɣ arḍa, iqqar SIDI n řɛeskarat, u uřa d tawhibt n řɣiǧet zeg ufus nwem war dd-tᵉttis x řxaḍar inu. ^■  

11 Maɣar zi mani dd tneqqar tfuct ař mani tɣeǧi, ad yiři Yisem inu d ameqqran jar řegnus u di kuř amcan ad awyen tawhibt n řebxur i Yisem inu uřa d ict n tewhibt n řɣiǧet, maɣar Isem inu ad yiři d ameqqran jar řegnus, iqqar SIDI n řɛeskarat,

12 maca kenniw tessɛiǧitem Isem nni am teqqarem: ‘Ṭṭabřa n SIDI texmej u řɣiǧet nnes, ixs ad yini macca nnes, d tameḥqurt!’

13 Kenniw teqqarem ɛawed: ‘Xzar, mana amnus- a!’, maca kenniw simant nwem tṣuḍmem xas, iqqar SIDI n řɛeskarat. Kenniw tᵉttawyem-dd min ittwacaren, u min ittqejdḥen d min iheřcen tᵉttwayem-dd am tewhibt n řɣiǧet. Ma ad ayi iɛjeb man aya zeg ufus nwem?, iqqar SIDI.

14 Ittwanɛeř uɣeccac, wenni ɣar iǧa ijj n řmař d awtem di tḥimart nnes uca iwaɛd i-t u xenni iɣarṣ i yijj n řmař d aneɛḍub i Sidi! Maɣar Necc d ijj n Ujeǧid d ameqqran, iqqar SIDI n řɛeskarat, u Isem inu d ameqqran jar řegnus.”