1 “Xzaret, ad dd-yas ijj n wass i SIDI i di i ɣa tᵉttwabḍa tkeccaḍt nnem di řwest nnem! 2 Necc ad ssmuneɣ marra řegnus i umenɣi ak-d Urcalim. Tandint ad tᵉttwaṭṭef u tudrin ad ttwakeccḍent u timɣarin ad ttwafeḍḥent u azyen n tendint ad ittwandeh ɣar lmenfa, maca min iqqimen n řgens war ggur ca ad ittwaqḍeɛ. ^■   3 SIDI ad iffeɣ u Netta ad imneɣ ak-d řegnus am mammec tuɣa ittmenɣa řebda deg wass n umenɣi. ^■  

4 Deg wass nni ad bedden iḍaren nnes x wedrar n Zzitun wenni qibač i Urcalim, ɣar ccarq. Adrar n Zzitun ad ittwafeǧeq di tnayen n iziynat, ɣar ccarq u ɣar řɣarb, maḥend ad din tiři ict n teɣzurt d tameqqrant. Azyen n wedrar ad imeyyeř ɣar ccamal u azyen nneɣni n wedrar ad imeyyeř ɣar ljanub. 5 Kenniw ad tarewřem zi hekkwu n idurar inu, maɣar taɣzurt n idurar ad dd-taweḍ ař Aṣal u kenniw ad tarewřem am mammec tarewřem kenniw zeg wenhezzi n temmurt deg wussan n Ɛuzziya, ajeǧid n Yahuda, uca SIDI, AREBBI inu, ad dd-yas u marra imqeddasen akidek. ^■  

6 Deg wass nni ggur ad imsar aqa war tᵉttiři tfawt, itran ittissiqen ad tᵉttwakemmcen. 7 Ad yiři d ijj n wass ittwafarz, ad yiři ittwassen ɣar SIDI. War iǧi d ass uřa d ǧiřet. Ad imsar ɣar řweqt n uɛecci ad tiři tfawt.” ^■  

8 Deg wass nni ad imsar aqa aman iddaren ad dd-ffɣen zi Urcalim, azyen zzaysen ɣar řebḥar acarqi u azyen nneɣni ɣar řebḥar n řɣarbi. Ammu i ɣa yiři deg unebdu u di tgarst. ^□  ■   9 SIDI ad yiři d ajeǧid x marra tammurt.

Deg wass nni ad yiři Netta d ayenni n SIDI u Isem nnes d ayenni n Yisem.

10 Marra tammurt ad tedweř am Řewḍa, zi Jabɛa ař Rimmun, ɣar jjihet n ljanub n Urcalim. Tandint ad tᵉttwasgeɛɛed u ad dayes zedɣen iwdan deg wemcan nnes, zi Tewwart n Binyamin ař amcan n Tewwart i din tuɣa zic, ař tawwart n Teɣmart, u zi lburj n Ḥananiyil ař tisarin n weḥray n ddiřect n ujeǧid.

11 Nitni ad dayes zedɣen u war tᵉttiři ɛad nneɛřet, minzi Urcalim ad izdeɣ di řaman.”

12 “Ta ad tiři d ticti i zi ɣa iwwet SIDI marra řegnus nni immenɣen ak-d Urcalim: Netta ad yarr arrimet n kuř bnadem ad ikkiccu am netta ɛad ibedd x iḍaren nnes u tiṭṭawin nnes ad kkiccwent deg ixubac nsen u iřes nnes ad ikkiccu deg uqemmum nnes. ^□  

13 Deg wass nni ggur ad imsar aqa ijj n umxarweḍ d ameqqran zi SIDI ad idweř jar asen ařami i ɣa iṭṭef kuř ijj afus n umqarreb nnes u xenni afus n kuř ijjen ad inneqřeb ḍidd i ufus n umqarreb nnes.

14 Ɛad ad imneɣ Yahuda di Urcalim uca ad ttwasmunen wagřa n marra řegnus i d as dd-innḍen: ureɣ d nnuqart d warruḍ aṭṭas s waṭṭas.

15 Ammu i ɣa tiři ɛawed tecti n uyis d usardun d weřɣem d yeɣyař d marra řmař nni iǧan di řɛeskarat, aqa ticti aya ad ten teřqef.”

16 “Ad imsar aqa marra inni iqqimen zi marra řegnus nni dd-yusin ɣar Urcalim, ad geɛɛden zeg useggʷas ař aseggʷas ḥima ad sejden i Ujeǧid, i SIDI n řɛeskarat, u ḥima ad ɛeyyden Řɛid n Iɛuccuten. ^■  

17 Ad imsar belli man wen zi řaǧat n temmurt war dd-ittgiɛɛid ca ɣar Urcalim ḥima ad isjed i ujeǧid, i SIDI n řɛeskarat, aqa war xas iweṭṭi ca wenẓar.

18 Mařa řaǧ n Miṣra war dd-igeɛɛed u war dd-tusi ca, xenni war xasen iccit wenẓar. Ta ad tiři d ticti i zi ɣa iřqef SIDI řegnus nni war din ittgiɛɛiden ca ḥima ad ɛeyyden ficta n Řɛid n Iɛuccuten.

19 Ta ggur ad tiři d ticti i ddnub n Miṣra uřa d ticti i marra řegnus, inni war din ittgeɛɛeden, ḥima ad ɛeyyden Řɛid n Iɛuccuten.”

20 “Deg wass nni ggur ad yiři x tnaqusin n yeysan ‘D AMQEDDAS i SIDI!’ Ttnajar di Taddart n SIDI ad iřin am ṭṭawyat i urucci zzat i uɛalṭar. 21 Marra ttnajar di Urcalim u di Yahuda ad iřin qeddsen i SIDI n řɛeskarat u marra inni i dd ɣa yasen ḥima ad qeddmen tiwhibin, ad zzaysent ksin u ad daysent ssnennen.

Deg wass nni war din ittiři uřa d ijj n Ukenɛani di Taddart n SIDI n řɛeskarat.” ^■