Aɛřam ɣar ikehhanen
2
1 “Řexxu, i kenniw teǧa tewṣiyyet-a, a ikehhanen. 2 Mařa kenniw war tesřim u war tt tkessim ɣar wuř, maḥend ad tcennɛem Isem inu, iqqar SIDI n řɛeskarat, xenni necc ad ssekkeɣ nneɛřet jar awem u ad neɛřeɣ lbarakat nwem, wah aqa neɛřeɣ ten řexxu, minzi kenniw war tt tkessim ɣar wuř. ■ 3 Xzar, Necc ad kenniw ɛaqbeɣ di zzariɛet u ad zuzzareɣ amessař x iɣembab nwem, amessař n řeɛyudat nwem, u s man aya ad kenniw awyen ssenni. 4 Xenni ad tessnem kenniw, aqa d Necc i ɣarwem dd-issekken tawṣeyyet-a, ḥima ad tiři d Řɛahd inu ak-d Lawi, iqqar SIDI n řɛeskarat. 5 Řɛahd inu akides tuɣa d tudart u d řehna. Necc wciɣ as ten ařami i ɣa iggʷed netta u netta tuɣa itteggʷed zzayi u ittenexřaɛ zeg Yisem inu. 6 Ccariɛa n tidett tuɣa-tt deg uqemmum nnes u war ittwaf min war iseggden x iyencicen nnes. Netta yuyur akidi di řehna u di řeṣfayet u yarra aṭṭas tuben zi řmuɛṣiyyet nsen. 7 Maɣar aqa ittxeṣṣa iyencicen n ukehhan ad ḥḍan tussna u zeg uqemmum nnes tᵉttwarezzu Ccariɛa, maɣar netta d amsekki n SIDI n řɛeskarat. 8 Kenniw maca tḥeyydem x webrid, tessenqarḍem aṭṭas zi tɣuri n Ccariɛa, tareddǧem Řɛahd n Lawi, iqqar SIDI n řɛeskarat. 9 Uřa d Necc arriɣ kenniw tᵉttwaɛiffem u war teǧim zzat i marra řgens, minzi kenniw war teḥḍim ibriden inu u tᵉtteggem s wudmawen di tmesřact n useřmed n Ccariɛa.”
SIDI icarreh aǧaf
10 “Ma neccin war ɣarneɣ marra mɣir ijj n Baba? Ma war d aneɣ dd-ixřeq mɣir ijj n Arebbi? Mayemmi xenni neccin nɣeddar ijj wenneɣni, ařami nessefsad Řɛahd n řejdud nneɣ?
11 Yahuda aqa iɣdar, tᵉttwagg ict n jjɛifect di Israil u di Urcalim, maɣar Yahuda issɛiǧet min iqeddsen n SIDI i ittexs Netta, maɣar Yahuda imřec yeǧis n ijj n arebbi d aɣrib. □
12 SIDI ad iteḥḥa marra wi itteggen man aya zeg iqiḍan n Yaɛqub, wi ittřaɣan d wenni dd ittarran, ɛad uřa d wenni ittwehhben tawhibt n řɣiǧet i SIDI n řɛeskarat. □
13 Tamesřact wiss tnayen i tᵉtteggem, aqa kenniw teddařem aɛalṭar n SIDI s imeṭṭawen, s tɣuyyit u s sqinfet, minzi war din teǧi ɛad teynit zzayes i tewhibt n řɣiǧet u war tᵉttwaqebbeř ɛad zzayes s arḍa zeg ufus nwem.
14 Kenniw teqqarem: ‘Mayemmi?’ Minzi SIDI tuɣa d ccahed jar cek d temɣart n temẓi nnek tenni teɣdared cek, waxxa nettat d taɛcirt nnek uřa d tamɣart n řɛahd nnek.
15 Uřa d ijjen zeg wenni ɣar iǧa ɛad buḥbeř, war iggi man aya! U min tuɣa igga wanita? Netta tuɣa yarezzu zzariɛet n AREBBI! S uya, ḥḍam x buḥbeř nwem u ejj i-t war iɣeddar tamɣart n ṭemzi nnek.
16 Maɣar: ‘Netta icarh, issekk’, iqqar SIDI, AREBBI n Israil, ‘Netta iddař řɣecc s warruḍ nnes’, inna SIDI n řɛeskarat. S uya ḥḍam x buḥbeř nwem, war tɣeddarem ca!
17 Kenniw tessahařem SIDI s wawařen nwem. Kenniw teqqarem: ‘Min zi t nessahař neccin?’ Maɣar kenniw teqqarem: ‘Qaɛ wenni itteggen řɣar, iṣbeḥ di tiṭṭawin n SIDI u nitni usin as-dd x řxaḍar!’, niɣ: ‘Mani iǧa AREBBI n řḥukm?’ ”