1 Xzar, Necc ad ssekkeɣ areqqas inu inu, wenni i ɣa isswejden abrid zzat i wudem inu. Deɣya ad dd-yas ɣar Zzawect Tameqqrant nnes, Sidi, wenni tarezzum kenniw, Lmalak n Řɛahd, wenni d awem dd-ittasen x řxaḍar nwem. Xzar, netta ad dd-yas, inna SIDI n řɛeskarat. ^■   2 Maca man wen i ɣa yarbun ass n twasit nnes u man wen i ɣa iqqimen ibedd, xmi i dd ɣa iban Netta? Maɣar Netta am tmessi n usefsay u am llixiyya n iɣessařen. 3 Netta ad iqqim, am wenni issefsiyyen u ittṣeffan nnuqart. Netta ad issizdig iḥenjiren n Lawi u ad ten iṣeffa am wureɣ u am nnuqart u nitni ad wehhben ict n tewhibt n řɣiǧet di tsegda.

4 Xenni ad dd-tas tewhibt n řɣiǧet n Yahuda d Urcalim x řxaḍar n SIDI am deg wussan n zic, am deg iseggʷusa iɛdun. 5 Necc ad kenniw adseɣ, ḥima ad xawem ḥekmeɣ u ad cehdeɣ s tazřa x iseḥḥaren d imzennayen u x yenni ittjaǧan ẓur u x yenni iḥeṣṣaren řmunet n ucewwař, u x yenni iḥeṣṣaren tajjač d uyujiř u war zzayi tteggʷeden ca, iqqar SIDI n řɛeskarat. ^■  

6 Maɣar necc, SIDI, war beddřeɣ ca u kenniw, ayt n Yaɛqub, war tefnam. ^■   7 Zeg wussan n babatwem, kenniw tḥeyydem x tweṣṣa inu u kenniw war tent teḥḍim ca. Dewřem-dd ɣari, xenni ad dd ɣarwem dewřeɣ Necc, iqqar SIDI n řɛeskarat. Maca kenniw teqqarem: ‘S min zi i dd ɣa nedweř?’ ^■  

8 Ma izemmar bnadem ad yacar AREBBI? Aqa kenniw tᵉttacarem ayi u teqqarem: ‘S min zi cek nettacar ?’ Zi řeɛcur d tewhibt n usgeɛɛed! 9 Kenniw tᵉttwaneɛřem s yict n nneɛřet, minzi kenniw tᵉttacarem ayi, wah řgens marra.

10 Awyem-dd marra řeɛcur deg wexxam n řexzen, maḥend ad tiři macca di Taddart inu u qeǧbem ayi zzayes, iqqar SIDI n řɛeskarat, ma Necc xenni war d awem arezzmeɣ tiburjatin n ujenna u ad xawem zeǧɛeɣ lbaraka, ař din ɣa yiři ktar zi min ittwaḥdajen.

11 Aburxes ad t ssiggʷedeɣ di ṭṭweɛ nwem, maḥend netta war ittjeyyeḥ ṣṣabet n wudem n temmurt nwem u maḥend tazayart deg weḥwic war tᵉttawi řɣiǧet i war yiwiḍen, inna SIDI n řɛeskarat.

12 Marra řegnus ad inin: ‘D amimun i kenniw!’, maɣar kenniw ad tiřim d ict n temmurt yarḍan, iqqar SIDI n řɛeskarat.

13 Awařen nwem dewřen qesḥen xafi aṭṭas, iqqar SIDI n řɛeskarat. Kenniw teqqarem: ‘Min i xak neqqar neccin ?’ ^■  

14 Kenniw teqqarem: ‘Aqa baṭeř i nettsexxar i AREBBI, maɣar man řefḍeř i zi neḥḍa tasexxart nnes u aqa nuyur deg werruḍ abarcan zzat i wudem n SIDI n řɛeskarat?

15 Xenni řexxu, nḥesseb ayt nnfaxet d amimun. Ɛad inni itteggen taɛeffant, ttwabennan. Nitni ttjarraben ɛad AREBBI, waxxa amenni nejjmen.’

16 Xenni inni itteggʷeden SIDI mmsawařan ammu: ‘SIDI ittarra taynit u ittesřa u ad ittwari wedlis n řidaret zzat i wudem nnes, di ṭṭweɛ n yinni itteggʷeden SIDI u ttidaren Isem nnes.’

17 Nitni ad iřin d řmuřk i Necc, iqqar SIDI n řɛeskarat, deg wass i ɣa ggeɣ u Necc ad ten ssɛizzeɣ, am issɛizz ijj n weryaz mmis nni i d as ittsexxaren.

18 Xenni kenniw ad tẓarem ɛawed řfarq jar umsegged d wenni itteggen tuɛeffna, jar wenni ittsexxaren i AREBBI d wenni i war d as ittsexxaren.

19 Maɣar xzar, ass nni ad dd-yas, yareqq am tefqunt. Xenni marra ayt n nnfaxet d iɛeffanen ad iřin am uřum uca ass i dd ɣa yasen ad ten issareɣ, iqqar SIDI n řɛeskarat. Ass nni war ittejji weẓwar uřa d taseṭṭa. 20 I kenniw maca, inni itteggʷeden Isem inu, ad dd-tenqar tfuct n tsegda u ad yiři ugenfu sadu wafriwen nnes u kenniw ad teffɣem u ad teggem ineggizen n řefraḥet am iyenduzen i dd-yusin zi řkuri. ^□   21 Kenniw ad tɛefsem x iɛeffanen, minzi nitni ad dewřen d iɣɣeḍ sadu tisi n iḍaren nwem, deg wass nni i ɣa ggeɣ Necc, iqqar SIDI n řɛeskarat.

22 Xemmem ɣar Ccariɛa n Musa, amsexxar inu, tenni i d as umureɣ deg wedrar n Hurib x marra Israil, tiweṣṣa d lfarayiḍ.^■  

23 Xzar, Necc ad awem dd-ssekkeɣ anabi Iliya, qbeř ma dd ɣa yas ass ameqqran d issiggʷiden n SIDI. ^■   24 Netta ad yarr uř n ibabaten ɣar iḥenjiren nsen d wuř n iḥenjiren ɣar babatsen, maḥend necc war dd- ttiseɣ u ad wteɣ tammurt ad tt harrmeɣ i řḥukm.”