1 Řami dd-qarrben ɣar Urcalim, iwḍen ɣar Bayt-Faji, ɣar uɣezdis n wedrar n Zzitun, issekk Yeccu tnayen n imeḥḍaren nnes, inna asen: ^■   2 “Ruḥem ɣar dcar nni qibač nwem. Deɣya ad tafem ict n teɣyuč teqqen d ijj n wesnus akides. Fesyem asen, tawyem ten-dd ɣari. 3 Mařa inna awem ḥed ca, arrem xas ammu: ‘Aqa Siditneɣ iḥdaj i-ten. Netta ad ten dd-yarr deɣya.’ ” 4 Man aya qaɛ imsar ḥima ad ittwakemmeř marra min ittwannan zeg unabi am inna:

5 “Inim i yeǧis n Ṣihyun:

‘Xzar, Ajeǧid nnem ad ɣarem dd-yas s uwaḍeɛ,

yenya x weɣyuř d wesnus,

aqa d mmis n teɣyuč.” ^■  

6 Ruḥen imeḥḍaren uca ggin am mammec ten yumur Yeccu, 7 iwyen-dd aɣyuř d wesnus, sarsen arruḍ nsen x wesnus uca ssenyen Yeccu xas. ^■   8 Ijj n řɣaci d ameqqran aṭṭas ssun arruḍ nsen deg webrid u inneɣni qessen řefruɛ zi tcejjura, ssun ten deg webrid. 9 Uca abarru n řɣaci nni d as izwaren d yenni i-t-i-dd iḍfaren, tuɣa sɣuyyun, nnan:

“Uṣanna i Mmis n Dawud!

D amimun wenni i dd-yusin s Yisem n SIDI.

Uṣanna, di řuɛřa x řuɛřa n ujenna.” ^■  

10 Řami yudef ɣar Urcalim, thaj tendint qaɛ, iwdan nnan: “Min iɛna Wa?”

11 Řɣaci inna: “D Wa d Anabi Yeccu zi Nnaṣira di Ljalil.”

12 Yudef Yeccu ɣar Zzawect Iqeddsen n AREBBI, issuffeɣ marra inni izznuzan d yenni issaɣen di Zzawect Tameqqrant uca iqřeb ṭṭwabeř n iṣarrafen n tenɛacin d řekrasi n yinni izznuzan idbiren. ^■  

13 Inna asen: “Aqa tura: ‘Taddart inu ad tᵉttwasemma ‘Taddart n tẓaǧit’, maca kenniw tarrim tt d ifri n iceffaren.’ ” ^■  

14 Iwyen-dd ɣares di Zzawect Tameqqrant idarɣařen d ineɛḍaben uca issgenfa ten.

15 Umi ẓrin imeqqranen n ikehhanen d imseřmaden n idlisen lmuɛjizat i yegga u aqa iḥenjiren ttřaɣan di Zzawect Tameqqrant, qqaren: “Uṣanna i mmis n Dawud”, xeyyqen aṭṭas, ^■  

16 nnan as: “Ma tesřid min qqaren yina?” Inna asen Yeccu: “Wah, ma war teɣrim ɛemmarṣ: ‘Zeg iqemmumen n iḥenjiren d iseyman tesswejded Cek ttesbiḥ!’?” ^■  

17 Řexdenni ismeḥ daysen, iffeɣ ɣar barra i tendint ɣar Bayt-Ɛanya, insa din.

18 Ɣar ṣṣbeḥ zic řami dd-idweř ɣar tendint, tuɣa dayes řaẓ. ^■  

19 Iẓra ijj n wartu x webrid, iruḥ ɣares, war dayes yufi mɣir tifray waha. Xenni inna i wartu: “War zzayek tteffeɣ řɣiǧet ɛemmarṣ.” Řexdenni yuẓeɣ wartu deɣya. 20 Umi ẓrin imeḥḍaren man aya, tbehten, nnan: “Mammec igga wartu yuẓeɣ deɣya?” 21 Yeccu yarra-dd, inna asen: “S tidett Necc ad awem iniɣ: Mařa daywem l’iman u war tcekkim ca, aqa war tᵉtteggem min imsaren i wartu waha, maca ɛawed mařa tennam i wedrar-a: ‘Meksi, menḍar di řebḥar!’, ad yiři. ^■   22 D qaɛ min ɣa tᵉttarem di tẓaǧit s l’iman, ad t tafem.” ^■  

23 Řami yudef ɣar Zzawect Tameqqrant, usin-dd ɣares imeqqranen n ikehhanen d imɣaren n řgens am tuɣa isseřmad, nnan: “S man ṣṣulṭa i teggid timesřayin-a? Wi d ac iwcin ṣṣulṭa-ya?” ^■   24 Yeccu yarra-dd, inna asen “Uřa d Necc ad kenniw sseqsiɣ ijj n useqsi u mařa tarrim-dd xafi uřa d Necc ad awem dd-iniɣ s man ṣṣulṭa i tteggeɣ timesřayin-a. 25 Aseɣḍaṣ n Yuḥanna, manis netta? Zeg ujenna niɣ zeg iwdan?” Mcawaren nitni jar asen, nnan: “Mařa nenna: ‘Zeg ujenna!’, ad aneɣ ini: ‘Mayemmi war zzayes tuminem?’, 26 u mařa nenna: ‘Zeg iwdan?’, xenni dayneɣ tiggʷudi zi řɣaci, minzi marra ḥessben Yuḥanna d anabi.” ^■   27 Uca nitni arrin-dd x Yeccu, nnan: “War nessin.” Inna asen Netta: “Xenni uřa d Necc war d awem qqareɣ s man ṣṣulṭa i tteggeɣ man aya.”

28 “Min d awem ittɣiř kenniw? Ijj n weryaz tuɣa ɣares tnayen n iḥenjiren. Iřaɣa x umezwaru, inna: ‘A mmi, uyur, ass-a ad txedmed deg umarjuɛ inu n uḍiř!’ 29 Maca netta yarra-dd, inna: ‘Necc war xseɣ ca!’, maca awarni man aya indem uca iruḥ din. 30 Uca yusa-dd ɣar wenni wiss tnayen, inna as amenni beɛda. Wanita yarra-dd xas: ‘Ad raḥeɣ, a sidi!’, maca war iruḥ ca! 31 Man wen zzaysen i iggin řxaḍar i babas?” Nitni arrin-dd xas: “Wenni amezwaru.” Yeccu inna asen: “S tidett, Necc ad awem iniɣ, ayt n ḍḍariba d temɣarin n farq-ccɣeř ad awem izwaren ɣar Tgeldit n AREBBI. 32 Minzi Yuḥanna yusa-dd ɣarwem deg webrid n tsegda, kenniw war zzayes tuminem, maca ayt n ḍḍariba d temɣarin n farq-ccɣeř aqa nitni umnen zzayes. Maca řami teẓrim man aya, war tᵉtubem ca ɣar uneggaru maḥend ad zzayes tamnem.” ^■  

33 “Sřem ɛawed i yijj n umedya nneɣni. Tuɣa din ijj n weryaz, bab n taddart, igga ijj n umarjuɛ n uḍiř, iẓẓu dayes tizayarin. Netta iquwwar as-dd s yijj n wefray, iɣza dayes tasirt n uḍiř, uca ibna dayes ict n ṣṣumɛet. Xenni yarhen amarjeɛ nni n uḍiř i ca n ixemmasen uca isafar. ^■   34 Umi dd-tiweḍ řweqt n ṣṣabet n řɣiǧet, issekk imsexxaren nnes ɣar ixemmasen nni ḥima ad dd-awyen řɣiǧet nnes. 35 Ixemmasen ṭṭfen imsexxaren nnes, wtin ijjen, nɣin nneɣni uca arejmen ɛawed ijjen i nneɣni. ^■   36 Ɛawed issekk imsexxaren nneɣni, ktar zeg umezwaru, uca ggin daysen ɛawed amenni. 37 Ɣar uneggar issekk asen-dd mmis, inna: ‘Ad weqqaren mmi’. 38 Maca řami ẓrin ixemmasen mmis, nnan jar asen: ‘Aqa d awrit, zidem, ad t neneɣ, ad as nekkes řwart i neccin.’ ^■   39 Ṭṭfen t, nḍaren t barra i umarjuɛ n uḍiř uca nɣin t. 40 Mařa yusa-dd bab n umarjuɛ nni, min ɣa yegg deg ixemmasen nni?” 41 Nnan as: “Ad yareddeǧ iɛeffanen nni qaɛ, uca ad iwc amarjuɛ n uḍiř i ixemmasen nneɣni inni d as i ɣa iwcen řɣiǧet di řweqt nnes.” 42 Yeccu inna asen: “Ma war teɣrim ɛemmarṣ deg idlisen:

‘Aẓru i iɛiffen ibennayen,

aqa idweř d aẓru azeǧif n teɣmart.

Man aya ittwagg zi SIDI,

aqa-tt d ict n řḥajjet tesstebhet tiṭṭawin nneɣ.’ ^■  

43 S uyenni ad awem iniɣ, belli Tageldit n AREBBI ad awem tᵉttwakkes uca ad temmewc i yijj n řgens i ɣa iwcen řɣiǧet nnes. ^■   44 Wi i ɣa iwḍan x weẓru aya, ad ittwařbez u wi xef i ɣa iwḍa, ad t iřbez.” ^■  

45 Řami sřin imeqqranen n ikehhanen d Ifarisiyyen imedya nnes, fehmen belli issawař xasen. ^■   46 Arezzun ad t ṭṭfen, maca ggʷeden zi řɣaci minzi řɣaci tuɣa iḥesseb i-t d ijj n unabi. ^■