1 “Minzi Tageldit n ijenwan amecnaw bab n taddart, iffeɣ ɣar ṣṣbeḥ zic ḥima ad icra ixemmasen i umarjuɛ nnes n uḍiř. 2 Řami ikkes awař ak-d icewwařen s yijjen dinar i yijjen wass, issekk i-ten ɣar umarjuɛ nnes n uḍiř. ^□   3 Řami dd-iffeɣ netta ɛawed di jjwayeh n tsaɛɛet wiss třata, ixs ad yini ɣar tesɛa di ṣṣbeḥ, iẓra inneɣni bedden di řmewqef břa řxedmet. 4 Netta inna asen: ‘Ruḥem uřa d kenniw ɣar umarjuɛ inu n uḍiř, ad awem wceɣ min d awem dd-ikkaren.’ Uca ruḥen. 5 Iffeɣ-dd ɛawed di jjwayeh n tsaɛɛet wiss setta d wiss tesɛa, uca igga amenni ɛawed. 6 Řami dd-iffeɣ di jjwayeh n tsaɛɛet wiss hiṭɛac, ixs ad yini ɣar xemsa n tmeddit, yufa din ɛawed inneɣni bedden din břa řxedmet, inna asen: ‘Mayemmi tbeddem da ass ikmeř břa řxedmet?’ 7 Nnan as: ‘Minzi war d aneɣ icri ḥed.’ Inna asen: ‘Ruḥem uřa d kenniw ɣar umarjuɛ inu n uḍiř, ad tᵉṭṭfem min d awem dd-ikkaren.’ 8 Řami dd-tiweḍ tmeddit, inna bab n umarjuɛ n uḍiř i uweqqaf nnes: ‘Řaɣa-dd x ixemmasen, xeǧeṣ asen řmunet, sizwar zeg inni dd-yusin d ineggura uca ammu ař imezwura.’ 9 Uca usin-dd inni d icra di jjwayeh n tsaɛɛet wiss ḥiṭac, uca kuř ijjen zzaysen iṭṭef ijjen dinar.

10 Řami dd-usin inni tuɣa d imezwura, ittɣiř asen ad ṭṭfen ktar, maca uřa d nitni ṭṭfen i kuř ijjen zzaysen ijj n dinar.

11 Řami t ṭṭfen, aqa xeyyqen x bab n taddart,

12 nnan: ‘Aqa ina d inni d ineggura xedmen ict n tsaɛɛet u cek tessemquded i-ten akidneɣ, neccin inni yarebbun ddqeř n wass d řeḥmu.’

13 Maca netta yarra-dd x ijjen zzaysen, inna: ‘A ameddukkeř inu, necc war cek ḍřimeɣ, ma war kidi tekkised awař x ijj n dinar?

14 Ṭṭef min iǧan nnek uca uyur. Necc xseɣ ad wceɣ i ina d inni d ineggura anect min d ac wciɣ.

15 Niɣ ma war ɣari bu řḥeqq maḥend ad ggeɣ min xseɣ ak-d min iǧan inu? Niɣ tiṭṭ nnek d taɛeffant, minzi necc d aṣebḥan?’

16 Ammu i ɣa dewřen ineggura d imezwura, uca imezwura ad dewřen d ineggura, minzi aṭṭas inni ittwařaɣan, maca drus inni ittwafarzen.” ^■  

17 Řami tuɣa Yeccu issewjed maḥend ad igeɛɛed ɣar Urcalim, yiwi tenɛac n imeḥḍaren nnes ɣar uɣezdis deg webrid, inna asen: ^■  

18 “Xzar, ad ngeɛɛed ɣar Urcalim, uca ad immewc Mmis n bnadem deg ifassen n imeqqranen n ikehhanen d imseřmaden n idlisen, u nitni ad xas ḥekmen s řmewt.

19 Ad t sellmen i řegnus maḥend ad zzayes stehzan, ad t hettken s urekkuḍ uca ad t ṣellben, xenni deg wass wiss třata ad dd-ikkar.” ^■  

20 Řexdenni tusa-dd ɣares yemmas n tarwa n Zabdi ak-d iḥenjiren nnes, tesjed as ḥima ad zzayes tᵉttar ca n řḥajjet. ^■   21 Inna as Netta: “Min texsed?” Tenna as nettat: “Ini maḥend ad qqimen tnayen n iḥenjiren-a inu, ijjen ɣar ufusi nnek u wenneɣni ɣar uzeřmaḍ nnek, di Tgeldit nnek.” 22 Yeccu yarra-dd xasen, inna: “Kenniw war tessinem ca min tᵉttarem. Ma tzemmarem ad teswem řkas i ɣa sweɣ Necc niɣ ad tᵉttwasɣeḍṣem s useɣḍeṣ i zi ɣa ttwasɣeḍṣeɣ Necc?” Nnan as: “Nzemmar!” ^■   23 Netta inna asen: “Řkas inu ad t teswem u aseɣḍeṣ i zi ɣa ttwasɣeḍṣeɣ, ad zzayes tᵉttwasɣeḍṣem, maca aɣimi ɣar ufusi inu d uzeřmaḍ inu war iǧi i Necc maḥend ad t wceɣ, maca ad yiři i yenni umi t issewjed Baba.” ^■  

24 Řami sřin ɛecra n imeḥḍaren nneɣni man aya, xeyyqen aṭṭas x tnayen n wawmaten. 25 Maca Yeccu iřaɣa-dd xasen ɣares, inna: “Kenniw aqa tessnem belli řḥukkam n řegnus ḥekkmen xasen uca uřa d imeqqranen ttṣellaṭen xasen. ^■   26 War ittiři ammu jar awem, maca s řmeqřub: wenni ixsen ad yiři d ameqqran jar awem, ad yiři d amsexxar nwem, ^■   27 u wenni ixsen ad yiři d amezwaru jar awem, ejj i-t ad yiři d amsexxar nwem, ^■   28 am mammec Mmis n bnadem war dd-yusi ḥima ad xas sexxaren, maca ḥima ad xasen isexxar uca ad iwc tudart nnes d aṣřaḥ i waṭṭas n yewdan.” ^■  

29 Řami dd-ffɣen zi Ariḥa, iḍfar i-t-i-dd aṭṭas n řɣaci. ^■   30 Xzar, aqa din tnayen n idarɣařen qqimen x ṭṭarf n webrid, řami sřin belli Yeccu ad iɛdu, řaɣan, nnan: “A Sidi, mmis n Dawud, arḥem aneɣ!” 31 Maca řɣaci iziyyar xasen ḥima ad sqaren. Maca nitni sɣuyyen s jjehd ktar, nnan: “Arḥem aneɣ, a Siditneɣ, Mmis n Dawud!” 32 Xenni ibedd Yeccu, iřaɣa-dd xasen, inna: “Min texsem ad awem ggeɣ?” 33 Nnan as nitni: “A Siditneɣ, mařa texsed ad ttwarezment tiṭṭawin nneɣ.” 34 Yeccu iḥinn xasen, xenni iḥada tiṭṭawin nsen, řexdenni dewřent tiṭṭawin nsen ttwařant.