1 Deg wass nni iffeɣ Yeccu zi taddart, iruḥ iqqim x tma n řebḥar. ^■   2 Imun-dd xas ijj n uhimur n řɣaci, ařami yenya di tɣarrabut, iqqim dayes uca řɣaci marra bedden x tma. ^■   3 Issiweř akidsen x waṭṭas n tmesřayin s imedya, inna: “Xzar, afeǧaḥ iffeɣ ḥima ad izarɛ. 4 Am tuɣa izarreɛ, tewḍa ca n zzariɛet x tma n webrid, xeccen-dd ijḍaḍ, neqben tt. 5 Tewḍa ca nneɣni x temmurt n weẓru mani tuɣa war iǧi ucař aṭṭas. Deɣya teɣmi-dd s minzi tammurt war tuǧiɣ. 6 Umi dd-tenqar tfuct, icmeḍ uɣemmuy, uca isřaw minzi war ɣares tuɣi bu weẓwar. 7 Ca nneɣni tewḍa x isennanen. Mɣaren isennanen, jiyyfen tt. 8 Ca nneɣni tewḍa x temmurt taṣebḥant, tiwi-dd řɣiǧet, ca mya, ca nneɣni settin, ca nneɣni třatin n tseqqar. 9 Wenni ɣar iǧa imezzuɣen i useǧi, ejj i-t ad iseř.”

10 Xas uca usin-dd ɣares imeḥḍaren nnes, nnan as: “Mayemmi akidsen tessawařed s imedya?” ^■  

11 Netta yarra-dd, inna asen: “Minzi immewc awem ad tessnem ssirr n Tgeldit n ijenwan, nitni maca war d asen t immewc ca. ^■  

12 Minzi wenni ɣar iǧa ad as immewc uca ad ɣares yiři s waṭṭas, maca wenni war ɣar iǧi ca ad zzayes ittwakkes uřa d min ɣares. ^■  

13 S uyenni ssawařeɣ akidsen s imedya, minzi nitni ttwařan am war ttwiřin, u ttesřan am war ttesřin war fehhmen.

14 Daysen i ɣa ikemmeř wawař n Icaɛya, iqqar: ‘S useǧi ad sřen, maca war fehhmen, s tmuɣři ad tẓarem, war tfettnem ca, ^■  

15 maɣar uř n řgens-a aqa iqbubbez, imezzuɣen nsen ḍeqřen deg useǧi u nitni aqa qqnen tiṭṭawin nsen, maḥend war ttwiřin s tiṭṭawin nsen, ad sřen s imezzuɣen nsen, ad fehmen s wuř nsen ḥima ad tuben uca Necc ad ten ssgenfiɣ.’ ^■  

16 Maca sseɛd n tiṭṭawin nwem umi ttwařant, sseɛd n imezzuɣen nwem umi ttesřan! ^■  

17 S tidett Necc ad awem iniɣ, aṭṭas n inabiyyen d imseggaden tuɣa xsen ad ẓaren min teẓrim, maca war t ẓrin, xsen ad sřen min tesřim, war t sřin.” ^■  

18 “Xenni kenniw, sřem i umedya n wenni izarrɛen. ^■  

19 Kuř ijjen wenni ittesřan i Wawař n Tgeldit uca war t ifhim, ad ɣares dd-yas umɛeffan, ad ixḍef min ittwazarɛen deg wuř nnes. Aqa d man aya min ittwazarɛen x tma n webrid. ^■   20 Min ittwazarɛen di temmurt n weẓru, aqa wa d wenni i ɣa iseǧen awař, ad t iqbeř deɣya s řefraḥet, 21 maca war d as iwti ca weẓwar deg ixef nnes, ad iqqim drus waha. Xmi dd ɣa tas řeḥṣaret niɣ amarret di ṭṭweɛ n wawař ad innedref deɣya. 22 Min ittwazarɛen jar isennanen aqa wa d wenni ittesřan awař, maca amnus n řweqt-a d uɣekkwi n wagřa ad jiyyfen Awař uca netta war dd-ittiwi ca řɣiǧet. ^■   23 Min ittwazarɛen di temmurt taṣebḥant aqa wa d wenni ittesřan awař uca ad t ifhem, ad dd-yawi xenni řɣiǧet: ijjen ad yařu mya n tseqqar, wenneɣni settin uca wenneɣni třatin.”

24 Iwca asen ijj n umedya nneɣni, inna: “Tageldit n ijenwan amecnaw ijj n bnadem tuɣa izarreɛ zzariɛet taṣebḥant deg iyyar nnes. 25 Ařami tuɣa iwdan ṭṭṣen, yusa-dd řeɛdu nnes, izarɛ řḥayyar di řwest n yirden uca yuyur. 26 Ařami dd-imɣar uɣemmuy uca yiwi-dd řɣiǧet, řexdenni iḍhar-dd řḥayyar tanya. 27 Xenni usin-dd imsexxaren n bab n taddart, nnan as: ‘A Siditneɣ, ma war tzarɛed ca zzariɛet taṣebḥant deg iyyar nnek? Manis i dd-yusa řḥayyar-a?’ 28 Inna asen: ‘Aqa řeɛdu igga man aya’. Nnan as imsexxaren: ‘Ma texsed ad nraḥ, ad t neyru?’ 29 Maca netta inna: ‘Lla, ḥima xmi i ɣa tyarrwem řḥayyar war kis tqeǧɛem uřa d irden. 30 Ejj i-ten ad mɣaren s tnayen ař tameyra. Di řweqt n tmeyra ad iniɣ i icuwwaren: ‘Yarwem amezwar řḥayyar, ceddem t di tqebbiṭin ḥima ad ittwasecmeḍ, maca irden, yarwem t di řmarsi inu.’ ” ^■  

31 Iwca asen ɛawed ijj n umedya nneɣni, inna: “Tageldit n ijenwan amecnaw ict n tḥebbuct n zzariɛet n uxerdel, yiwyi tt-i-dd ijj n weryaz, izarɛ i-tt deg iyyar nnes. ^■   32 Waxxa nettat d tameẓyant qaɛ zi marra zzariɛet nneɣni, xmi tmeqqar, tᵉddekkwař d tameqqrant zi marra tibbi uca tdekkwař d tacejjart maḥend ad ɣares dd-asen yijḍaḍ n ujenna uca ad ggen řeɛwacc nsen x řefruɛ nnes.” ^□  

33 Iwca asen ɛawed ijj n umedya nneɣni, inna: “Tageldit n ijenwan amecnaw antun, tiwyi t-i-dd ict n temɣart uca tessnuffar i-t di třata n řemdud n waren, ařami issmemm warecti qaɛ.” ^■  

34 Man aya issiweř zzayes Yeccu i řɣaci s imettiřen uca břa amedya war kisen issiweř ca, ^■   35 ḥima ad ittwakemmeř min xef issiweř unabi i innan: “Ad arezmeɣ aqemmum inu s imedya, ad barrḥeɣ s min innufaren zeg wami ittwagg dsas n ddunect.” ^■  

36 Řami ismeḥ Yeccu i řɣaci ad uyuren, iruḥ ɣar taddart. Usin-dd ɣares imeḥḍaren nnes, qqaren: “Ini aneɣ min ixs ad yini umedya n řḥayyar deg iyyar!” 37 Yarra-dd xasen: “Wenni izarrɛen zzariɛet taṣebḥant netta d Mmis n bnadem. 38 Iyyar d ddunect uca zzariɛet taṣebḥant nettat d tarwa n Tgeldit uca řḥayyar netta d tarwa n umɛeffan. 39 Řeɛdu wenni t izarɛen, aqa netta d cciṭan, uca ṣṣabet, aqa nettat d qeṭṭu n ddunect u icewwařen nitni d lmalakat. ^■   40 Amecnaw mammec ssmunen řḥayyar uca sscemḍen t s tmessi, ammu i ɣa yiři ɣar qeṭṭu n ddunect-a. 41 Mmis n bnadem ad dd-issekk lmalakat nnes, ad ssḥeyydent zi Tgeldit nnes qaɛ tiɛenkřifin d marra iɛeffanen. 42 Ad ten nḍaren di řkuccet n tmessi mani i ɣa yiřin imeṭṭawen d uɣezzi n teɣmas. ^■   43 Řexdenni imseggaden ad arɣen am tfuct di Tgeldit n Babatsen. Wenni ɣar iǧa imezzuɣen i useǧi ad iseř.” ^■  

44 “Tageldit n ijenwan ɛawed amecnaw ijj n řkenz ittwasnuffaren deg iyyar, yufa i-t ijj n weryaz, issnuffar i-t uca di řefraḥet nnes yuyur, izzenz qaɛ min iǧan ɣares uca isɣa iyyar nni.” ^■  

45 “Tageldit n ijenwan ɛawed amecnaw ijj n usebbab i yarezzun tiyaqutin tiṣebḥanin. 46 Řami yufa ict n tyaqut tiɣřa aṭṭas, yuyur, izzenz marra min tuɣa ɣares, xenni isɣa i-tt.”

47 “Tageldit n ijenwan ɛawed amecnaw tracca immenḍaren di řebḥar ad teyru ɛřam kuř asřem. 48 Xmi i ɣa teccur, ad tt-i-dd-ssuffɣen ibeḥriyyen ɣar tma n řebḥar, uca ad qqimen, ad zzayes farzen min iṣebḥen di tsuǧatin nsen, maca ad nḍaren min war iḥřin. 49 Ammu i ɣa tiři di qeṭṭu n ddunect. Ad dd-ffɣent lmalakat, ad farnent iɛeffanen zi řwest n imseggaden. 50 Ad ten nḍaren di řkuccet n tmessi mani i ɣa yiřin imeṭṭawen d uɣezzi n teɣmas.” ^■   51 Inna asen Yeccu: “Ma tfehmem i marra man aya?” Nnan as: “Wah, a Siditneɣ!” 52 Xenni inna asen: “S uyenni kuř amseřmad n idlisen wenni idweř d ameḥḍar n Tgeldit n ijenwan, aqa igga amecnaw ijj n bab n taddart issuffuɣ zi řkenz nnes min iǧan d jdid u min iǧan d aqdim.”

53 Awarni řami ikemmeř Yeccu imedya aya, yuyur ssenni. ^■   54 Řami dd-yusa ɣar temmurt nnes, ikkar isseřmad i-ten di temzida nsen ařami qqimen tbehten, nnan: “Manis d as dd-tekka tiɣit-a d řeɛjayeb-a? ^■   55 Ma war iǧi wa d mmis n unejjar? Ma war qqaren i yemmas Maryam, d aytmas ma war d asen qqaren Yaɛqub d Yusis d Cimɛun d Yahuda? ^■   56 Ma war ǧint yessmas qaɛ ɣarneɣ? Manis d as dd-ikka man aya marra?” 57 Uca nderfen zzayes. Maca Yeccu inna asen: “Anabi ɛemmarṣ war iǧi břa ccan, mɣir di tendint nnes u di taddart nnes.” ^■   58 Uca war iggi diha lmuɛjizat aṭṭas minzi nitni war uminen.