1 Di řweqt nni icuqq Yeccu deg iyyaren n imendi di ssebt. Tuɣa imeḥḍaren nnes ǧuẓen uca bdan ad řeqḍen tidrin, ccin zzaysent. ^■   2 Ařami ten ẓrin Ifarisiyyen, nnan as: “Xzar imeḥḍaren nnek tteggen min war iɛeddřen deg wass n ssebt!” ^■   3 Yarra-dd xasen: “Ma war teɣřim ca min igga Dawud umi iǧuẓ netta d yenni akides? 4 Mammec yudef di Taddart n AREBBI, icca aɣrum n wescan zi Ṭṭabřa n SIDI i war iḥeǧřen macca nnes i netta uřa i yenni akides, maca mɣir i ikehhanen waha. ^■   5 Niɣ war teɣrim ca deg wedlis ittwannḍen n Ccariɛa belli ikehhanen inni iǧan di Zzawect Tameqqrant di ssebt, xeṭṭan di tewṣiyyet n ssebt, waxxa amenni war xasen ibin řɛib? ^■   6 Necc ad awem iniɣ, wenni iǧan d ameqqran x Zzawect Tameqqrant, aqa-t danita! ^■   7 Mařa tuɣa tfehmen min ixs ad yini: ‘Necc xseɣ arreḥmet, war iǧi d taɣarṣt!’, xenni ad tiři war tᵉttḥasabem ca x imezdagen, ^■   8 minzi Mmis n bnadem d Bab n ssebt.” ^■  

9 Yeccu yuyur ssenni, yudef di temzida nsen. ^■  

10 Xzar, tuɣa din ijj n weryaz, afus nnes iqucceḥ. Sseqsan t maḥend ad as ggen taxceft, nnan: “Ma iɛeddeř asgenfi deg wass n ssebt?” ^■  

11 Inna asen: “Man bnadem i dinni jar awem wenni ɣar iǧa izmar i iwḍan di tesraft di ssebt, war t itteṭṭef ḥima ad t-i-dd issuffeɣ? ^■  

12 Mecḥař iɛdu bnadem x izmar! S uyenni iřiq ad ittwagg min iṣebḥen di ssebt.” ^■  

13 Řexdenni inna as i bnadem nni: “Swiẓẓeḍ afus nnek!” Isswiẓẓeḍ i-t, idweř iggenfa am wenneɣni.

14 Ifarisiyyen ffɣen-dd ɣar barra, mcawaren xas mammec i ɣa ggen ad t nɣen. ^■  

15 Maca Yeccu issen aya uca yuyur ssenni. Iḍfar i-t-i-dd ijj n řɣaci d ameqqran, issgenfa i-ten marra. ^■  

16 Yumur i-ten s jjehd maḥend war xas ssuffuɣen řexbar, ^■  

17 ḥima ad ittwakemmeř wawař i innan unabi Icaɛya:

18 “Xzar, Amsexxar inu, wenni zi farrḥeɣ,

Amɛizz inu, wenni di ufiɣ arḍa inu.

Ad xas ssarseɣ Arruḥ inu,

u Netta ad ibarreḥ s řḥukm i řegnus. ^■  

19 War ittemcubbuc, war isɣuyyu,

uřa d ijj war ittesři tmijja nnes deg ibriden.

20 Aɣanim yarẓen war ggur ad t yarẓ ɛad,

uřa d taftič idduxxunen, war tt issxessi

ař dd ɣa issuffeɣ řeḥkam ař arbeḥ.

21 uca ad ssitmen řegnus deg Yisem nnes.” ^■  

22 Řexdenni iwyen as-dd ijj n umeryaḥ, tuɣa-t d adarɣař d aynaw. Uca Netta issgenfa i-t, ařami wenni tuɣa iǧan d adarɣař d aynaw idweř issawař u ittwařa. ^■   23 Ittebhet řɣaci marra, nnan: “Ma Wanita war iǧi d mmis n Dawud?” ^■   24 Maca sřin Ifarisiyyen man aya, nnan: “Wanita issuffuɣ ccwaṭen mɣir s webrid n Bᵉɛalzabub, s ibřis, ameqqran n ccwaṭen.” ^□  ■   25 Maca Yeccu issen ixarriṣen nsen, inna asen: “Kuř tageldit ittemsebḍan x yixef nnes ad tᵉttwahellek u kuř tandint niɣ taddart ittemsebḍan x yixef nnes war tᵉttɣimi ca. 26 Mařa aqa-t d cciṭan issuffuɣ cciṭan, aqa netta ittemsebḍa x yixef nnes, xenni mammec i ɣa teqqim tgeldit nnes? 27 Mařa Necc ssuffuɣeɣ ccwaṭen s webrid n Bᵉɛalzabub, ixs ad yini ibřis, s min zi ten i ɣa ssuffɣen tarwa nwem? S uyenni nitni ad iřin d řquḍat xawem. 28 Maca mařa Necc ssuffuɣeɣ řaryaḥ iɛeffanen s Arruḥ n AREBBI, aqa tudes awem-dd Tgeldit n AREBBI. 29 Niɣ mammec izemmar ḥed ad yadef ɣar taddart n wenni ijehden maḥend ad ikecceḍ řeqcuɛ nnes, mařa war icarf wenni ijehden amezwaru? Awarni as izemmar ad ikecceḍ taddart nnes. 30 Wenni war iǧin akidi, aqa-t ḍidd inu, wenni war kidi issmunan, aqa ittzeǧaɛ. 31 S uyenni ad awem iniɣ: marra ddnub d uceqqef ad ittwaɣfar i iwdan, maca aceqqef di Arruḥ war ittwaɣfar ca i iwdan. ^■   32 Wenni i ɣa inin awař d aɛeffan x Mmis n bnadem ad as ittwaɣfar, maca wenni i ɣa inin awař d aɛeffan x Arruḥ Iqeddsen war d as ittwaɣfar ca, uřa di řweqt-a uřa di tenni i dd ɣa yasen. ^■  

33 Ḥesbem tacejjart d taṣebḥant uřa d řɣiǧet nnes d taṣebḥant, niɣ ḥesbem tacejjart texsar uřa d řɣiǧet nnes texsar, minzi tacejjart tᵉttwassen zi řɣiǧet nnes.” ^□  ■  

34 “A tarwa n ifiɣran, mammec i ɣa teggem ad tessiwřem x min iṣebḥen, waxxa kenniw d iɛeffanen, minzi zeg uɛemmar n wuř ad issiweř uqemmum. ^■   35 Bnadem aṣebḥan issuffuɣ-dd min iṣebḥen zi řkenz aṣebḥan n wuř nnes uca bnadem aɛeffan issuffuɣ-dd zi řkenz aɛeffan nnes min iɛeffnen. 36 Maca Necc ad awem iniɣ, belli kuř awař ixwan ad zzayes ssiwřen iwdan, ad zzayes ttwaḥasben deg wass n lḥisab. ^■   37 Minzi s wawařen nnek ad tᵉttwaseggded uca s wawařen nnek ad tᵉttwaḥasbed.” ^■  

38 Ca n imseřmaden n idlisen d Ifarisiyyen, arrin-dd xas: “A Amseɣɣar, neccin nexs ad nẓar ict n řeɛřamet zzayek.” ^■   39 Maca Netta yarra-dd xasen: “Jjiř aɛeffan izennan ittettar ict n řeɛřamet, war d as ittmewci uřa d ict n řeɛřamet mɣir tenni n Yunus. 40 Minzi am mammec tuɣa Yunus třata n wussan jar ǧyaři d wussan deg uɛeddis n řhaycet tameqqrant n řebḥar, ammu i ɣa yiři uřa d Mmis n bnadem deg wuř n temmurt třata n wussan jar ǧyaři d wussan. ^■   41 Iryazen n Ninwa ad dd-kkaren deg wass n lḥisab ak-d jjiř-a, ad t ḥasben, minzi nitni tuben s tbarreḥt n Yunus, uca xzarem, aqa da wenni iǧan d ameqqran x Yunus! ^■   42 Tajeǧidt n ljanub ad tekkar deg wass n lḥisab ak-d jjiř-a, ad xas teḥkem minzi nettat tusa-dd zeg uneggaru n ddunect ḥima ad tseř i tiɣit n Suliman, uca xzarem, aqa da wenni iǧan d ameqqran x Suliman!” ^■  

43 “Ařami iffeɣ řaryaḥ amengus zi bnadem, ibda ittsara deg imucan war daysen bu waman, yarezzu arraḥet, war tt ittif. ^■   44 Řexdenni ad yini: ‘Ad dewřeɣ ɣar taddart inu manis dd-ffɣeɣ!’ Uca iruḥ, yufa i-tt texwa, tfarḍ, tsettef. 45 Řexdenni yuyur uca yiwi akides sebɛa n řaryaḥ nneɣni, d iɛeffanen ktar zzayes, ad dd-adfen, ad raḥen ad zedɣen diha, uca aneggaru n bnadem nni ad idweř mahu x umezwaru. Ammu i ɣa ittwagg ɛawed ak-d jjiř-a aɛeffan.” ^■  

46 Řami tuɣa ɛad issawař ak-d řɣaci, xzar, yemmas d aytmas bedden barra, arezzun ad kides ssiwřen. ^■   47 Inna as ijjen: “Xzar, yemmac d aytmac bedden di barra, arezzun ad kidek ssiwřen.” 48 Maca Netta yarra-dd x wenni tuɣa d as t innan, inna: “Min teɛna yemma d min ɛnan aytma?” 49 Xas uca isswiẓẓeḍ s ufus nnes ɣar imeḥḍaren nnes, inna: “Xzar, yemma d yaytma! 50 Minzi man wen itteggen min ixs Baba i iǧan deg ijenwan, aqa netta d uma d učma d yemma.” ^■