1 Di řweqt nni isřa Hirudus, řḥakem x ijj n arbaɛ n temmurt, řexbar n Yeccu. ^■   2 Inna i yimsexxaren nnes: “Wanita d Yuḥanna Amseɣḍaṣ. Aqa ittwasnekkar-dd zi taddart n imettinen, s uyenni xeddment dayes řeɛjayeb nni.” 3 Minzi Hirudus tuɣa iṭṭef Yuḥanna, icarf i-t, igga i-t di řeḥbes zi ssibbet n Hirudiyya, tenni d tamɣart n Filippus, wenni d umas n Hirudus, ^■   4 minzi Yuḥanna tuɣa iqqar as: “War ɣarek bu ttesriḥ aqa tiwyed tt d tamɣart nnek.” ^■   5 S uya tuɣa ixs ad t ineɣ, maca tuɣa iggʷed zi řɣaci minzi nitni ḥesben t d anabi. ^■   6 Maca řami dd-yiweḍ wass n wexřaq n Hirudus, tecḍeḥ yeǧis n Hirudiyya zzat i inewjiwen uca teɛjeb as i Hirudus. ^■   7 S uyenni iwaɛd i-tt s ict n tjaǧit ad as iwc marra min ɣa tᵉttar. ^■   8 Uca nettat, am tt tuɣa tᵉttwaɛarren zeg yemmas, tenna: “Ewc ayi da x ṭṭebṣi azeǧif n Yuḥanna Amseɣḍaṣ!” 9 Icḍen ujeǧid, maca umi tuɣa ijjuǧ u x ssibbet n yinni akides iqqimen, yumur ad as immewc uzeǧif.

10 Issekk ḥed ɣares, uca wanita iqess as azeǧif i Yuḥanna di řeḥbes.

11 Iwyen-dd azeǧif nnes di ṭṭebṣi, immewc as i tḥenjirt uca nettat tiwyi-t i yemmas.

12 Usin-dd imeḥḍaren nnes, ksin řxecbet, neḍřen tt. Řexdenni ruḥen, xebbaren Yeccu.

13 Řami isřa Yeccu man aya, iffeɣ ssenni di tɣarrabut ɣar ijj n wemcan ixřan, tuɣa-t din weḥḥdes. Isřa řɣaci x man aya, uca ḍfaren t x temmurt zi tneddam. ^■  

14 Umi dd-iffeɣ Yeccu zi tɣarrabut, iẓra aṭṭas n řɣaci uca iḥinn xasen, issgenfa imehřac nsen. ^■  

15 Řami dd-tiweḍ tmeddit, usin-dd ɣares imeḥḍaren nnes, nnan: “Aqa amcan-a ixřa u řweqt teɛdu, zeɛma sqebbeḍ řɣaci ḥima ad uyuren ɣar ředcur ad sɣen min ɣa ccen i yixef nsen.” ^■  

16 Maca Yeccu inna asen: “Nhřa ma ruḥen, wcem asen kenniw min ɣa ccen.”

17 Nnan as: “War ɣarneɣ da mɣir xemsa n tecnifin d tnayen n iseřman.”

18 Inna: “Awyem ten-dd da ɣari.”

19 Xenni yumur řɣaci ad qqimen x řeḥtic. Xenni iṭṭef xemsa n tecnifin d tnayen nni n iseřman, ixzar ɣar ujenna, ibarek, yarẓa i-tent uca iwca ticnifin i imeḥḍaren u imeḥḍaren wcin tent i řɣaci. ^■   20 Marra ccin, jjiwnen. Řexdenni ksin iřeqqwaz iceṭṭen: tuɣa din tenɛac n tsuǧatin ɛemmarent. 21 Inni ccin tuɣa aten di xemsa ařef n yeryazen, břa timɣarin d iḥenjiren.

22 Deɣya iziyyar Yeccu imeḥḍaren nnes ad nyen di tɣarrabut uca ad as izwaren ɣar ujemmaḍ, am issqebeḍ Netta řɣaci. ^■   23 Awarni řami issqebeḍ řɣaci, igeɛɛed ɣar wedrar weḥḥdes ḥima ad iẓẓaǧ. Řami dd-tiweḍ tmeddit, tuɣa iqqim din weḥḥdes. ^■   24 Taɣarrabut tuɣa-tt tiggʷej x temmurt ca n kilimutir, uca tᵉttwaɛarren zi ssa ɣar diha minzi asemmiḍ yusa asen-dd deg wudem. 25 Uca deg ḥeṭṭu wiss arebɛa n ǧiřet, yusa-dd ɣarsen Yeccu am iggur x waman n řebḥar. 26 Umi t ẓrin imeḥḍaren iggur x waman n řebḥar, nnxeřɛen, nnan: “Wa d řexyař aɣeddar!”, uca sɣuyyen zi tiggʷudi. 27 Deɣya issiweř-dd ɣarsen Yeccu, inna: “Ggem uř, aqa d NECC, war tteggʷedem ca!” 28 Buṭrus yarra-dd xas, inna: “A Sidi, mařa d Cek, weṣṣa ayi ad ɣarek dd-aseɣ x waman.” 29 Inna as: “As-dd!” Ihwa-dd Buṭrus zi tɣarrabut, yuyur x waman ḥima ad dd-yaweḍ ɣar Yeccu. 30 Maca umi iẓra asemmiḍ ijhed, teřqef i-t tiggʷudi uca, am ibda iɣarreq, ittřaɣa, inna: “A Sidi, senjem ayi!” 31 Yeccu isswiẓẓeḍ deɣya afus nnes, iṭṭef dayes, inna as: “A cek wenni di iǧa drus n l’iman, mayemmi dayek yudef ccek?” 32 Awarni řami nyin di tɣarrabut, yarsa usemmiḍ. 33 Inni iǧan di tɣarrabut, usin-dd ɣares, sejden as, nnan: “S tidett, Cek d Mmis n AREBBI!”

34 Awarni řami ẓwan řebḥar, iwḍen ɣar temmurt n Jinnisaret. ^■   35 Řami t ɛeqřen yeryazen n temmurt nni, ssuffɣen řexbar di marra jjwayeh nni d as dd-innḍen, iwyen-dd ɣares marra inni tuɣa iheřcen aṭṭas, 36 uca ttaren zzayes ad ten yejj ad ḥadan mɣir abeḥřuř n ujeǧab nnes, u marra inni t iḥadan, dewřen ggenfan.