1 Řami iẓra Yeccu řɣaci, yuři ɣar wedrar uca awarni řami din iqqim, usin-dd ɣares imeḥḍaren nnes. 2 Uca yarzem aqemmum nnes, isseřmed i-ten, inna:

3 “Sseɛd n yinni arruḥ nsen izřeḍ,

minzi Tageldit n ijenwan aqa-tt i nitni. ^■  

4 Sseɛd n yinni ittecḍinen,

minzi nitni ad ttwaɛezzan. ^■  

5 Sseɛd n imwaḍɛen,

minzi nitni ad warten tammurt. ^■  

6 Sseɛd n yinni ittřaẓan d yenni ittfaden ɣar tsegda,

minzi nitni ad jjiwnen. ^■  

7 Sseɛd n yinni yareḥḥmen,

minzi ad ɣarsen tiři arreḥmet.

8 Sseɛd n yinni i ɣar iǧa uř izdig,

minzi nitni ad ẓaren AREBBI. ^■  

9 Sseɛd n yinni itteggen řehna,

minzi nitni ad ttwasemman arraw n AREBBI.

10 Sseɛd n yinni inneḥṣaren x ssibbet n tsegda,

minzi Tageldit n ijenwan ad ɣarsen tiři. ^■  

11 Sseɛd i kenniw mařa ttɛayaren u ttdarracen xawem

uca ad xawem inin ɛřam kuř awařen iɛeffanen x ssibbet inu,

waxxa ssxarriqen. ^■  

12 Farḥem, sřiweřwem,

minzi řmunet nwem d tameqqrant deg ijenwan,

minzi ammu i tuɣa ittdarracen inabiyyen,

inni qbeř nwem.” ^■  

13 “Kenniw d tameǧaḥt n temmurt. Maca mařa tameǧaḥt ixsar uředdi nnes, mammec i ɣa negg ad tt narr d tameǧaḥt? War tneffeɛ ɛad i walu ḥaca ad temmenḍar ɣar barra, ad xas ɛefsen iwdan.” ^■  

14 “Kenniw d tafawt n ddunect. Tandint i ittwabnan x wedrar, war tzemmar ad teqqim tennuffar.

15 War ssreqqin řefnar uca ad t ssarsen sadu řmud, maca ad t ssarsen x řmerfeɛ, maḥend ad yarɣ i marra inni iǧan di taddart. ^■  

16 Jjem tafawt nwem ad tarɣ i iwdan, ḥima ad ẓaren řexdayem nwem icnan, ad ssuɛřan Babatwem i iǧan deg ijenwan.” ^■  

17 “Aqa ad awem ittɣiř aqa usiɣ-dd ḥima ad ssbeṭṭřeɣ Ccariɛa n Musa niɣ inabiyyen. Necc war dd-usiɣ ca ḥima ad ssbeṭṭřeɣ, maca ḥima ad kemmřeɣ. ^□  

18 S tidett, Necc ad awem iniɣ: Ař i ɣa ifna ujenna d temmurt, war ifenni uřa d ijj n řḥarf niɣ d taneqqiṭ zi Ccariɛa ař ɣa iɛdu kuřci. ^■  

19 Wenni i ɣa issbeṭṭřen zi tweṣṣa aya icten, waxxa d tameẓyant, uca isseřmad iwdan ammu, ad ittwasemma d ameẓyan di Tgeldit n ijenwan, maca wenni zzaysent iggin u isseřmad i-tent, netta ad ittwasemma d ameqqran di Tgeldit n ijenwan. ^■   20 Minzi Necc ad awem iniɣ: Mařa tasegda nwem war tmeqqar ca x tenni n imseřmaden n idlisen u tenni n Ifarisiyyen, s tidett war tᵉttidfem ca ɣar Tgeldit n ijenwan!”

21 Aqa tesřim belli ittwanna i řejdud: ‘War neqq!’, u: ‘Wenni ineqqen, ad ittwaḥaseb!’ ^■   22 Maca Necc ad awem iniɣ: ‘Marra wenni ittxeyyaqen x umas břa ssibbet, nhřa ma ad xas ittwaḥakem!’, u wenni iqqaren i umas: ‘Ad xak ssusfeɣ!’, ad xas teḥkem Lmeḥkama Tameqqrant n Wudayen, u wenni iqqaren: ‘A abuhaři!’ ad ittwaḥakem, ad yadef ɣar tmessi n jahennema. 23 Mařa tqeddmed tawhibt nnek x uɛalṭar min xef ssarsen tiɣarṣa d tewhibin, uca dinni tɛeqřed belli umac aqa-t ca xak, 24 ejj tawhibt nnek din zzat i uɛalṭar, ruḥ amezwaru, tṣeřḥed ak-d umac, xenni dweř-dd, uca ewc tawhibt nnek. 25 Egg deɣya taddukkřit ak-d weɣrim nnek umi cek ɛad akides deg webrid, ḥima aɣrim nnek war cek ittiwi ɣar řqaḍi, xenni řqaḍi ad cek yawi ɣar umxazni uca ad temmenḍared di řeḥbes. ^■   26 S tidett Necc ad ac iniɣ: War dd-teffɣed ssenni, ař ɣa txeǧṣed aṣuldi aneggaru.”

27 Aqa tesřim belli ittwanna: ‘War zenni ca!’, ^■   28 maca Necc ad awem iniɣ, marra wenni i ɣa ixzaren ɣar temɣart s nnecwet, aqa izna akides deg wuř nnes. ^■   29 Mařa tesseɣwa cek tiṭṭ nnek tafusect, qess i-tt, nḍar i-tt xak. Iḥřa ac mařa iweddar ijj n ṭṭarf n arrimet nnek x uweṭṭu n arrimet nnek marra di jahennama. ^■   30 Mařa isseɣwa cek afus nnek afusi, qess i-t, nḍar i-t xak, minzi iḥřa ac mařa iweddar ijj n ṭṭarf n arrimet nnek waha x uweṭṭu n arrimet nnek marra di jahennama.”

31 “Aqa ittwanna ɛawed: ‘Wenni i ɣa iǧfen i temɣart nnes, ad as iwc tabrat n waǧaf’. ^■   32 Maca Necc ad awem iniɣ: ‘Marra wenni i ɣa iǧfen i temɣart nnes, war iǧi zi ssibbet n farq-ccɣeř, ittarra tt ad tezna uca wenni i ɣa imeřcen tenni umi iǧfen, aqa netta izna.’ ” ^■  

33 “Aqa tesřim ɛawed belli ittwanna i řejdud: ‘War tejjaǧid s ẓur, maca egg min tejjuǧed i SIDI!’ ^■   34 Maca Necc ad awem iniɣ: ‘War tejjaǧam ɛemmarṣ, uřa ɣar ujenna minzi netta d řɛarc n AREBBI, ^■   35 uřa ɣar temmurt minzi nettat d tanebdat sadu iḍaren nnes, uřa ɣar tendint n Urcalim minzi nettat d tandint n Ujeǧid d ameqqran, ^■   36 war tejjaǧam uřa ɣar uzeǧif nnek minzi war tzemmared ad tarred uřa d ijj n uẓeṭṭu n ucuwwaf d acemřař niɣ d abarcan. 37 Ad iqqim wawař nnek ‘Wah!’ d ‘Wah!’, ‘Lla!’ d ‘Lla!’. Mana ktar zi man aya, aqa netta zeg umɛeffan.”

38 “Aqa tesřim belli ittwanna: ‘Tiṭṭ s tiṭṭ d tiɣmest s teɣmest!’, ^■   39 Maca Necc ad awem iniɣ, war tᵉttemɛařam ca ak-d ijj n uɛeffan, maca wenni i ɣa isseqqřen ameggiz nnek afusi, seřqa-y-as uřa d wenneɣni. ^■   40 Mařa din ḥed ixs ad kik igg ccreɛ uca netta ad xak ikkes tcamir nnek, ejj i-t ad iksi uřa d ajeǧab. 41 Wenni xak iggin bezzez ḥima ad kides tuyured ijj n kilumitr, uyur akides tnayen. 42 Man wen d ac i ɣa ittaren ca n řḥajjet, ewc as tt, u wenni yarezzun ad xak yarḍeř, war d t ttarra amenni.” ^■  

43 “Aqa tesřim belli ittwanna: ‘Ad texsed amqarreb nnek, ad tcarhed řeɛdu nnek!’ ^■   44 Maca Necc ad awem iniɣ: ‘Xsem řɛedyan nwem u barkem inni kenniw ineɛɛřen, ggem tcuni i yenni kenniw icarrhen, ẓẓaǧem i yenni xawem iggin bezzez d yenni xawem ittdarracen, ^■   45 ḥima ad tiřim d tarwa n Babatwem i iǧan deg ijenwan, minzi Netta issneqqar tafuct nnes x iɛeffanen d iṣebḥanen, yarexxu-dd i wenẓar ḥima ad iwwet x imseggaden u x yenni war iseggden. 46 Minzi mařa texsem inni kenniw ittexsen, man arbeḥ i ɣarwem? Ma war tteggen ayt n ḍḍariba uřa ammu? ^□  ■   47 Mařa tseǧmem x wawmaten nwem waha, min i tᵉtteggem ktar x wenneɣni? Ma war tteggen ayt n ḍḍariba uřa ammu? 48 Iřim tkemmřem am mammec ikmeř uřa d Babatwem i iǧan deg ijenwan.” ^■