1 Řexdenni ittwandeh Yeccu ɣar řexřa zi Arruḥ ḥima ad ittwajarreb zeg ibřis. ^□  ■   2 Awarni řami tuɣa iẓumm arebɛin n wussan d arebɛin n ǧyaři, yusa as-dd jjuɛ. 3 Yusa-dd ɣares umjarrab, inna as: “Mařa Cek d Mmis n AREBBI, ini i iẓra aya ad dewřen d aɣrum!” 4 Yarra-dd xas inna: “Aqa tura:

‘Bnadem war iddar s weɣrum waha,

maca zi kuř awař i dd-ittekken zeg uqemmum n AREBBI.’ ” ^■  

5 Řexdenni yiwyi t ibřis ɣar tendint iqeddsen uca issgeɛɛed i-t ɣar ṭṭarf n tzeqqa n Zzawect Tameqqrant, 6 inna as: “Mařa Cek d Mmis n AREBBI, iwa nḍar ixef nnek ɣar wadday, minzi aqa tura:

‘Ad yumur lmalakat nnes xak,

ad Cek ksin x ifassen nsent,

ḥima aḍar nnek war ineggeḥ ca aẓru.’ ” ^■  

7 Yeccu inna as: “Tura ɛawed:

‘War ttjarrab SIDI, AREBBI nnek!’ ” ^■  

8 Yiwyi t ɛawed ibřis ɣar wedrar yuɛřan aṭṭas, isscen as marra tigeldiwin n ddunect d uɛuǧi nsent, 9 uca inna as: “Ad ac wceɣ marra man aya, mařa tewḍid ayi ɣar iḍaren, ad ayi tsejded!”

10 Inna as Yeccu: “Ruḥ, a cciṭan, minzi tura:

‘SIDI, AREBBI nnek, umi ɣa tsejded

u i Netta weḥḥdes umi ɣa tsexxared.’ ” ^□  ■  

11 Řexdenni ijja i-t ibřis uca xzar, lmalakat usint-i-dd, tuɣa sexxarent as.

12 Řami isřa Yeccu belli Yuḥanna tuɣa ittwasellem, iruḥ ɣar Ljalil. ^■  

13 Ijja Nnaṣira uca yusa-dd ɣar Kafarnaḥum tenni ɣar ṭṭarf n řebḥar di temmurt n Zibulun d Naftali uca izdeɣ din,

14 ḥima ad ittwakemmeř min ittwannan zeg unabi Icaɛya umi inna:

15 “Tammurt n Zibulun d temmurt n Naftali deg Webrid n Řebḥar,

ɣar ujemmaḍ n L'Urdun, Ljalil n řegnus, ^■  

16 řgens i iqqimen di taǧest iẓra tafawt tameqqrant,

u x yenni izedɣen di temmurt d tiři n řmewt,

aqa tenqar-dd xasen tfawt.” ^■  

17 Zi ssin ibda Yeccu ittbarreḥ, inna: “Tubem minzi Tageldit n ijenwan aqa tudes-dd.” ^■  

18 Řami tuɣa Yeccu iggur x tma n řebḥar n Ljalil, iẓra tnayen n wawmaten, Cimɛun umi qqaren Buṭrus, isem wanita ixs ad yini ‘D Aẓru’, d Andrawus umas, tuɣa neṭṭaren tracca di řebḥar minzi nitni d ineymaren n iseřman. ^■  

19 Inna asen Yeccu: “Ḍfarem ayi-d, ad kenniw arreɣ d ineymaren n iwdan.” 20 Ssarsen deɣya tiracciwin nsen, ḍfaren t.

21 Řami yeɛdu zi ssin tsawent, iẓra tnayen n wawmaten nneɣni, Yaɛqub mmis n Zabdi d umas Yuḥanna, tuɣa aten ak-d babatsen Zabdi di tɣarrabut, ɛeddřen tiracciwin nsen uca Netta iřaɣa xasen. 22 Deɣya semḥen di tɣarrabut u di babatsen, ḍfaren t.

23 Tuɣa ittenneḍ di temmurt n Ljalil marra, isseřmad di temzidawin nsen, ittbarreḥ s Řexbar Aṣebḥan n Tgeldit uca issgenfa kuř řehřac d kuř řeɛyubat i iǧan di řgens. 24 Iffeɣ řexbar xas di Suriya marra, uca iwyen-dd ɣares marra imehřac inni ɣar iǧa ɛřam kuř řehřac d řeḥriq, imaryaḥen d yenni ittbarkikkiḍen d ineɛḍaben, uca issgenfa i-ten. 25 Ḍfaren t-i-dd aṭṭas n řɣaci zi Ljalil, zi Dikapulis, zi Urcalim, zi Yahudiyya u zeg ujemmaḍ n L'Urdun.