Abarreḥ n Yuḥanna Amseɣḍaṣ
“Tubem, minzi Tageldit n ijenwan aqa tudes-dd.”
3 Minzi d wa i xef ittwannan zeg unabi Icaɛya am inna:
“Tmijja i ittřaɣan di řexřa:
‘Swejdem abrid n SIDI,
seggem imesraq nnes.’ ” ■
4 Yuḥanna tuɣa yarreḍ arruḍ n taḍuft n iřeɣman, ibekkes ijj n webyas n yiřem. Uca macca nnes tuɣa d iburexsen d tamment taḥurrect. ■ 5 Řexdenni teffeɣ-dd ɣares Urcalim d qaɛ Yahudiyya d marra jjwayeh i d as dd-innḍen i L'Urdun, 6 uca ttwasɣeḍṣen zzayes deg iɣzar n L'Urdun, neɛmen s ddnub nsen. ■
7 Řami iẓra aṭṭas n Ifarisiyyen d Iṣaduqiyyen ttasen-dd maḥend ad ttwasɣeḍṣen, inna asen: “A tarwa n ifiɣran, wi d awem imřen maḥend ad tarewřem zeg weɣḍab i dd ɣa yasen? ■ 8 Ggem řɣiǧet i ɣa iřiqqen i ttubet. ■ 9 War ttɣiřem ca ad tinim deg ixef nwem: ‘Ibrahim d jedditneɣ!’, minzi Necc ad awem iniɣ belli AREBBI izemmar ad issnekkar zeg iẓra aya tarwa i Ibrahim. ■
10 Xzar, tacaqurt tᵉttwasars ɣar iẓewran n tcejjura. Kuř tacejjart i war itticen řɣiǧet tecna, ad tᵉttwaqess uca ad tewḍa di tmessi. □ ■
11 Necc ad kenniw ssɣeḍṣeɣ deg waman i ttubet, maca wenni i dd ɣa yasen awarni ayi, Netta ijhed xafi, necc war sdihiǧeɣ ad ksiɣ sandaliyat nnes. Aqa Netta ad kenniw isseɣḍeṣ di Arruḥ Iqeddsen d tmessi. ■
12 Tazzart nnes deg ufus nnes, ad izuzzar andrar nnes qaɛ, ad iyru irden ɣar řemrasi nnes, maca icarfa ad ten issecmeḍ s tmessi i war ixessyen.”
Aseɣḍeṣ n Yeccu s ufus n Yuḥanna Amseɣḍaṣ
13 Řexdenni yusa-dd Yeccu zi Ljalil ɣar L'Urdun, ɣar Yuḥanna, ḥima ad ittwasseɣḍeṣ zzayes. □ ■
14 Maca Yuḥanna yugi as, inna: “Necc ḥdajeɣ ad ttwasɣeḍṣeɣ zzayek. Aqa d Cek i ɣari i dd ɣa yasen?”
15 Maca Yeccu yarra-dd, inna as: “Samḥ ayi řexxu, minzi ammu i d aneɣ ittřiq ḥima ad nkemmeř marra tasegda.” Řexdenni isamḥ as.
16 Awarni řami ittwaseɣḍeṣ Yeccu, yuři-dd zeg waman deɣya, u xzar, aqa ttwarzmen as ijenwan uca iẓra Arruḥ n AREBBI ihwa-dd amecnaw tadbirt uca tarsa xas. ■
17 Xzar, tusa-dd ict n tmijja zeg ijenwan, tenna: “D Wa d Mmi iɛizzen, dayes ufiɣ arḍa inu.” ■
![](images/israeljesustime-riflat-01.jpg)
Xariṭa n temmurt n Israil di řweqt n Yeccu Lmasiḥ (Mt. 3:17)