1 Řami dd-ixřeq Yeccu di Bayt-Laḥm di Yahudiyya deg wussan n ujeǧid Hirudus, usin-dd ca n imusnawen n itran zi manis d tneqqar tfuct ɣar Urcalim. ^■   2 Nnan: “Mani iǧa wenni dd-ixeřqen d Ajeǧid n Wudayen? Aqa neẓra itri nnes di ccarq, nusa-dd ad as nesjed.” 3 Řami isřa ujeǧid Hirudus man aya, inneḥweř netta d qaɛ Urcalim akides. 4 Hirudus issmun-dd zi řgens marra imeqqranen n ikehhanen d imseřmaden n idlisen uca isseqsa ten x mani i ɣa ixřeq Lmasiḥ. 5 Nnan as: “Di Bayt-Laḥm di Yahudiyya, minzi d man aya i yuran s ufus n unabi:

6 “I cem, Bayt-Laḥm, tammurt n Yahuda,

cem war teǧid ca d tameẓyant jar řḥukkam n Yahuda,

minzi zzayem dd ɣa iffeɣ Ujeǧid

wenni i ɣa yarewsen řgens inu, Israil.” ^■  

7 Řexdenni iřaɣa Hirudus x imusnawen n itran s tnuffra uca yiweḍ ad zzaysen issen řweqt i di tuɣa d asen dd-iffeɣ itri. 8 Xenni issekk i-ten ɣar Bayt-Laḥm, inna: “Ruḥem dinni, tarzum mliḥ x Uḥenjir. Mařa tufim t, asem-dd, xebbarem ayi, ḥima uřa d necc ad dd-aseɣ, ad as sejdeɣ.” 9 Awarni řami sřin i wawař n ujeǧid, ruḥen uca xzar, itri i ẓrin di ccarq iggur zzatsen ařami dd-yiweḍ uca ibedd sennej i wemcan mani iǧa Uḥenjir.

10 Řami ẓrin itri, farḥen s řefraḥet tameqqrant aṭṭas.

11 Řami udfen ɣar taddart, ẓrin Aḥenjir ak-d Maryam, yemmas, wḍan ɣar temmurt uca sejden as. Xenni arezmen řeknuz nsen uca qeddmen as tirzifin: ureɣ, řebxur d řefwaḥet n mirru. ^□  

12 Umi d asen-dd iweḥḥa di tarjit ḥima war ttɛiqqiben ɣar Hirudus, ɛeqben ɣar temmurt nsen zeg ijj n webrid nneɣni.

13 Umi ruḥen, iḍhar-dd Lmalak n SIDI ɣar Yusuf di tarjit, iqqar: “Kkar, awi-dd Aḥenjir d yemmas, arweř ɣar Miṣra u qqim din ař cek i ɣa xebbareɣ, minzi Hirudus yarezzu x Uḥenjir ḥima ad t isshellek.”

14 Uca ikkar-dd Yusuf, yiwi Aḥenjir d yemmas s ǧiřet uca yarweř ɣar Miṣra.

15 Iqqim dinni ařami immut Hirudus, ḥima ad ittwakemmeř min ittwannan zi SIDI zeg inabiyyen i innan: “Řaɣiɣ-dd x Mmi ḥima ad iffeɣ zi Miṣra.” ^■  

16 Řami iẓra Hirudus belli imusnawen cemten t, ixeyyeq aṭṭas uca issekk inɣa marra iḥenjiren n Bayt-Laḥm u zi qaɛ jjwayeh i d as dd-yudsen, marra iḥenjiren zi tnayen iseggʷusa swadday ɛlaḥsab řweqt i yiweḍ ad issen zeg imusnawen.

17 Řexdenni ittwakemmeř min ittwannan zeg unabi Irmiya umi inna:

18 “Tmijja tᵉttwaseř di Rama,

imeṭṭawen d tɣuyyit n wecḍan aṭṭas.

Rahil tᵉttru x iḥenjiren nnes,

war tᵉttexs ad tᵉttwaɛezza minzi nitni war qqimen ɛad!” ^■  

19 Řami immut Hirudus, iḍhar-dd Lmalak n SIDI di tarjit i Yusuf di Miṣra, 20 inna: “Kkar, awi-dd Aḥenjir d yemmas, uca ruḥ ɣar temmurt n Israil, minzi inni tuɣa yarezzun ad nɣen Aḥenjir, aqa mmuten.” 21 Řexdenni ikkar, yiwi-dd Aḥenjir d yemmas uca yusa-dd ɣar temmurt n Israil. 22 Maca ařami isřa belli Arxilawus idweř d ajeǧid di Yahudiyya deg wemcan n babas Hirudus, iggʷed ad iraḥ dinni. Xenni iweḥḥa as-dd Arebbi di tarjit maḥend ad iraḥ ɣar jjwayeh n Ljalil. 23 Řami dd-yiweḍ, izdeɣ di tendint qqaren as Nnaṣira, ḥima ad ittwakemmeř min ittwannan zeg unabi, belli ad t semman ‘Nnaṣiri’. ^■