1 “Ḥḍam, war tṣeddaqem zzat i iwdan ḥima ad kenniw ẓaren. Mařa amya, war ɣarwem ittiři bu řajar zi Babatwem i iǧan deg ijenwan. 2 Mařa tṣeddqed, war tt ttegg di řbuq am mammec t tteggen imnafqen di temzidawin u di zznaqi, ḥima ad ten cenɛen iwdan. S tidett Necc ad awem iniɣ, nitni aqa ufin řajar nsen zi beɛda. ^■   3 Maca cek, xmi i ɣa tṣeddqed, ittxeṣṣa afus nnek azeřmaḍ war issin min ittegg ufusi nnek, 4 ḥima ṣṣedqet nnek ad tiři s tnuffra uca Babac wenni ittwařan di tnuffra, ad cek ixeǧeṣ s bṭayṭay.” ^■  

5 “Mařa teẓẓuǧed, war ttiřid ca am imnafqen inni umi iɛjeb asen řḥař ad ẓẓaǧen am bedden di temzidawin d tɣemmura n zznaqi ḥima ad ten ẓaren iwdan. S tidett Necc ad awem iniɣ, aqa nitni ufin řajar nsen zi beɛda. 6 Maca cek, mařa teẓẓuǧed, adef ɣar wexxam nnek, belleɛ tawwart, ẓẓaǧ i Babac wenni iǧan di tnuffra uca Babac i ittwařan di tnuffra d Netta i cek i ɣa ixeǧṣen s bṭayṭay. ^■   7 Mařa teẓẓuǧem war ttɛawadem i wawař ixwan amecnaw mammec ttẓaǧan inni zi řegnus, minzi ittɣiř asen s wawařen nsen aṭṭas ad asen iseř. ^■   8 War ttiřim am nitni, minzi Babatwem issen min teḥdajem qbeř d as i ɣa tᵉttarem ca. 9 Ammu i ɣa teẓẓaǧem kenniw:

‘A Babatneɣ i iǧan deg ijenwan,

Isem nnek ad yiři ittwaqeddes, ^■  

10 ejj ad dd-tas Tgeldit nnek, ad yiři řxaḍar nnek,

am mammec yeǧa deg ujenna, ad yiři ɛawed di temmurt.

11 Ewc aneɣ ass-a aɣrum n kuř ass.

12 Ɣfar aneɣ imarwusa nneɣ,

am mammec nsameḥ ɛawed i yenni dd aneɣ ittursen,

13 u war d aneɣ sidif ca deg uɣekkwi,

maca senjem aneɣ zeg umɛeffan.

Minzi Tageldit d jjehd d uɛuǧi ad iřin i Cek

i řebda qaɛ! Amin!’ ^■  

14 Maɣar mařa kenniw tsamḥem i iwdan i uxeṭṭu nsen, uřa d Babatwem i iǧan deg ujenna ad awem iɣfar. ^■  

15 Maca mařa kenniw war tᵉttsimiḥem i iwdan i uxeṭṭu nsen, aqa uřa d Babatwem war iɣeffar ca iɛeddiyen nwem.” ^■  

16 “Řami tẓummem, war tteggem aɣembub abarcan am imnafqen, inni issneqřaben aɣembub nsen ḥima ad ten ẓaren iwdan belli aqa ẓummen. S tidett Necc ad awem iniɣ, aqa nitni ufin řajar nsen zi beɛda. ^■  

17 Maca cek, mařa tẓummed, dhen azeǧif nnek uca sired aɣembub nnek,

18 ḥima war tbinid ca i iwdan belli tẓummed, maca i Babac wenni iǧan di tnuffra, uca Babac i ittwařan di tnuffra, aqa Netta i cek i ɣa ixeǧṣen.”

19 “War smunam ca řeknuz da di ddunect mani i ten ɣa tecc tcinda d ddra, u mani i ɣa ssnuqqben ixewwanen, ad ten acaren, ^■   20 maca smunem i yixef nwem řeknuz deg ujenna mani war ten tᵉttett ca tcinda d ddra u mani war ssnuqquben ixewwanen, war ten ttacaren. ^■   21 Minzi mani i ɣa yiři řkenz nnek, aqa ad din yiři uřa d uř nnek.”

22 “Řefnar n arrimet netta d tiṭṭ. Mařa tiṭṭ nnek aqa teṣfa, ad tiři arrimet nnek marra d tafawt. ^■   23 Mara tiṭṭ nnek d taɛeffant, xenni ad tiři arrimet nnek marra d taǧest. Mařa tafawt tenni dayek d taǧest, mecḥař temɣar taǧest! 24 Uřa d ijj war izemmar ad ixdem i tnayen n isiditen, minzi xenni netta ad icarh ijjen, ad ixs wenneɣni, niɣ ad iweqqar ijjen, ad isseḥqar wenneɣni. Kenniw war tzemmarem ad tsexxarem i AREBBI d tenɛacin.” ^■  

25 “S uyenni Necc ad awem iniɣ: ‘War kessim amnus di tudart nwem min ɣa teccem niɣ min ɣa teswem uřa i arrimet nwem mammec tt i ɣa tessyarḍem. Ma war teḥři tudart x macca niɣ arrimet x warruḍ? ^■   26 Xzarem ɣar ijḍaḍ n ujenna, aqa nitni war zarrɛen, war mejjaren uca war ttxemmiřen di řemrasi, waxxa amenni Babatwem i iǧan deg ijenwan i ten isseccan. Ma kenniw war tessekkwim ca ktar aṭṭas xasen? ^■   27 Man wen zzaywem izemmar s wemnus nnes ad yarni uřa d ijj n uɣiř di tuzzeggart nnes? 28 U mayemmi tkessim amnus i warruḍ? Xzarem mammec ɣemmyent tlillicin deg iyyar, waxxa nitenti war xeddment, war ttqarḍcent, ^□   29 maca Necc ad awem iniɣ, uřa d Suliman di marra aɛuǧi nnes war yarḍ ca am ijjen zzaysen. 30 Mařa AREBBI issyarḍ řeḥtic n iyyar i iǧan ass-a uca tiwecca ad immenḍar di tefqunt, ma xenni war kenniw issyirreḍ aṭṭas ḥsen zzayes, a kenniw i di iǧa drus n l’iman? 31 S uyenni war kessim ca amnus, war qqarem: ‘Min i ɣa necc?’ u: ‘Min i ɣa nsu?’ niɣ: ‘Min i ɣa nyarḍ?’ 32 Aqa řegnus arezzun man aya marra, maca Babatwem deg ujenna issen belli teḥdajem man aya marra. 33 Arzum amezwaru x Tgeldit n AREBBI d tsegda nnes, uca man aya marra ad ɣarwem immarni ɛawed. ^■   34 Xenni war kessim amnus i min i ɣa yiři tiwecca, minzi tiwecca ad teksi amnus i yixef nnes. Icfa i kuř ass tuɛeffna nnes.”