1 “Uct x yenni war di yeǧi bu wemnus di Ṣihyun u x yenni umi ittɣiř aqa aten di řaman x wedrar n Samarya, imcennɛen n wenni d amezwaru jar řegnus. Nitni ttasen-dd ɣarsen, marra taddart n Israil. ^■  

2 Ɛdum ɣar Kalna u txezzarem mammec teǧa! Uyurem ssenni ɣar Ḥamat u hwam-dd ɣar Jat n Ifilisṭiniyyen. Ma nitni ḥsen zi tgeldawin-a niɣ tammurt nsen d tameqqrant x temmurt nwem? ^□  

3 Kenniw inni issbeɛɛden ass aɛeffan ɣar zzat nwem, maca tessqarrabem řkuřsi n lɛunf,^■   4 inni i din ittezzřen x qamat n řɛaj uca ttesṭiřen x řemṭarbat, u ttᵉtten izmaren n wuǧi uřa d iyenduzen zi řwest n řkuri, ^□   5 inni i din iɣennjen amenni waha ɣar ǧɣa n lharpa, am dd-ssuffɣen ɛřam kuř n izřan s dduzan n lmusiqa, amecnaw t igga Dawud, ^■   6 inni issessen binu zi ṭṭawyat n urucci uca dehhnen ixef nsen s řemxeyyar n zzect u war ttarran taynit i treẓẓit n Yusuf. ^■   7 S uya, řexxu nitni ad uyuren ɣar lmenfa ɣar uzeǧif n imenfiyyen. Aqa ittwaqḍa ddriz n uɣuyyi n yinni i din ittezzřen. ^■  

8 Sidi inu, SIDI ijjuǧ s yixef nnes, ammu i iqqar SIDI, AREBBI n řɛeskarat: Necc ɛiffeɣ nnfaxet n Yaɛqub u carrheɣ řeqṣur nnes. S uyenni ad sellmeɣ tandint d marra min dayes.”

9 “Ad imsar řami qqimen ɛecra n iryazen di taddart d ict, aqa ad mmten nitni.

10 Mařa ad t iksi ɛemmis niɣ wenni i t ɣa isscemḍen ḥima ad issuffeɣ řxecbet zi taddart u xenni ad yini i wenni ɛad ɣar daxeř di taddart: ‘Ma aqa din ɣarek ɛad ktar?’, u xenni ad yini wenneɣni: ‘Uřa d ijj!’, u xenni ad yarni ad yini: ‘Sqar, minzi ittxeṣṣa war nettidar Isem n SIDI.’ ”

11 “Maɣar xzar, SIDI ittamar, uca Netta ad iwwet taddart tameqqrant ař ɣa tedweř d řxarbet u taddart tameẓyant ad tedweř d iceǧiqen.

12 Ma ad tazzřen iysan x řejruf? Ma ad t carzen s ifunasen? Kenniw maca tarrim řḥeqq d iẓi, u řɣiǧet n tsegda tarrim tt d cciḥ. ^■  

13 Kenniw inni ifarrḥen zi min war iǧin, inni iqqaren: ‘Ma war neṭṭif accawen s jjehd nneɣ?’

14 Maɣar xzar, a taddart n Israil, Necc ad dd-ssekkareɣ ijj n řgens ḍidd nwem, ammu i iqqar SIDI, AREBBI n řɛeskarat. Nitni ad kenniw ḥṣaren zi manis dd-iwḍen iwdan ɣar Ḥamat ař taɣzart n Řewḍa.”