Ɛubadya
Awař x Idum
1
1 Tameẓra n Ɛubadya. “Ammu i iqqar Sidi inu, SIDI, x Idum:
‘Neccin nesřa ijj n řexbar zi SIDI,
u ijj n umsekki ittwassekk ɣar řegnus:
Kkar, jjem aneɣ ad xas nɣewweɣ, ad nemneɣ akides!’
2 Xzar, Necc ggiɣ cek d ameẓyan jar řegnus,
cek tᵉttwaseḥqared aṭṭas.
3 Nnfaxet n wuř nnek tecmet i cek,
cek d wenni din izeddɣen deg imucan n udurri jar tṣuḍar,
di tzeddiɣt nnek yuɛřan,
cek d wenni iqqaren deg wuř nnek:
‘Man wen d ayi ɣa iɣeḍřen ɣar temmurt?’
4 Mařa tessgeɛɛded ixef nnek am ugider,
niɣ teggid řɛucc nnek jar itran,
Necc ad cek dd ssenni ssehwiɣ,
ammu i iqqar SIDI.” ■
5 “Mařa udfen-dd ɣarek iceffaren,
niɣ ixewwanen s ǧiřet,
min imsaren ařami cek ssbekkamen!
Ma war ttacaren ař ɣarsen i ɣa yiři min ikfan?
Mařa usin-dd ɣarek inni i ɣa iřeqḍen aḍiř,
ma ad jjen ca min ittwařeqḍen awarni asen? ■
6 Mammec i ɣa arzun di Ɛisu,
mammec i ɣa beqqcen řeknuz nnes innufaren!
7 Marra iryazen nni iggin ijj n řɛahd akidek,
ɛarnen cek ɣar weymir,
iryazen nni tuɣa akidek iddaren di řehna, cemten cek,
nitni zemmaren xak,
iryazen nni iccin aɣrum akidek,
aqa nitni ggin ijj n uyezzim swadday nnek.
‘Aqa netta war dayes bu řefhamet.’ □
8 Ma war ittiři deg wass nni, inna SIDI,
aqa Necc ad areddǧeɣ imiɣisen zi Idum,
u řefhamet zeg idurar n Ɛisu? ■
9 Uřa d ayt n bu-teɣruḍt nnek ad ttwaḥṣaren zi tiggʷudi, a Tayman,
ḥima kuř ijjen zeg idurar n Ɛisu
ad ittwaqḍeɛ s wenɣay.” ■
10 “Zi ssibbet n lɛunf x umac Yaɛqub,
ad cek tdeř řefḍiḥet,
u ad tᵉttwakksed i řebda. ■
11 Deg wass i di tuɣa xas tbedded,
deg wass i di ibarraniyyen iwyen-dd řɛeskar nnes ɣar tmeḥbast
u udfen řbarrani ɣar tewwura nnes,
u nḍaren taqedduḥt x Urcalim,
tuɣa cek am yijjen zzaysen. ■
12 War d ac iɛeddeř ad teqqimed txezzared deg wass n umac,
deg wass n wectab nnes abarcan,
war tezmired aqa tfarḥed x iḥenjiren n Yahuda,
deg wass n wareddeǧ nsen
u war tezmired ad tarezmed aqemmum nnek aṭṭas
deg wass n řeḥṣaret,
13 war tezmired ad tadfed ɣar tewwart n řgens inu
deg wass n uhellek nsen
war d ac iɛeddeř ad teqqimed txezzared ɛawed
deg wass n uḍeyyeɛ nsen
u war tezmired ad tesswiẓẓḍed ifassen nnek ɣar wagřa nnes
deg wass n uḍeyyeɛ nnes,
14 war tezmired ad tbedded ɣar mani ttmeřqan ibriden,
maḥend ad tᵉtteḥḥid inni yarewřen
u war tezmired ad tsellmed inni tuɣa iqqimen ddaren
deg wass n řeḥṣaret.”
15 “Maɣar yudes-dd ass n SIDI x marra řegnus!
Am teggid cek, ad zzayek ittwagg,
axeǧeṣ nnek ad dd-idweř x uzeǧif nnek. ■
16 Maɣar am mammec teswim kenniw x wedrar inu iqeddsen,
ammu ad swen marra řegnus řebda,
wah, ad swen ad sekkfen,
ad dewřen axmi ɛemmarṣ war tuɣa ǧan.
17 Maca x wedrar n Ṣihyun ad yiři min innejmen,
u wanita ad yiři d amqeddes,
u inni n taddart n Yaɛqub ad ṭṭfen tiseqqař n řwart nsen.
18 Taddart n Yaɛqub ad tiři d timessi,
u taddart n Yusuf d aceɛɛař,
uca taddart n Ɛisu ad tiři am iɣeǧ
u nitni ad asen sscemḍen u ad ten ccen,
ařami war iqqim uřa d ijj iddar di taddart n Ɛisu,
maɣar SIDI aqa issiweř.”
19 “Inni n Temmurt n Ljanub ad ṭṭfen idurar n Ɛisu d tasɣart,
u yenni n Temmurt Iwaṭan ad ṭṭfen tammurt n Ifilisṭiniyyen d řwart
wah, nitni ad ṭṭfen iyyar n Ifrayim d yeyyar n Samarya d řwart,
u Binyamin ad iṭṭef Jilɛad d řwart,
20 u imenfiyyen zi řɛeskar-a n ayt n Israil
ad ṭṭfen tammurt n Ikenɛaniyyen d řwart ař Ṣarfat,
u imenfiyyen zi Urcalim nni iǧan di Ṣafarad,
ad ṭṭfen tineddam n Temmurt n Ljanub d řwart. □
21 Imsenjamen ad geɛɛden adrar n Ṣihyun,
ḥima ad ḥakmen adrar n Ɛisu,
uca tagelda ad tiři n SIDI.”