Ɛamus
Tamezwarut
1
1 Awařen n Ɛamus, wenni tuɣa iǧan jar imeksawen n Taquɛa, awařen i iẓra x Israil, deg wussan n Ɛuzziya, ajeǧid n Yahuda, d Yarubɛam, mmis n Yuwac, ajeǧid n Israil, tnayen n iseggʷusa qbeř i wenhezzi n temmurt.■ Řeḥkamat n SIDI x timmura i d as-dd innḍen u x Yahuda d Israil
2 Netta inna: “SIDI ad izehhar zi Ṣihyun u ad issgeɛɛed tmijja nnes zi Urcalim. Ddmani n tarewsa ad ceḍnent u taqiccet n Karmil ad tisřaw.” ■
3 “Ammu i iqqar SIDI: X třata niɣ arebɛa n ixeṭṭan i igga Dimacq, war t ssbeṭṭařeɣ, minzi nitni ssarwaten Jilɛad s teřwiḥin itteḥřuǧuḍen n wuzzař i usarwet. 4 Ad ssekkeɣ timessi di taddart n Ḥazayil, ad tecc řeqṣur n Binhadad. 5 Ad arẓeɣ zzekrun n Dimacq u ad mḥiɣ wenni izeddɣen zi řewḍa n wareddeǧ, d wenni zi taddart n meẓri i yarebbun azeǧaḍ, u řgens n Aram ad ittwandeh di tmeḥbast ɣar Qir!, inna SIDI.” ■
6 “Ammu i inna SIDI: X třata niɣ arebɛa n ixeṭṭan i igga Ɣazza, war t ssbeṭṭařeɣ, minzi nitni iwyen řgens inu qaɛ di lmenfa ḥima ad t sellmen i Idum. ■ 7 Ad ssekkeɣ timessi daxeř di řeḥyuḍ n Ɣazza, ad tecc řeqṣur nnes. 8 Necc ad teḥḥiɣ amezduɣ zi Acdud u zi Acqalun wenni yarebbun azeǧaḍ u Necc ad ksiɣ afus inu ḍidd i Ɛaqrun u min iqqimen n ayt n Ifilisṭiniyyen ad ittwahellek, iqqar Sidi inu, SIDI.”
9 “Ammu i inna SIDI: X třata niɣ ařebɛa n ixeṭṭan i igga Ṣur, war t ssbeṭṭařeɣ, minzi nitni sellmen řgens inu qaɛ di lmenfa i Idum, u war idaren řɛahd ak-d wawmaten nsen.
10 S uyenni ad ssekkeɣ timessi daxeř di řeḥyuḍ n Ṣur, ad tecc řeqṣur nnes.”
11 “Ammu i inna SIDI: X třata niɣ arebɛa n ixeṭṭan i igga Idum, war t ssbeṭṭařeɣ, minzi netta iḍfar awmaten nnes s ssif u issɛiǧi arreḥmet nnes, u minzi aɣḍab nnes iqqim icarreg břa qeṭṭu, u minzi netta iqqim iṭṭef řebda deg ufugem nnes.
12 Necc ad ssekkeɣ timessi di Tayman, ad tecc řeqṣur n Buṣra.”
13 “Ammu i inna SIDI: X třata niɣ arebɛa n ixeṭṭan i iggin ayt n Ɛammun, war t ssbeṭṭařeɣ, minzi nitni carrgen timɣarin s ddeyset zi Jilɛad, ḥima ad sswessɛen tammurt nsen.
14 Necc ad ssarɣeɣ ict n tmessi daxeř i řeḥyuḍ n Rabba, ad tecc řeqṣur nnes, ɣar wesruddeḥ di řbuq deg wass n umenɣi, am iṣuḍ usemmiḍ deg wass n tḥaryaḍt.
15 Ajeǧid nsen ad yuyur di lmenfa, netta ak-d řḥukkam nnes, inna SIDI.”