1 Awař n SIDI i dd-yusin ɣar Yuwil, mmis n Fatwiyil. ^□  

2 “Sřem aya, a iwessura, sḥessem, marra kenniw imezdaɣ n temmurt! Ma imsar uya ɛemmarṣ deg wussan nwem niɣ deg wussan n ibabaten nwem? ^□   3 Ḥajam iḥenjiren nwem x uya u jjem iḥenjiren nwem ad t ḥajan i iḥenjiren nsen u iḥenjiren nsen i jjiř i dd ɣa yasen. 4 Min ijja bu-weqḍeɛ, tecca i-t tmurɣi, min tejja tmurɣi, icca i-t bu-weřsaḥ, min ijja bu-weřsaḥ, icca i-t bu-uṣard.

5 Faqem, kenniw iskarjiyyen, sɣuyyem u trum, marra inni issessen binu, zi ssibbet n binu ẓemmen t jdid, maɣar ittwaqḍeɛ zeg uqemmum nwem. 6 Maɣar ijj n řgens igeɛɛed ḍidd i temmurt inu. Ɣares tizemmar u řqedd nnes břa řeḥsab. Tiɣmas nnes am teɣmas n wayraden u tiɣmas n teɣmart nnes am tinni n teyradt. 7 Aqa yareddeǧ tazayart inu u yarza wartu inu, yarra i-t qaɛ d aqeccar uca inḍar i-t, tiseḍwin nnes dewřent d ticemřařin. 8 Cetcat am ict n teɛzarect tenni ibekksen s ict n txancet n wecḍan x weryaz n temẓi nnes. 9 Tettwaqḍeɛ tewhibt n řɣiǧet d tewhibt n useyyeb zi Taddart n SIDI. Ikehhanen, imsexxaren n SIDI, ceṭṭen.

10 Aqa ittwareddeǧ yiyyar, tecḍen temmurt, minzi imendi iḍeyyeɛ, yuẓeɣ binu n jdid, tejmed zzect.

11 Ifeǧaḥen ttseḍḥan, ayt n tzayart sɣuyyun x yirden d imendi, maɣar ṣṣabet n yiyyar tweddar.

12 Tazayart tuẓeɣ, artu n tazart isřaw, tacejjart n aremman, uřa d tini d tcejjart n tteffaḥt, wah marra ticejjura n yiyyar sřawent, ɛad řefraḥet n tarwa n bnadem truḥ.

13 Beysem ixef nwem u wtem agejdur, kenniw ikehhanen! Syuyyem kenniw imsexxaren n uɛalṭar, asem-dd u tessensem di txuncay, kenniw imsexxaren n AREBBI, maɣar tawhibt n řɣiǧet d tewhibt n useyyeb ttwakksent i Taddart n AREBBI nwem.

14 Ɛeřmem i yijj n uẓummi iqeddes, barrḥem s yijj n umuni ifarzen, smunem imɣaren d marra imezdaɣ n temmurt di Taddart n SIDI, AREBBI nwem, u řaɣam ɣar SIDI. ^■  

15 Wih, ass nni! Minzi yudes-dd wass n SIDI u ad dd-yas ass nni amecnaw ijj n ureddeǧ n Uzemmar x kuřci. ^■  

16 Ma war d aneɣ tᵉttwakkes macca jar tiṭṭawin nneɣ? Uřa d řefraḥet d arcuq zi Taddart n AREBBI nneɣ.

17 Iɛeqqayen n zzariɛet uẓɣen sadu ibursa, ixxamen n řexzen ttwareddǧen, řehrit hedmen, minzi imendi inẓeɣ.

18 Mammec issmuhrut řmar! Tiḥimriwin n ifunasen d tfunasin qqiment ḥayar, maɣar war ɣarsent bu heddu! Uřa d tiḥimriwin n wuǧi fnant.

19 Ɣarek i ttřaɣiɣ necc, a SIDI, minzi timessi tecca ddmani n řexřa u yijj n uceɛɛař aqa issecmeḍ marra ticejjura n yiyyar. 20 Ura d řmař deg iyyar sekkʷḍen-dd ɣarek, minzi tɣezratin uẓɣent u timessi tecca ddmani n řexřa.”