1 “Ṣuḍem deg uyicc n icarri di Ṣihyun u sɣuyyem s jjehd x wedrar n Zzawect inu Iqeddsen, jjem marra imezdaɣ n temmurt ad arjijen, maɣar yudes wass n SIDI, wah aqa-t yudes. ^■   2 Ijj n wass n taǧest d tubbarcent, ijj n wass n iseynuten u n yijj n useynu ibbumbes. Am tuffut n řḥař igguren x idurar ad dd-yas ijj n řgens d ameqqran u ijhed! Am wanita ɛemmarṣ war iǧi zi mecḥař uya u awarni as war ittiři ɛawed, deg iseggʷusa awarni as zi jjiř ař jjiř nneɣni. 3 Zzat i wudem nnes tᵉttett tmessi u awarni as icemmeḍ uceɛɛař. Zzates tammurt tegga am weḥwic n Ɛadn, maca awarni as aqa din ict n řexřa n řbarr. War izemmar ad zzayes injem. 4 Ccuf nsen amecnaw ccuf n yiysan u nitni ttazzřen am yiysan n tazřa. 5 Am uqarqeb n ikarruten n umenɣi x tqiccitin n idurar, ammu neggzen nitni, am řḥess n uceɛɛař n tmessi ittetten iɣeǧ, am yijj n řgens ijehden isedden i umenɣi. 6 Zzat i wudem nnes ttarjijen řegnus, marra iɣembab dewřen d icemřařen.

7 Nitni ttazzřen am ayt n bu-teɣruḍt, am iɛeskariyyen ttgeɛɛaden nitni řḥiḍ, kuř ijj iggur abrid nnes u nitni war dd-tteffɣen ca zeg umesruq nsen. 8 Uřa d ijjen war iɛarren wenneɣni, kuř bu-ṭeɣřuḍt iggur deg webrid nnes, ammu i gguren nitni, u waxxa nitni wḍan s lansa, war ttemsbeɛɛiden

9 Nitni weṭṭan x tendint, ttazzřen x řḥiḍ, ttgeɛɛaden ɣar tudrin, ttadfen zi řekwaza am uxewwan.

10 Tᵉttarjiji temmurt zzat i wudem nnes, ijenwan ttenhezzan, tafuct d taziri bbarcnent u itran arrin tafawt nsen. ^■  

11 SIDI yarra tmijja nnes ad teffeɣ zzat i řɛeskar nnes, maɣar řɛeskar nnes d ameqqran aṭṭas, maɣar s ṣṣulṭa ittkemmař Netta awař nnes, maɣar ass n SIDI d ameqqran u issaggʷad aṭṭas. Wi izemmaren ad t iksi?” ^■  

12 “Uřa řexxu ɛad issawař SIDI, ɛeqbem-dd ɣari s marra uř nwem, s uẓummi u s imeṭṭawen u s tɣuyyit n wecḍan. ^■  

13 Carrgem uř nwem, war iǧi arruḍ nwem, u dewřem-dd ɣar SIDI, AREBBI nwem, maɣar Netta d aḥnin d arḥim u ɣares ttasiɛ n řxaḍar d tmexsiwt tameqqrant icewwaren u Netta ineddem x řɣar. ^■  

14 Wi issnen aqa Netta ad dd-idweř ad indem u ad yejj ict n lbaraka awarni, ict n tewhibt n řɣiǧet u ict n tewbibt n useyyeb i SIDI, AREBBI nwem.” ^■  

15 “Ṣuḍem deg uyicc n icarri di Ṣihyun, qeddsem ijj n uẓummi, barrḥem s yijj n umuni ifarz. ^■  

16 Smunem řgens, qeddsem agraw n řgens, jarwem imɣaren, smunem iḥenjiren imeẓyanen uřa d iseyman nni ɛad itteṭṭḍen. Ejj muřay ad iffeɣ zeg wexxam nnes n daxeř d tesřit zeg uqiḍun nnes.

17 Jjem ikehhanen, imsexxaren n SIDI, ad run jar wesqif d uɛalṭar u jjem i-ten ad inin: ‘Sɛizz x řgens nnek, a SIDI, u war tejji tasɣart nnek ad zzayes stehezzan u ad tt ggen d ijj řmatal jar asen, jar řegnus. Mayemmi i ɣa qqaren jar řegnus: Mani iǧa AREBBI nsen?’ ”^■  

18 Xenni yusem SIDI x temmurt nnes u iḥinn x řgens nnes.

19 SIDI yarra-dd u inna i řgens nnes: “Xzar, Necc ssekkeɣ awem-dd imendi d binu n jdid d zzect, ḥima kenniw ad zzaysen tejjawnem, u Necc war kenniw tticeɣ ɛad i useḥqar jar řegnus. 20 Wenni dd-yusin zi ccamal ad t ssiggʷejeɣ xawem u ad t ssuffɣeɣ ɣar ict n temmurt yuẓɣen tᵉttwakeḥḥeḍ. Aɣembub nnes ad t ssuffɣeɣ ɣar řebḥar n ccarq u ḍeffar nnes ɣar řebḥar di ccarq. Ad tgeɛɛed arriḥet nnes u ad tgeɛɛed arriḥet n terṣuḍi nnes, minzi Netta aqa igga timesřayin timeqqranin.”

21 “War tteggʷed, a tammurt, sřiwřew d tfarḥed, maɣar SIDI igga timesřayin timeqqranin. 22 War tteggʷedem ca, a řmař n yiyyar, maɣar ddmani n řexřa ad zzeyzun, ticejjura ad wcent řɣiǧet nsent, tazayart d wartu n tazart ad wcen řɣiǧet nsen. 23 Iḥenjiren n Ṣihyun, sřiwřewem u farḥem di SIDI, AREBBI nwem, maɣar Netta ad awem iwc Amseɣɣar n tsegda u Netta ad dd-issehwa anẓar i kenniw, anẓar n řexrif d wenẓar n arbiɛ ɣar umezwaru n yimir. ^□   24 Inedrar ad ccuren s imendi u tisarfin n uḍiř ad ssefyent s binu n jdid d zzect. 25 Necc ad awem xeřfeɣ iseggʷusa i ccint tmurɣi, bu-weřsaḥ d bu-uṣarḍ d bu-weqḍeɛ, řɛeskar inu ameqqran nni ssekkeɣ jar awem. ^■   26 Kenniw ad teccem ař ɣa tfeyyḍem, ař ɣa tejjawnem u kenniw ad tṣebbḥem Isem n SIDI, AREBBI nwem, wenni akidwem iggin řeɛjeb uca řgens inu ɛemmarṣ ad iseḍḥa ɛad. 27 Kenniw ad tessnem aqa Necc di řwest n Israil i ǧiɣ u d Necc d SIDI, AREBBI nwem, war din iǧi ḥed nneɣni u řgens inu war ittseḍḥa ɛemmarṣ i řebda.”