1 Awař n SIDI i dd-yusin ɣar Ḥuciɛa, mmis n Biri, deg wussan n Ɛuzziya, Yutam, Aḥaz d Ḥizqiya, ijeǧiden n Yahuda, u deg wussan n Yarubɛam, mmis n Yuwac, ajeǧid n Israil. ^□  

2 Abeddu n wawař n SIDI s Huciɛa.

SIDI inna i Huciɛa: “Ruḥ, awi ict n temɣart n farq-ccɣeř uřa d tarwa n farq-ccɣeř, maɣar s farq-ccɣeř nnes tezna temmurt teffeɣ zeg awarni i SIDI.”

3 Uca yuyur netta, yiwi Jumar, yeǧis n Diblayim u nettat teksi s ddeyset, turuw as-dd ijj n mmis. ^□   4 Xenni inna as SIDI: “Řaɣa as s yisem n ‘Yazraɛil’, maɣar cwayt n řweqt waha u xenni Necc ad xeǧṣeɣ idammen n Yazraɛil x taddart n Yahu u Necc ad qḍiɣ x tgelda n taddart n Israil. ^□   5 Deg wass nni ad yiři, aqa Necc ad arẓeɣ řqews n Israil di řewḍa n teɣzurt n Yazraɛil.” ^□  

6 Uca teksi nettat ɛawed s ddeyset uca turuw-dd yeǧis uca Netta inna as: “Řaɣa as s yisem n Lu-Ruḥama, maɣar war arreḥḥmeɣ ɛad x taddart n Israil, war ttɣimiɣ semmḥeɣ asen. ^□   7 Maca ad arreḥmeɣ x taddart n Yahuda u Necc ad ten ssnejmeɣ s ufus n SIDI, AREBBI nsen! Necc war ten ssenjmeɣ s řqews niɣ s ssif niɣ s iysan uřa s imnayen.”

8 Ařami tekkes uṭṭuḍ i Lu-Ruḥama, teksi ɛawed s ddeyset u turuw-dd ijj n mmis. 9 U Netta inna: “Řaɣa as s yisem n Lu-Ɛammi, maɣar kenniw war teǧim ɛad d řgens inu u Necc war ǧiɣ ɛad da i kenniw.” ^□