1 Deg useggʷas wiss třata n tgelda n ujeǧid Yahuyaqim, ajeǧid n Yahuda, yusa-dd Nabuxadnaṣṣar, ajeǧid n Babil, ɣar Urcalim uca inneḍ as-dd. ^■   2 Sidi igga Yahuyaqim, ajeǧid n Yahuda, deg ufus nnes, uřa d ict n tesɣart n řeqcuɛ n Taddart n AREBBI. Netta yiwyi ten ɣar temmurt n Cinɛar, di taddart n arebbi nnes uca yiwyi ten ɣar wexxam n txubay n arebbi nnes.

3 Inna ujeǧid i Acfanaz, azeǧif n imsexxaren nnes icenɛen, aqa wanita ad yawi iḥudriyyen zeg ayt n Israil, zi zzariɛet n ujeǧid u zi tarwa n taṣiřet, 4 iḥudriyyen inni war di iǧi uřa d ijj n řɛib, inni d iṣebḥanen, ittwasřemden di marra tiɣit, ssnen tussna, ɣarsen řeɛqeř s řefhamet u ɣarsen tizemmar i tsexxart di řeqṣar n ujeǧid, ḥima ad asen ssřemden idlisen d yiřes n Ikaldaniyyen. ^□   5 Ajeǧid igga asen ijj n lmaɛica di kuř ass zi macca n ujeǧid u zi binu n ṭṭabřa n tsessit nnes, u ḥima ad ten ssřemden třata n iseggʷusa. Ɣar uneggar n iseggʷusa nni ad sexxaren zzat i wudem n ujeǧid.

6 Zeg ayt n Yahuda tuɣa din jar asen Daniyal, Ḥananya, Micayil d Ɛazarya. 7 Arrays n imsexxaren icenɛen iwca asen ismawen nneɣni. Daniyal igga as Balṭacaṣṣar, Ḥananya Cadrax, Micayil Micax u Ɛazarya igga as Ɛabd-Naɣu.

8 Daniyal tuɣa igga uř nnes maḥend war issxemmij ixef nnes s macca d binu n ṭṭabřa n ujeǧid u ittar i arrays n imsexxaren icenɛen, ḥima war issxemmij ixef nnes zzaysen. 9 AREBBI isscen i Daniyal tamexsiwt nnes icewwaren d arreḥmet nnes zzat i wudem n arrays n imsexxaren icenɛen.

10 Arrays n imsexxaren icenɛen inna i Daniyal: “Necc tteggʷedeɣ zi bab inu, ajeǧid, wenni i kenniw iweṣṣan x macca d tsessit, maɣar mayemmi ad iẓar iɣembab nwem zerryen x iḥudriyyen nneɣni, iqrinen nwem? Kenniw ad tewcem azeǧif inu i ujeǧid!”

11 Xenni inna Daniyal i uweqqaf nni tuɣa igga arrays n imsexxaren icenɛen x Daniyal, Ḥananya, Micayil d Ɛazarya:

12 “Qeǧeb imsexxaren nnek ɛecra n wussan. Ejj ad aneɣ wcen zi min ittwazarɛen i macca uřa d waman ḥima ad nsu.

13 Xenni ejj ad aneɣ qeddmen zzat i wudem nnek mammec iǧa waddud nneɣ uřa d iḥudriyyen nni ittᵉtten zi macca n ujeǧid mammec iǧa waddud nsen u egg am mammec tᵉttwařid cek!”

14 Netta isřa asen uca iqeǧeb i-ten ɛecra n wussan.

15 Ɣar uneggar n ɛecra n wussan dewřen nitni ttbanen cnan u ṣebḥen x marra iḥudriyyen i iccin zi macca n ujeǧid.

16 Xenni imsar aqa aweqqaf ikkes asen macca nsen igellden d binu i ittxeṣṣa asen ad swen uca iwca asen zi min ittwazarɛen.

17 I arebɛa n iḥudriyyen-a iwca asen AREBBI tussna d řeɛqeř zi marra idlisen d tiɣit u i Daniyal iwca as uřa d aḥekkar di marra timeẓra d tirja.

18 Ɣar uneggar n wussan i x tuɣa inna ujeǧid aqa awarni asen ittxeṣṣa ad ten qeddmen zzates, yiwyi i-ten arrayes n imsexxaren, inni umi ttwaddzen imeǧařen, zzat i wudem n Nabuxadnaṣṣar.

19 Issiweř ujeǧid akidsen u war ittwif uřa d ijjen jar asen am Daniyal, Ḥananya, Micayil d Ɛazarya u nitni dewřen ttsexxaren i ujeǧid. 20 Di kuř tamesřact i di tuɣa ittxeṣṣa tiɣit d řefhamet i x tuɣa ten ittseqsa ujeǧid, yufa aqa ɛdun marra tarwa n tseḥḥart d imesnawen n itran di tgeldit nnes s ɛecra n tseqqar. 21 Daniyal iqqim dinni ɣares ař aseggʷas amezwaru n ujeǧid Kurac.