1 “Samarya ad tᵉṭṭef axeǧeṣ, minzi tɣewweɣ x AREBBI nnes. Ad wḍan s ssif. Iḥenjiren imeẓyanen nsen ad ttwařebzen u timɣarin nsen s ddeyset ad ttwacarrgent.” ^■  

2 A Israil, dweř-dd ɣar SIDI, AREBBI nnek, maɣar tenderfed s řmuɛṣiyyet nnek. ^■   3 Ksim awařen-a akidwem u dewřem-dd ɣar SIDI. Inim as: Ksi xaneɣ řmuɛṣiyyet marra u qbeř zzayneɣ min icnan, xenni ad nawi s tidett iyenduzen imeẓyanen n řwuɛud n iyencicen nneɣ. 4 Accur war d aneɣ issenjam, war neggur x yeysan u war neqqar i tmegga n ifassen nneɣ: ‘Arebbi nneɣ’, maɣar zzayek i ɣa ittwarḥem uyujiř.

5 Necc ad ten ssgenfiɣ zi tɣennant nsen, ad ten ttexseɣ s řxaḍar, maɣar aɣḍab inu iḥeyyed xas. 6 Necc ad iřiɣ i Israil am nnda. Netta ad inuwwar am tnewwact n tellilict, ad iwwet Israil iẓewran nnes am idurar n Lubnan. ^□   7 Řefruɛ nnes ad zzuggarten u aweqqar nnes ad yiři am uzemmur u řefwaḥ nnes am řefwaḥ n tcejjura x idurar n Lubnan. 8 Nitni ad dd-dewřen, ad qqimen di tiři nnes, ad sseddaren imendi, ad newwaren am tzayart. Řidaret nnes ad tiři axmi binu n Lubnan. 9 A Ifrayim, min ɣari ɛad ak-d řexyařat n ṣṣanam? Necc sřiɣ as u ad xas ssijjeɣ. Ad iřiɣ am ict n tcejjart n umerzi aziza, zzayi i tᵉttwaf řɣiǧet nnek. ^□  

10 Man wen iǧan d amiɣis u d afehham di tmesřayin-a, man wen i ɣar teǧa řefhamet u man wen i tent issnen? Wah, ibriden n SIDI nican i yeǧan u imseggaden ad daysen uyuren, maca inni iɛeddan ad daysen nnderfen.