1 “Umi issiweř Ifrayim, aqa din tarjijet s uweqqar. Netta issgeɛɛed ixef nnes di Israil uca idweř d amednub zi ssibbet n Baɛl u xenni immut. 2 Řexxu arnin tteggen ddnub u ggin s nnuqart nsen ijj n řexyař ifesyen, řexyařat n ṣṣanam ɛlaḥsab řeɛqeř nsen. Aqa aten marra mɣir řxedmet n umziř. Nitni qqaren xasen: ‘Ejj iwdan inni i ɣa iwehhben tiɣarṣa ad ssudumen iyenduzen!’ ^■   3 S uyenni ad dewřen am yijj n useynu n ṣṣbeḥ u am nnda ɣar tuffut nni deɣya iɛeddun, am uřum iṭṭawen zeg unedrar u am ddexxan itteffɣen zi tburjet.

4 Necc d SIDI, AREBBI nnek, zeg wami dd-teffɣem kenniw zi temmurt n Miṣra. Cek war tᵉttessned bu arebbi nneɣni mɣir Necc u war din amsenjem mɣir Necc. ^■   5 Necc ssneɣ cek di řexřa, deg ict n temmurt n řeḥmu yareqqen. 6 Ařami iwḍen ɣar ddemnet n heddu nsen, dewřen jjiwnen. Ařami jjiwnen, innurfeɛ wuř nsen. S uyenni ttun ayi. ^■   7 S uyenni Necc dewřeɣ i nitni am weyrad izehharen, am uɣiřas řebteɣ deg webrid. 8 Necc usiɣ-dd ɣarsen am yijj n ddub wenni umi ucaren tarwa nnes u ařẓeɣ idmaren nsen u ṣarḍeɣ ten din am tizemt. Řewḥuc n řexřa mezzqen ten. ^□  

9 Man aya idweř d akeḥḥeḍ nnek, a Israil, aqa tɛekksed ayi, ḍidd i wenni iǧan d amɛawen nnek.

10 Mani iǧa xenni ujeǧid nnek? D wenni izemmaren ad cek issenjem di marra tineddam nnek! U mani ǧan řquḍat nnek umi tennid: ‘Ewc ayi ijj n ujeǧid uřa d řḥukkam?’

11 S weɣḍab inu wciɣ ac ijj n ujeǧid u s uduqqez inu n weɣḍab kkseɣ ac t. ^■  

12 Řmuɛṣiyyet n Ifrayim tᵉttwaqebbeḍ, ddnub nnes nuffaren.

13 Řeḥriq n tarwa ad ɣares dd-yas. Netta d ijj n mmis iqqim břa tiɣit, maɣar xmi arezzmen iḥenjiren řemřawřet ḥima ad ffɣen, aqa netta war din ibedd di řweqt nnes.

14 Zeg ufus n řaxart ad ten fdiɣ, ad ten fekkeɣ zi řmewt. A řmewt, mani ǧan řeḥřacat n ṭṭaɛun nnem, a řaxart, mani teǧa tarṣuḍi nnem? Ma ad nedmeɣ ɛad? Lla, aya inuffar zzat i tiṭṭawin inu. ^■  

15 Waxxa ggur Ifrayim ad iwc řɣiǧet jar aytmas, ɛad ad dd-yas ijj n usemmiḍ zi ccarq, ijj n usemmiḍ n SIDI nni i-dd i ɣa ikkaren, - tařa nnes ggur ad taẓeɣ, anu nnes ggur ad iwḍa - , ggur ad ikecceḍ ict n txabect zi mkuř řeqcuɛ iɣřan.”