1 “Ifrayim ittenneḍ ayi s uxarriq u taddart n Israil s řɣecc, maca Yahuda ittetliɛ ɛad ak-d Arebbi u ak-d Umqeddas Ameqqran d amtiqqi. 2 Ifrayim d ijj n umeksa yuyur awarni i usemmiḍ. Ass marra yarenni ixarriqen d ureddeǧ. Nitni tteggen ijj n řɛahd ak-d Accur uca ttawyen zzect ɣar Miṣra.

3 SIDI ɣares ijj n umcubbec ak-d Yahuda u Netta ad igg s Yaɛqub ɛlaḥsab ibriden nnes, ad t ixeǧeṣ am mammec timegga nnes. 4 Deg uɛeddis n yemmas iṭṭef umas ɣar unirz u řami tuɣa d aryaz ijhed immɛařa ak-d AREBBI. ^■   5 Netta tuɣa imneɣ ak-d Lmalak uca iɣřeb. Iru, iḥeccem i-t. Yufa i-t di Bayt-Il u dinni issiweř Netta akidneɣ. ^■   6 SIDI, AREBBI n řɛeskarat, SIDI d Isem nnes i řidaret. 7 Dweř ɣar AREBBI nnek, ḥḍa tamexsiwt icewwaren d řḥeqq, u sitim řebda i AREBBI nnek.

8 Kenɛan ɣares ijj n řmizan iɣecc deg ufus nnes, itteɛjib as ad ibeɛɛej. 9 Maca Ifrayim iqqar: ‘Necc dewřeɣ d bu-wagřa, yarweɣ ict n řeksibet d tameqqrant i yixef inu. Di marra řxedmet inu war dayi ttifen ca řmuɛṣiyyet nni iǧan d ddenb.’

10 Necc d SIDI, AREBBI nnek, zeg wami teffɣem kenniw zi temmurt n Miṣra. Necc ad cek jjeɣ ad tzedɣed deg iqiḍan am deg wussan n tmesmunt di řexřa. ^■  

11 Necc ssiwřeɣ ɣar inabiyyen u Necc ad arniɣ timeẓriwin aṭṭas u s ufus n inabiyyen ad wceɣ řemtuř.

12 Mařa tuɣa Jilɛad d řmuɛṣiyyet, xenni dewřen nitni xwan qaɛ di Jilɛad. Aqa qeddmen din ifunasen. Uřa d iɛalṭaren nsen dewřen d iɛurricen n iẓra di řexḍuḍ n iyyaren. ^■  

13 Yaɛqub yarweř ɣar jjwayeh n Aram u Israil tuɣa ittsexxar x yict n temɣart u yarwes taḥimart di ṭṭweɛ n yict n temɣart. ^■  

14 S yijj n unabi issgeɛɛed SIDI Israil zi Miṣra u s yijj n unabi yarwes i-t.

15 Ifrayim tuɣa isɛar i-t aṭṭas. S uyenni ad yejj SIDI idammen nnes ad xas dd-asen u Sidi nnes ad as ixeǧeṣ řḥegra nnes.”