1 “Maɣar, xzar, deg wussan nni u di řweqt nni, xmi i ɣa ssenqeřbeɣ tameḥbast n Yahuda d Urcalim, 2 ad ssmuneɣ marra řegnus, ad ten nedheɣ ɣar teɣzurt n Yahucafaṭ. Dinni ad akidsen mcarraɛeɣ minzi nitni zuzzaren řgens inu d tesɣart inu jar řegnus u minzi nitni bḍan tammurt inu. 3 Nitni ggin taqedduḥt x řgens inu u wcin ijj n weḥram d ttexřiṣet i temɣart n farq-ccɣeř u ict n teḥramt temmenz i binu, ḥima nitni zemmaren ad swen.

4 U ɛawed, min ɣarwem akidi, Ṣur d Ṣidun d marra jjwayeh n Filicit. Ma texsem ad ayi txeǧṣem min ggiɣ? Maca mařa texsem ad ayi txeǧṣem, Necc ad ssɛeqbeɣ deɣya u s tazřa min teggim x izeǧifen nwem, 5 minzi kenniw tekksim nnuqart d wureɣ inu u minzi kenniw tiwyem řeqcuɛ inu yiɣřan ɣar tzawiyyin nwem. 6 Kenniw tᵉzzenzem iḥenjiren n Yahuda d iḥenjiren n Urcalim i iḥenjiren n Yunan ḥima ad ten tessiggʷejem x temmurt nsen. 7 Xzar, Necc ad ten ssekkareɣ zeg wemcan mani ten tezzenzem u ad ssɛeqbeɣ min teggim x izeǧifen nwem. 8 Ad zzenzeɣ iḥenjiren nwem d yessitwem deg ufus n iḥenjiren n Yahuda u yina ad ten zzenzen i Isaba’iyyen, ijj n řgens iggʷej aṭṭas, maɣar SIDI aqa issiweř.”

9 “Řaɣam aya jar řegnus, qeddsem amenɣi, sekkarem ayt n bu-teɣruḍt, jjem marra iɛeskariyyen ad dd-qarrben, ad geɛɛden i umenɣi.

10 Ḥeddem dduzan nwem d řesyuf uřa d řemwas nwem n wezbar ař ɣa dewřen d fřitcat, ejj wenni iḍeɛfen ad yini: ‘Necc d aryaz ijhed!’

11 Azzřem u tasem-dd, a marra řegnus i dd-innḍen. Sneddeh ɣar dinni, a SIDI, ayt nnek n bu-teɣruḍt!

12 Jjem řegnus ad kkaren ad geɛɛden ɣar teɣzurt n Yahucafaṭ. Maɣar dinni ad qqimeɣ Necc ḥima ad carrɛeɣ marra řegnus i-dd-innḍen.

13 Ggem amjar dayes, maɣar ṣṣabet tenngʷa, asem-dd, hwam, minzi tasirt n uḍiř teccur u ṣṣwarej n tsirt feyyḍen, maɣar taɛeffant nsen d tameqqrant.” ^■  

14 “Ibarruten, ibarruten di Teɣzurt n Teřwiḥt Itteḥruǧuḍen n Usarwet, maɣar ass n SIDI yudes, di Teɣzurt n Teřwiḥt Itteḥruǧuḍen i Usarwet.

15 Tafuct d tziri bbarcnent, itran arrin tafawt nsen. ^■  

16 SIDI ad izehhar zi Ṣihyun u ad yarr tmijja nnes ad ittwaseř zi Urcalim ařami ijenwan d temmurt ad arjijen, maca SIDI d adurri i řgens nnes d lburj i ayt n Israil.”

17 “Ad tessnem, aqa Necc d SIDI, AREBBI nwem, wenni izeddɣen x Ṣihyun, adrar inu iqeddsen u tandint n Urcalim ad tiři d Zzawect Iqeddsen. Ɛemmarṣ ad tt ccuqen ibarraniyyen.” ^■  

18 “Deg wass nni ad imsar aqa idurar ad udmen s binu ẓemmen t jdid u tiwririn ad ssefyent s uɣi d marra tiɣezratin n Yahuda ad daysen ttazzřen waman u yict n tařa ad tedduqqez di Taddart n SIDI, ad tfeyyeḍ teɣzurt n Ciṭṭim. ^■  

19 Miṣra ad tedweř d ict n řxarbet u Idum d ijj n řexřa yarebbej zi ssibbet n lɛunf i ggin ḍidd i ayt n Yahuda nni zi ssizzřen nitni idammen imezdagen di temmurt nsen. 20 Tammurt n Yahuda maca ad teqqim i řebda u Urcalim zi jjiř ař jjiř. 21 Necc ad ḥesbeɣ idammen nsen, inni tyɣa ḥessabeɣ war izdigen, d imezdagen u SIDI ad izdeɣ di Ṣihyun.”