Tameẓriwt tamezwarut: iburexsen
7
1 “Man aya isscen ayi tt Sidi inu, SIDI! Xzar, Netta igga iburexsen umi tuɣa arrbiɛ aneggar ibedda ad issuffeɣ. Xzar, tuɣa-t d arrbiɛ aneggar awarni ma ḥetcen arrbiɛ i ujeǧid. 2 Imsar, umi kemmřen nitni zi macca n uɣemmuy aziza n temmurt, necc nniɣ: ‘A Sidi inu, SIDI, sameḥ maca! Mammec i ɣa izemmar Yaɛqub ad iqqim ad ibedd, aqa netta d ameẓyan!’ 3 Xenni indem SIDI x man aya. War ittiři!, inna SIDI.”
Tameẓriwt wiss tnayen: timessi ihellken
4 “Man aya isscen ayi tt Sidi inu, SIDI:
Xzar, Sidi inu, SIDI, iřaɣa-dd i umenɣi s tmessi uca timessi tecca aman imeqqranen yuǧɣen u ggur ad tecc uřa d tasɣart n řwart. □ 5 Necc nniɣ: ‘A Sidi inu, SIDI, sbedd maca! Mammec i ɣa yegg Yaɛqub ad iqqim ibedd, aqa netta d ameẓyan!’ 6 Xenni indem SIDI x man aya. ‘War ittiři!’, inna Sidi inu, SIDI!”
Tameẓriwt wiss třata: plumu n řḥiḍ
7 “Man aya isscen ayi tt Netta:
Xzar, Sidi inu ibedd x yijj n řḥiḍ i ittwagg s plumu u yijj n plumu tuɣa deg ufus nnes. 8 Inna ayi SIDI: ‘Min tᵉttwarid cek, Ɛamus?’ Necc nniɣ: ‘Ijj n plumu!’ Řexdenni inna SIDI: ‘Xzar, Necc ad arreɣ plumu inu di řwest n řgens n Israil. Necc war xas ɛedduɣ ɛad! 9 Řegɛudi n Isḥaq ad ttwareddǧent u tizawiyyin iqeddsen n Israil ad dewřent d řxarbet u Necc ad kkareɣ x taddart n Yarubɛam s ssif.’ ”
Ajeǧid Amaṣya ixs ad yaẓẓeř x Ɛamus zi temmurt
10 Řexdenni issekk Amaṣya, akehhan di Bayt-Il, ijjen ɣar Yarubɛam, ajeǧid n Israil, inna: “Ɛamus igga ijj n řɛahd ḍidd i cek, di řwest n taddart n Israil. Tammurt war tzemmar ad teksi awařen nnes.
11 Maɣar ammu i iqqar Ɛamus: ‘Yarubɛam ad ittwaneɣ s ssif u Israil ad ittwandeh ɣar lmenfa, ad t ssiggʷejen x wudem n temmurt nnes.’ ”
12 Xenni inna Amaṣya i Ɛamus: “A cek, amwařaw, ruḥ, arweř ɣar temmurt n Yahuda! Ecc dinni aɣrum u nabb dinni!
13 Di Bayt-Il maca war tzemmared ad tnebbid ɛad, minzi nettat d zzawect iqeddsen n ujeǧid u nettat d taddart n tageldit.”
14 Yarra-dd Ɛamus, inna i Amaṣya: “Necc war ǧiɣ d anabi u necc war ǧiɣ d mmis n unabi, maca necc tuɣa ayi d bu-řebhayem uřa d ijj n weryaz nni iřeqqḍen tazart taburect.
15 SIDI ikkes ayi zi ḍeffar n wuǧi u SIDI inna ayi: ‘Uyur, nabb i řgens inu Israil!’
16 Xenni řexxu, seř i wawař n SIDI, cek d wenni iqqaren: ‘War iɛeddeř ad tnebbid ḍidd i Israil u ad tessudmed awař n SIDI x taddart n Isḥaq!’ ■
17 S uyenni iqqar SIDI: Tamɣart nnek ad tessefsed ixef nnes di tendint u iḥenjiren nnek d yessic nnek ad wḍan s ssif u tammurt nnek ad tt bḍan s ufiřu n řeɛbar u cek ad temmted deg ict n temmurt texmej u s tidett Israil ad tᵉttwaṭṭef di lmenfa barra i temmurt nnes.”