1 “Sřem awař-a nni i xawem ssekkareɣ, ijj n yezři n ugejdur, a taddart n Israil.

2 “Aqa tewḍa teɛzarect Israil, war tᵉttekkar ɛad.

Nettat temmenḍar ɣar temmurt nnes,

war din uřa d ijj i tt ɣa issbedden.”

3 “Maɣar ammu i iqqar Sidi inu, SIDI: Tandint nni i ɣa iffɣen s wařef n yeryazen, ad as tceṭṭ mya, u tenni i ɣa iffɣen s mya, ad as tceṭṭ ɛecra i taddart n Israil. 4 Maɣar ammu i iqqar SIDI ɣar taddart n Israil: Arzum xafi, xenni ad teddarem!” 5 War tarezzfem Bayt-Il, war dd-tᵉttisem ɣar Jiljal u war ɛeddum x Bi’r-Sebɛa, minzi s tidett Jiljal ad ittwandeh ɣar lmenfa u Bayt-Il ad tᵉttwabeṭṭeř. ^■   6 Arzum x SIDI, xenni ad teddarem, ḥima Netta war ittidif ɣar taddart n Yusuf am ict n tmessi ittetten u war din ittiři uřa d ijj maḥend ad tt issexsi di ṭṭweɛ n Bayt-Il.”

7 “Axeyyeb i yenni ittarran řḥeqq ɣar cciḥ u inni isshekkʷan tasegda ɣar temmurt. 8 Netta d wenni iggin Ipliyaden d Uriyun d wenni ittarran tiři n řmewt d tuffut n řḥař uřa d ass ittarran t d ǧiřet, wenni ittřaɣan i waman n řebḥar u ifarreɣ i-ten tiwa i temmurt, aqa SIDI d Isem nnes. ^■   9 Igga ad dd-yas wareddeǧ am wassam x wenni ijehden u yarra areddeǧ ad dd-yas x lqelɛa.

10 Nitni carrhen wenni iddafaɛen x řḥeqq di tewwart n tendint u nitni ttɛiffan wenni issawařen nican.

11 S uya, minzi kenniw tɛeffsem x umuqřiř u tᵉttkessem zzayes řeɛcur n imendi: waxxa tebnam tudrin nwem s weẓru yuydan, war daysent tzeddɣem, waxxa teẓẓum tizayarin cnant deg imarjaɛen, war zzaysent tsessem binu. ^■  

12 Maɣar Necc ssneɣ aṭṭas n iɛeddiyen nwem u aqa ddnub nwem sseggʷaden. Nitni ḥeṣṣaren amsegged, ttᵉṭṭfen tmenyat n řɣecc u ɛarrnen imezřaḍ ɣar barra di tewwart n tendint.

13 S uyenni ad isseɣd umiɣis di řweqt nni, maɣar ad tiři d ict n řweqt d taɛeffant.”

14 “Arzum min iṣebḥen, war iǧi min iɛeffnen, xenni ad kidwem yiři SIDI, AREBBI n řɛeskarat, am mammec t teqqarem kenniw.

15 Carhem min iɛeffnen, texsem min iṣebḥen u smetnem řḥeqq di tewwart n tendint. Ad taɣ ad iḥinn SIDI, AREBBI n řɛeskarat x min iqqimen n Yusuf. ^■  

16 S uyenni, ammu i iqqar SIDI, AREBBI n řɛeskarat, Sidi inu: Di marra izuray ad tiři tɣuyyit n wecḍan u di marra zznaqi ad inin: ‘Ayyaw! Ayyaw!’, u nitni ad řaɣan x ufeǧaḥ maḥend ad icḍen u x yenni issnen izřan n wecḍan maḥend ad sɣuyyen s wecḍan.

17 Di marra imarjaɛen n uḍiř ad din tiři tɣuyyit n wecḍan, maɣar Necc ad cuqeɣ di řwest nnek, iqqar SIDI.”

18 “Ayyaw i yenni ittmeẓren deg wass n SIDI! Min ɣarwem i ɣa yiři wass n SIDI? Ad yiři d taǧest, war ittiři d tafawt. ^■  

19 Ad yiři amecnaw ca n ijj i yarewřen zeg wayrad, xenni yusa-dd ɣares ddub, niɣ amecnaw ca n ijj i yudfen ɣar taddart, iɛemmed s ufus nnes x řḥiḍ, xenni izɛef i-t ijj n ufiɣar. 20 Ma war ittiři ass n SIDI d taǧest u war iǧi d tfawt? Ṭṭřam u war din uřa d ict n jjurret n tfawt?!”

21 “Necc carrheɣ, ɛiffeɣ uraren nwem u war ttexseɣ ad cemmeɣ imuniten nwem ifarzen. ^■   22 Maɣar waxxa kenniw tiwyem ayi-d tiɣarṣa n wecmaḍ d tewhibin n řɣiǧet, Necc war xasent areṭṭiɣ ca u Necc war xezzareɣ walu ɣar tewhibt n řehna n řmař iṣeḥḥen. 23 Siggʷej xafi ddriz n izřan nnek, war xseɣ ad sřeɣ řḥess n lharpat nnek. 24 Ejj řḥukm ad yazzeř am waman ittazzřen u tasegda am yijj n yeɣzar ittazzřen řebda.”

25 “Ma tiwyem ayi-dd tiɣarṣa d tewhibt n řɣiǧet di řexřa arebɛin n iseggʷusa, a taddart n Israil? ^■   26 Kenniw tarbum iqiḍan n ujeǧid nwem d uḍar i xef tuɣa ttbeddan řexyařat nwem, i yetri n irebbiten nwem, inni teggim i yixef nwem.

27 Necc ad kenniw nedheɣ ɣar lmenfa, aɣirin i Dimacq, ammu i iqqar SIDI, AREBBI n řɛeskarat, aqa d wa d Isem nnes.”