1 “Sřent, awař-a, a tiyenduzin n Bacan nni iǧan x wedrar n Samarya, tinni iḥeṣṣaren imuqřiřen, tinni iɛeffsen x imezřaḍ, tinni iqqaren i aytbab nsen: ‘Awyem-dd ca ařami i ɣa nessu!’ 2 Sidi inu, SIDI, ijjuǧ s tqeddast nnes, aqa ad xakent dd-kken wussan, ad kennint kksen s iɣantcuten u min zzaykent iqqimen s tṣennarin n iseřman. 3 Kennint ad teffɣent zi tizzeyyin n řeḥyuḍ, kuř ict n temɣart nican ɣar zzat. Kennint ad ttwasekkent ɣar Harmun, ammu i iqqar SIDI.

4 Iwa, asem-dd ɣar Bayt-Il u ɛeddam, asem-dd ɣar Jiljal u arnim deg iɛeddiyen nwem. Iwa, awyem-dd tiɣarṣa nwem kuř ṣṣbeḥ d řeɛcur nwem ict n twařa di třata n wussan! ^■   5 Iwa, sbexxar ict n tewhibt n uqadi s weɣrum ak-d wentun u řaɣam maḥend ad qeddmen tiwhibin s řxaḍar, barrḥem zzayes, maɣar ammu i d awem itteɛjib, a ayt n Israil, ammu i iqqar Sidi inu, SIDI.” ^■  

6 “Ɛawed Necc jjiɣ awem tazdugi n teɣmas di marra tineddam nwem u tuqřič n weɣrum di marra imucan nwem mani tzeddɣem. Qaɛ amenni maca kenniw war dd-tedwiřem ɣari, iqqar SIDI.

7 Necc ssbeddeɣ xawem anẓar umi din ɛad třata n iyuren ař tmeyra u Necc ggiɣ ad iwwet wenẓar x ict n tendint, maca di tendint nneɣni war ggiɣ ad iwwet wenẓar. Ijj n yeyyar immewc as wenẓar, u iyyar nneɣni i x war iwti wenẓar, inẓeɣ. 8 Tnayen, třata n tneddam uyurent ttenhezzant ɣar ict n tendint nneɣni maḥend ad swent aman, maca nitenti war jjiwnent ca. Qaɛ amenni maca kenniw war dd-tedwiřem ɣari, iqqar SIDI.

9 Necc wtiɣ kenniw s imendi ittwascemḍen zeg usemmiḍ, s jjriḥect n tcejjart. Aṭṭas n iḥwicen nwem d imarjaɛen nwem d wurtan nwem d tzitunin nwem aqa icca i-ten bu-weqḍeɛ. Qaɛ amenni maca kenniw war dd-tedwiřem ɣari, iqqar SIDI. ^■  

10 Necc ssekkeɣ-dd jar awem ṭṭaɛun, amecnaw di Miṣra. Necc nɣiɣ iḥudriyen nwem s ssif, iysan nwem nedheɣ ten d takeccaḍṭ u arriɣ arriḥet n řɛeskarat nwem ad tgeɛɛed ař wenzaren nwem. Qaɛ amenni maca kenniw war dd-tedwiřem ɣari, iqqar SIDI.

11 Necc ssenqeřbeɣ kenniw am mammec tuɣa issneqřab AREBBI Sadum d Ɛamurra. Tuɣa kenniw amecnaw ijj n ukeccuḍ di tmessi nni dd-ittwaqeřɛen zeg uḥaduq n tmessi. Qaɛ amenni maca kenniw war dd-tedwiřem ɣari, iqqar SIDI. ^■  

12 S uyenni Necc ad ac ggeɣ aya, a Israil! Minzi Necc ad ac ggeɣ man aya, ḥezzem ixef nnek, a Israil, maḥend ad temmeřqid ak-d AREBBI nnek.

13 Maɣar xzar, d Netta i ikewwnen idurar u ittejja-dd aṣemmiḍ u isscan min di ittxarreṣ, d wenni ittarran tuffut n řḥař d taǧest u iggur tiwa i řegɛudi n temmurt, aqa: SIDI, AREBBI n řɛeskarat d Isem nnes.” ^■