9
1 “Israyil, war farreḥ ca niɣ ad tesřiwřiwed am řegnus. Maɣar tiggʷejed x AREBBI nnek am tessefseded ixef nnek. Tettexsed řmunet n ict n temɣart n farq-ccɣeř di marra inedrar n usarwet n imendi. 2 Andrar d tsirt n uḍiř war d asen sseccen ca u binu n jdid ad tt ixeyyeb. 3 Nitni war ttɣiman ca di temmurt n SIDI. Ifrayim ad dd-idweř ɣar Miṣra u nitni ad ccen min ixemjen di Accur.
4 Nitni war seyyben ca binu i SIDI u tiɣarṣa nsen war xas areṭṭant. Ad asen iřint am weɣrum n yinni iceṭṭnen. Marra inni t iccen, ad dewřen xemjen, maɣar aɣrum nsen ad yiři i řeɛmar nsen, war dd-ittis walu di Taddart n SIDI. 5 Min i ɣa teggem xenni deg ijj n wass n řɛid ittwaggen, deg ijj n wass n řɛid i SIDI? 6 Xẓar, aqa nitni ttaggʷejen zi ssibbet n ureddeǧ. Miṣra ad ten issmun, Muf ad ten tenḍeř. Irezzazen ad meẓẓren di nnuqart nsen, cbarq ak-d isennanen ad iṭṭef amcan n iqiḍan nsen. □
7 Aqa ussan n ujarreb usin-dd, aqa ussan n lɛiqab usin-dd. Nitni ad t ssnen, inni n Israil. Anabi d abuhaři, aryaz arruḥani d ijj n bu-jnun zeg waṭṭas n řmuɛṣiyyet nnek d waṭṭas n řeɛdawet nnek. 8 Ifrayim iṣweḍ ak-d AREBBI inu. Anabi ittaf ijj n řfex n unegmar di marra ibriden nnes, řeɛdawet di Taddart n AREBBI nnes. 9 Aqa aten ɣarqen ař iři amecnaw deg wussan nni n Jibɛa. Netta ad iɛqeř x řmuɛṣiyyet nsen u ad ixřef ddnub nsen.
10 Necc ufiɣ Israil am uḍiř di řexřa, ẓriɣ ibabaten nwem am imenza n wartu di temẓi nsen. Nitni maca udfen ɣar Baɛl-Faɣur uca wcin ixef nsen s řefḍiḥet i netta uca nitni dewřen d nnɛawat am wenni tuɣa ttexsen. ■
11 X yenni n Ifrayim, aqa aɛuǧi nsen ad iḍu am wejḍiḍ, ad yaggʷej x wexřaq u x uɛeddis n yemmas u x tkessit n tarwa.
12 Waxxa nitni ssyamen iḥenjiren nsen ař ɣa mɣaren, Necc ad ten arreɣ nhřa iḥenjiren ařami war din iqqim bnadem. Maɣar uřa i nitni s tidett, uct, xmi xasen ɣa ḥeyydeɣ.
13 Axmi ẓriɣ Ṣur, ammu i ittwaẓẓu Ifrayim deg ict n jjihet arḍan. U řexxu ittxeṣṣa i Ifrayim ad isellem tarwa nnes i uneqqam.
14 Ewc asen, a SIDI! Min d asen i ɣa tewced? Ewc asen ijj n uɛeddis s weṭṭuw n iseyman d yebbac yuẓɣen. ■
15 Marra taɛeffant nsen tɛarra di Jiljal, maɣar dinni carheɣ ten x tɛeffant n tmegga nsen. Necc ad xasen aẓẓřeɣ zi taddart inu. Ɛemmarṣ ɛad ad ten xseɣ, marra řḥukkam nsen d imɣewwɣen. ■
16 Ifrayim ittwawwet, iẓewran nsen uẓɣen, war ttirwen ɛad. Waxxa nitni ttarwen, Necc ggur ad nɣeɣ imɛizzan n uɛeddis nsen.
17 AREBBI inu ad ten inḍar, maɣar nitni war ɣares ttesřin u nitni ad dewřen tᵉttliɛen jar řegnus.”