1 “Ggem icc n icarri i uṣuḍi ɣar uqemmum nnek. Amecnaw ijj n ugider iṭṭaw sennej i Taddart n SIDI, maɣar nitni ɛeddan x Řɛahd inu u ɣewwɣen x Ccariɛa inu. ^■   2 Nitni ad xafi dd-řaɣan: ‘AREBBI inu, neccin, Israil, aqa nessen Cek!’ 3 Israil inḍar min iṣebḥen, řeɛdu ad t iḍfar.

4 Nitni ggin xasen ijeǧiden, maca nitni war ǧin ca zzayi, nitni areccḥen řḥukkam, maca Necc war t ssineɣ. Nitni ggin ṣṣanam i yixef nsen, s uyenni ad ittwaqess řgens. 5 Ayenduz nnek, a Samarya, d taɛenkrift. Aɣḍab inu yareqq qibač nsen. Ař meřmi ɣa qqimen nitni war zemmaren ad ksin tazdugi? ^□   6 Maɣar iffeɣ-dd řexyař n ṣṣanam zi Israil, aqa ijj n bu-ṣṣenɛet igga i-t u wanita war iǧi d AREBBI. Wah, ad iwḍa d iwetwiten, ayenduz n Samarya.

7 Maɣar nitni zarrɛen asemmiḍ u mejjaren taḥaryaḍt. War ttifen tidrin ɣar iɣedduyen, u zeg imendi ibedden war zzaysen tteggen ssmid, niɣ ad ittwagg, maca ad t ṣarḍen ibarraniyyen.

8 Aqa Israil ittwaṣarḍ. Řexxu dewřen am ict n řqecɛet jar řegnus, war dd-tusi x řxaḍar i ḥed. 9 Maɣar nitni geɛɛden ɣar Accur. Ijj n weɣyuř n řexřa ittɣima i yixef nnes waha, maca inni n Ifrayim carran i imḥibban.

10 Waxxa nitni zzenzen ixef nsen i řegnus, maca ggur řexxu ad ten yarweɣ. Nitni zemmaren ad ggen mɣir drus waha zi ssibbet n zzeyyar n ujeǧid d řḥukkam.

11 Maɣar Ifrayim igga iɛalṭaren nnes d aṭṭas ḥima ad zzaysen iddenb. Aqa dewřen d iɛalṭaren n ddenb i netta.

12 Necc uriɣ asen aṭṭas n tmesřayin zi Ccariɛa inu,¸ maca ḥesben xasent am ca n řḥajjet d taɣribt.

13 X ṣṣdaqi n tɣarṣt inu, aqa nitni wehhben aysum nsent uca ttᵉtten zzayes, maca SIDI war zzaysen yareṭṭi. Řexxu ad ixarreṣ di řmuɛṣiyyet nsen u Netta ad ixeǧeṣ ddnub nsen. Ad dd-dewřen ɣar Miṣra.

14 Maɣar Israil ittu wenni t iggin uca ibna tizawiyyin uca ikettar Yahuda tineddam ifaryen, maca Necc ad ssekkeɣ ict n tmessi di tneddam nnes, ad tecc řeqṣur nnes.”