1 “Am ssgenfiɣ Israil, tᵉttwaɛarr řmuɛṣiyyet n Ifrayim d tuɛeffna n Samarya, maɣar nitni tteggen s řɣecc uca aceffar ittadef u ict n bandiyya tᵉttkeccaḍ di barra. 2 War qqaren ɛemmarṣ deg wuř nsen aqa Necc ad xarrṣeɣ di marra řɣar nsen. Xenni řexxu, tenneḍ asen tmegga nsen, aqa atent zzat i wudem inu.

3 Nitni ssfraḥen ajeǧid s řɣar nsen u řḥukkam ssfraḥen ten s ixarriqen nsen. 4 Nitni marra d imzennayen, aqa aten am yijj n ufarran nni ittwaseḥman zeg uxebbaz. Wanita ad issbedd zeg ucemmuḍ xmi arecti nni iggʷa aqa ismem qaɛ. 5 Deg wass n ujeǧid nneɣ ssheřcen t řḥukkam s řḥaduq n binu. Netta isswiẓẓeḍ afus nnes i yimestehzayen.

6 Xmi dd-ttqarraben, yareqq uř nsen am yijj n ufarran zi tḥraymect nsen. Itteṭṭeṣ uxebbaz nsen ǧiřet tekmeř. Ƴar ṣṣbeḥ yareqq ufarran am tmessi itteḥduduqen. 7 Nitni marra ḥemman am yijj n ufarran u nitni ttᵉtten řquḍat nsen. Marra ijeǧiden nsen ad wḍan, war din uřa d ijj jar asen i dd xafi ɣa iřaɣan.

8 Ifrayim ijja ixef nnes issur jar řegnus, Ifrayim d ict n tefḍiřt war tᵉttwasneqřeb ca. ^■   9 Ibarraniyyen sarḍen jjehd nnes, war akides ittici. Uřa d acewwaf nnes ittcab, war akides ittici.

10 Aɛeffar n Israil ad xas idɛa, maɣar nitni war ddikkwiřen ca ɣar SIDI, AREBBI nsen, u war t arzun ca di marra man aya. ^■  

11 Ifrayim igga am ict n tedbirt war dayes řefhamet. Nitni ttřaɣan x Miṣra, gguren ɣar Accur.

12 Xmi gguren nitni, ttbezzaɛeɣ Necc tracca inu xasen, ad ten dd-ssehwiɣ am ijḍaḍ n ujenna, ad ten webbxeɣ x useř di tmesmunt nsen.

13 Uct xasen maɣar nitni arewřen zzayi. Akeḥḥeḍ xasen, maɣar nitni ɛeddan xafi. Necc ggiɣ ad ten fdiɣ, maca nitni nnan xafi ixarriqen.

14 Nitni war dd-sɣuyyen ca ɣari s wuř nsen, xmi ṭṭṣen nitni x rectu nsen ttcetcan. Nitni ttmunan di ṭṭweɛ n imendi d binu n jdid, aqa ttɣennan xafi.

15 Necc darrbeɣ u ssjehdeɣ iɣaǧen nsen, maca nitni ttxarraṣen dayi di řɣar.

16 Nitni ttɛaqqaben, maca war iǧi ɣar Umɛuǧi x kuřci. Aqa aten am yijj n řqews ixeṭṭan, řḥukkam nsen weṭṭan zi ssif, zi semm ineqqen n yiřes nsen. S uyenni ad xasen ggen tiḍeḥḥac di temmurt n Miṣra.” ^■