1 “Asem-dd, ad dd-nedweř ɣar SIDI, maɣar Netta iqezzar u řexxu ad aneɣ issgenfa, Netta iwta u řexxu ad aneɣ ijbar. 2 Awarni i tnayen n wussan ad aneɣ isseddar, deg wass wiss třata ad aneɣ issnekkar u neccin ad neddar zzat i wudem nnes. 3 Xenni ad nessen, ad neḍfar maḥend ad nessen SIDI. Ufuɣ nnes imten am tuffut n řefjar. Ad ɣarneɣ dd-yas am wenẓar, am wenẓar n arrbiɛ nni issarḍaben tammurt.”

4 Min akidek ɣa ggeɣ, a Ifrayim, min akidek ɣa ggeɣ, a Yahuda. Tamexsiwt nwem icewwaren tᵉttegg amecnaw aseynu ɣar teffut u amecnaw nnda igeɛɛden uca xenni iqeṭṭa. 5 S uyenni Necc qesseɣ ten s tmijja n inabiyyen am s ijj n uyeřzim. Necc nɣiɣ ten s wawařen n uqemmum inu. Řḥukem xak amecnaw tfawt innufsřen. 6 Minzi ttexseɣ tamexsiwt icewwaren, war iǧi taɣarṣt, u tussna n SIDI ttexseɣ tt x tɣarṣa n wecmaḍ.” ^■  

7 “Nitni ɛeddan x Řɛahd am Adam, dinni i d ayi ɣdaren. ^■   8 Jilɛad d ict n tendint n yinni itteggen řmuɛṣiyyet, teccur s idammen. 9 Am yijj n bandiyya n ixewwanen nni ittrajan ca n yijjen, ammu i teǧa terfiqt n ikehhanen. Nitni neqqen deg webrid i dd ittawyen ɣar Cakim, maɣar nitni tteggen řefḍayeḥ waha.

10 Necc ttwařiɣ min issnexřaɛen di taddart n Israil, xzar, farq-ccɣeř n Ifrayim, Israil tessexmej ixef nnes.

11 Uřa i cek, Yahuda, aqa temmars ict n ṣṣabet xmi i dd ɣa ssɛeqbeɣ imeḥbas n řgens inu.”