10
1 “Israyil d ict n tzayart tewseɛ, tenni i dd ittawyen řɣiǧet i yixef nnes. Mammec tuɣa řɣiǧet nnes temmarni, ammu i dd-mmarenyen uřa d iɛalṭaren nnes, mecḥař tecna temmurt nnes, ammu i ggin nitni uřa d imayḍuten iqeddsen cnan. ■ 2 Uř nsen aqa ittwabḍa, řexxu aqa daysen řɛib. Netta ad yarẓ iɛalṭaren nsen, Netta ad ihdem imayḍuten nsen iqeddsen 3 Maɣar řexxu qqaren: ‘Neccin war ɣarneɣ bu ujeǧid, maɣar neccin war neggʷid ca SIDI u ɛad mařa tuɣa din ajeǧid: ‘Min izemmar ad aneɣ igg?’ ■ 4 Ssawařen awařen ixwan, ttjaǧan ẓur, tteggen ijj n řɛahd uca řḥeqq idweř ittgeɛɛed am yijj n řeɛceb amesmum di řexḍuḍ n iyyaren. 5 Imezdaɣ n Samarya ad dewřen tteggʷeden zi ssibbet n ṣṣanam n uyenduz n Bayt-Awan, maɣar řgens nnes ad xas icḍen uca ikehhanen nnes ad xas ceḍnen ɛawed, x uɛuǧi nnes, maɣar wanita ittwakkes zzayes. 6 Ad t awyen ɣar Accur, d tarzeft i ujeǧid Yarib. Ifrayim ad igg řefḍiḥet i uzeǧif nnes u Israil ad isseḍḥa zi lqarar nnes. 7 Ittwassesqar ujeǧid n Samarya am ukuffu x wudem n waman. 8 Ad ttwahedment řegɛudi n Awan, ddenb n Israil. Isennanen d tzeggʷart ad uɛřan x iɛalṭaren nsen u nitni ad inin i idurar: ‘Dřem aneɣ!’ u i tewririn: ‘Wḍant-i-dd xaneɣ!’ ■
9 Zeg wussan n Jibɛa cek teggid ddnub, a Israil. Dinni qqimen nitni bedden, iwa war ten iřeqqif řatar n umenɣi ak-d tarwa n tuɛeffna di Jibɛa. ■
10 Aqa dayi meẓri ḥima ad ten carfeɣ u ad xasen ssmuneɣ řegnus xmi ten ɣa carfeɣ s tnayen n ixeṭṭan nsen.
11 Ifrayim d ijj n tyenduzt ittwadarrben, tᵉttexs ad tessarwet. Necc ɛduɣ x tcuni n yiri nnes. Necc ad nedheɣ Ifrayim, Yahuda ad icarz, Yaɛqub ad inqec temmurt i yixef nnes. □
12 Ma tzarrɛem tasegda i yixef nwem, ma tᵉmmejjarem tamexsiwt icewwaren maḥend ad zzayes tɛemmarem aqemmum nwem, ma tcarrzem ijj n yeyyar ixwa i yixef nwem maḥend ɛad řḥař x tarezzut x SIDI, ař dd ɣa yas Netta u ad ittarra tasegda ad xawem teccat am wenẓar. ■
13 Aqa kenniw tcarzem min war iḥřin, tṣeyyfem řmuɛṣiyyet, teccim řɣiǧet n uxarriq, maɣar cek tᵉttecřed x webrid i tixḍared simant nnek, x ubarru n ayt n bu-teɣruḍt nnek.
14 Ad ikkar ijj n ddriz n umenɣi ḍidd i řgens nnek u marra řeqṣur nnek ad ttwahedmen am mammec ihdem Calman Bayt-Arbil deg wass n umenɣi. Aqa ict n yemmas řebzen tt ak-d iḥenjiren nnes.
15 Ammu i igga Bayt-Il akidwem zi ssibbet n tuɛeffna nwem yuǧɣen. Ɣar řefjar ad ittwaseɣḍ ujeǧid n Israil s ijj n useɣd qaɛ.”