1 “Ammu i iqqar Sidi inu, SIDI: Tawwart n řemraḥ n daxeř nni ixezzaren ɣar ccarq, ad tiři tbelleɛ di setta n wussan n řxedmet. Deg wass n ssebt ad tennurzem uřa x wass n uyur n jdid ad tennurzem. 2 Ad dd-yadef řḥakem s ukulwar n wesqif n řebni n tewwart uca ad ibedd ɣar ṭṭarf n řebni n tewwart. Ikehhanen ad sswejden tiɣarṣa nnes n wecmaḍ d tɣarṣa nnes n tmessi u netta ad isjed x tnebdat n tewwart uca ad zzayes iffeɣ ɛawed. War ttbelliɛen tawwart ař tameddit. 3 Řgens n temmurt ad isjed zzat i wadaf n řebni n tewwart, x wussan n ssebt u x wussan n uyur n jdid, zzat i wudem n SIDI. 4 Taɣarṣt n wecmaḍ nni i ɣa dd-issqarreb řḥakem n SIDI deg wass n ssebt, ad tiři setta n izmaren icnan d ijj n icarri icna. 5 Tawhibt n řɣiǧet ad tiři ijj n ifa i yijj n icarri, u i izmaren ad tiři tewhibt n rɣiǧet min izemmar ufus nnes ad t yawi, uca xenni arni ijj n uhinu n zzect i kuř ifa. 6 Deg wass n uyur n jdid: ijj n uyenduz, ameẓyan n ufunas, icnan aṭṭas, u setta n izmaren d ijj n icarri. Ittxeṣṣa ad iřin cnan aṭṭas. 7 Am tewhibt n řɣiǧet ad issewjed ijj n ifa i kuř ayenduz u ijj n ifa i kuř icarri u i izmaren anect izemmar ufus nnes ad t yawi, u zi zzect ittxeṣṣa ad issewjed ijj n uhinu i kuř ifa.

8 Xmi i ɣa yadef řḥakem, ad yadef zeg ukulwar n wesqif n řebni n tewwart uca ad iffeɣ zeg ukulwar nnes ɛawed. 9 Xmi dd ɣa yas řgens n temmurt zzat i wudem n SIDI deg wussan ittwaggen n řeɛyudat, ittxeṣṣa wi i ɣa yadfen zeg ukulwar n řebni n tewwart n ccamal ad isjed, ad iffeɣ s ukulwar n řebni n tewwart n ljanub, u wi i ɣa yudfen s ukulwar n řebni n tewwart n ljanub, ad iffeɣ s ukulwar n řebni n tewwart n ccamal. War iddikkwiř zi řebni n tewwart mani dd-yudef, maca ad dd-iffeɣ zi tenni yeǧan arendad nnes.

10 Řḥakem ad yadef di řwest nsen xmi i ɣa yadfen u xmi dd ɣa ffɣen, ad dd-ffɣen jmiɛ.

11 Di řeɛyudat u deg wussan ittwaggen n řɛid ad tiři tewhibt n řɣiǧet d ijj n ifa i kuř ayenduz u ijj n ifa i kuř icarri u i izmaren anect izemmar ufus nnes ad t yawi, uca xenni arni ijj n uhinu n zzect i kuř ifa.

12 Xmi i ɣa issewjed řḥakem ict n tewhibt n řxaḍar, ict n tɣarṣt n wecmaḍ niɣ tiwhibin n řehna am tewhibt n řxaḍar i SIDI, xenni ad as arzmen tawwart nni ixezzaren ɣar ccarq. Netta ad issewjed taɣarṣt nnes n wecmaḍ d tewhibin nnes n řehna, am mammec tent issewjed deg wass n ssebt, u xmi i ɣa iffeɣ ad bellɛen tawwart awarni řami iffeɣ netta.

13 Kuř ṣṣbeḥ ad tesswejded ijj n izmar n ijj n useggʷas, icnan qaɛ, am tewhibt n wecmaḍ i SIDI.

14 Ittxeṣṣa ad kides tesswejded di kuř ṣṣbeḥ ict n tsittut n ijj n ifa d ict n ttuřut n ijj n uhinu n zzect maḥend ad zzayes tessuffed aren, am tewhibt n řɣiǧet i SIDI. Aqa d tiweṣṣa ittduman i řebda, i marra ikuden.

15 Nitni ad sswejden izmar d tewhibt n řɣiǧet d zzect di kuř tiwecca am tɣarṣt n tmessi n řebda.”

16 “Ammu i iqqar Sidi inu, SIDI: Xmi i ɣa iwc řḥakem ict n tarzeft i yijj zeg iḥenjiren nnes, xenni man aya ad tiři d řwart nnes. Ad tiři i iḥenjiren nnes, s webrid n řwart.

17 Maca mařa iwca zi řwart nnes ict n tarzeft i yijjen zeg imsexxaren nnes, xenni ad tiři nnes ař aseggʷas n třelli. Xenni ad dd-tedweř tesɣart ɣar řḥakem, minzi aqa-tt d řwart nnes, ad tiři i iḥenjiren nnes. ^□  

18 War iɛeddeř i řḥakem ad ikkes ca zi tesɣart n řgens ařami i ɣa ikecceḍ agřa nsen. Netta ad isswart tasɣart i iḥenjiren nnes zeg wagřa nnes, ḥima war ittwazuzzar řgens inu, umi i ɣa ittwaqřeɛ kuř ijj zeg wagřa nnes.”

19 Xenni indeh ayi am dd-ikka x tebridt nni ɣar uɣezdis n řebni n tewwart ař ixxamen iqeddsen n ikehhanen nni tuɣa iwařan ccamal. U xzar, aqa din ijj n wemcan ɣar ḍeffar n tnayen n iɣezdisen nnes, ɣar řɣarb. 20 Netta inna ayi: “Wa d amcan mani i ɣa ssnennan ikehhanen taɣarṣt n tikkest n umarwas d tɣarṣt n ddenb u mani i ɣa ggwen tawhibt n řɣiǧet, ḥima war tt ssuffɣen ca barra ɣar řemraḥ n barra maḥend ad ssqeddsen řgens ammu.” 21 Xenni Netta issuffeɣ ayi barra ɣar řemraḥ n barra uca indeh ayi ɣar arebɛa n tɣemmura n řemraḥ. U xzar, di kuř taɣmart n řemraḥ aqa din ijj n řemraḥ nneɣni, ijj n wemcan ifarzen di řemraḥ di kuř taɣmart n řemraḥ. 22 Di arebɛa n tɣemmura n řemraḥ n zzat tuɣa din ixxamen am řemrahat iseqqfen, s tuzzeggart n arebɛin n iɣaǧen d tiru n třatin n iɣaǧen. Ixxamen deg arebɛa n tɣemmura ɣarsen řeɛbar d ijj. 23 Deg wenneḍ n arebɛa n ixammen nni tuɣa din ict n tseddiyt i d asen-dd innḍen. Aqa ggin řmejmarat sadu i tseddyin i d as dd-innḍen. 24 Netta inna ayi: “Tina d kuzinat mani i ɣa ttsenwen imsexxaren n Taddart taɣarṣt n řgens.”