1 “Xmi i ɣa tebḍam tammurt d řwart s tqedduḥt, ad twehhbem ict n tewhibt n usgeɛɛed i SIDI, ict n tesɣart iqeddsen zi temmurt: tuzzeggart nnes ad tiři xemsa u-ɛicrin-ařef n iɣunam d tiru nnes ɛecra-ařaf n iɣunam. Marra tammurt i d as dd-innḍen ad tiři tqeddes. 2 Xemsa-mya di xemsa-mya n iɣunam ɣar arebɛa iɣezdisen nnes ad zzayes iřin i Zzawect Iqeddsen. Uca deg wenneḍ nnes xemsin n iɣaǧen ad iřin d ddmani n tarewsa. 3 S řeɛbar-a ad teɛbared di tuzzeggart xemsa u-ɛicrin-ařef u di tiru ɛecra-ařaf n iɣunam u Zzawect Iqeddsen ad dayes tiři, Aqdas n Uqeddas. 4 Ad tiři d ict n temmurt iqeddsen. Ad tiři i ikehhanen nni ittsexxaren di Zzawect Iqeddsen, inni dd-iqarrben maḥend ad sexxaren i SIDI. Ad tiři i nitni d amcan n tzeddiɣin nsen d ijj n wemcan iqeddsen i Zzawect Iqeddsen. 5 Ict n temmurt s ict n tuzzeggart n xemsa u-ɛicrin-ařef u s ict n tiru n ɛecra-ařaf n iɣunam n řeɛbar ad tiři i Ilawiyyen nni ittsexxaren di Taddart, ad tiři d řmulk i nitni, s ɛicrin n ixxamen. 6 Ad tewcem ict n temmurt s ict n tiru n xemsa-ařaf u s ict n tuzzeggart n xemsa u-ɛicrin-ařef n iɣunam d tammurt i tendint, zzat i temmurt n tewhibt iqeddsen n usgeɛɛed. Ad tiři i marra taddart n Israil. 7 Tasɣart n temmurt n řḥakem ad tiři ɣar ijj n uɣezdis uřa ɣar uɣezdis nneɣni n temmurt n tewhibt iqeddsen n usgeɛɛed u n tesɣart n temmurt n tendint, zzat i tewhibt iqeddsen n usgeɛɛed u zzat i tesɣart n temmurt n tendint, zeg uɣezdis n řɣarb ɣar řɣarb u zeg uɣezdis n ccarq ɣar ccarq. Tuzzuggart ad tiři nican zzat i uɣezdis n icten zi tseqqař n řwart, zeg weymir i iǧan ɣar řɣarb ař weymir i iǧan ɣar ccarq. 8 Tammurt ad tiři nnes, tasɣart nnes di Israil, u řḥukkam inu war ḥessaren ɛad řgens inu, maca ad wcen tammurt i taddart n Israil, i tqebbař nsen.”

9 “Ammu i iqqar Sidi inu, SIDI: Cfa awem, a řḥukkam! Sbeɛɛed xawem lɛunf u ggem řḥeqq d tsegda uca kksem ibeɛɛaj nwem x řgens inu, ammu i iqqar Sidi inu, SIDI.

10 Ittxeṣṣa ad ɣarwem yiři ijj n řmizan nican, d ijj n ifa nican d ijj n ubatu nican. ^□  ■  

11 Ittxeṣṣa ad yiři řeɛbar n ifa d řeɛbar n ubatu d řeɛbar d ijj, ḥima ad yiři ubatu d ict zi tɛeccart n uḥumir, uca ict n tɛeccart n uḥumir ad teswa ifa. Řeqyas n řeɛbar nsen ad yiři zeg uḥumir. ^□  

12 Aciql ad yiři ɛicrin n ijirat. Ɛecrin n iciqlen, xemsa u-ɛicrin n iciqlen, xemmesṭac n iciqlen, ad awem yiři ijj n mina. ^■  

13 Ta d tewhibt n usgeɛɛed nni i ɣa tessgeɛɛdem: ict n tsittut n ijj n ifa zeg ijj n uḥumir n yirden, uca ad tewcem uřa d ict n tsittut n ijj n uḥumir n imendi.

14 X tewṣeyyet n zzect, tawṣiyyet n řqedd n ubatu n zzect: aqa ict n teɛcart n ubatu n ijj n ukuru, - aqa ijj n ukuru d ijj n uḥumir n ɛecra ibatuten, minzi ɛecra ibatuten d ijj n uḥumir. ^□  

15 Xenni ijj x mitayen n wuǧi, zi ddmani n tarewsa n temmurt n Israil i ifeyyḍen s waman, am tewhibt n řɣiǧet u am tɣarṣt n wecmaḍ u am tewhibt n řehna maḥend ad xasen tefdid, ammu i iqqar Sidi inu, SIDI.

16 Marra řgens n temmurt, marra nitni ad carcen di tewhibt n usgeɛɛed i řḥakem di Israil.

17 X řḥakem maḥend ad yegg tiɣarṣa n wecmaḍ d tewhibt n řɣiǧet d tɣarṣt n useyyeb di řeɛyudat u deg wussan n uyur n jdid u x wussan n ssebt, x marra ussan n řeɛyudat n taddart n Israil. Netta ad issewjed taɣarṣt n ddenb d tewhibt n řɣiǧet d tewhibt n wecmaḍ d tewhibin n řehna maḥend ad ifdi x taddart n Israil.” ^□  

18 “Ammu i iqqar Sidi inu, SIDI: Deg uyur amezwaru, deg wass amezwar n uyur, ad teksid ijj n uyenduz icnan aṭṭas, ameẓyan n ufunas, uca ad zzayes tekksed ddenb zi Zzawect Iqeddsen.

19 Akehhan ad iksi zeg idammen n tɣarṣa n ddenb uca ad ten yegg x řeḍruf n tewwura n Taddart, ɣar arebɛa n tɣemmura n treffidet n uɛalṭar u x řeḍruf n tewwura n řemraḥ n daxeř. 20 Ammu i ɣa tegged deg wass wiss sebɛa n uyur, di ṭṭweɛ n wenni iweddaren deg webrid u di ṭṭweɛ n uqubbani, ammu i ɣa tefdim x Taddart.

21 Deg uyur amezwaru, deg wass wiss arbeɛṭac n uyur, ad yiři Řɛid n Tɣarṣt n Useɛdu i kenniw, ad yiři řɛid řmijař n sebɛa n wussan, ad ccen aɣrum břa antun. ^■   22 Deg wass nni ad issewjed řḥakem ijj n uyenduz am tɣarṣṭ n ddenb i yixef nnes u i marra řgens n temmurt. 23 Di sebɛa n wussan n řɛid ad issewjed ict n tɣarṣt n wecmaḍ i SIDI: sebɛa n iyenduzen d sebɛa n icarriyyen icnan, marra sebɛa n wussan nni, uřa ict n tɣarṣt n ddenb n ijj n iɣayḍ kuř ass. 24 Ad issewjed ɛawed tawhibt n řɣiǧet, ijj n ifa i yijj n uyenduz u ijj n ifa i yijj n icarri u ijj n uhinu n zzect i yijj n ifa. 25 Deg yuyur wiss sebɛa, deg wass wiss xemmesṭac n uyur, ittxeṣṣa as ad yegg ammu marra man aya di řɛid, sebɛa n wussan: am tɣarṣt n ddenb uřa d tɣarṣt n wecmaḍ, am tewhibt n řɣiǧet uřa d zzect.” ^■