Izřan s Igejduren
Izři amezwaru - Anabi iwta agejdur x Urcalim
1
1 Alif. Mammec teqqim diha tendint weḥḥdes! Tuɣa řebda teccur s řɣaci,
tedweř am ict n tajjač,
tuɣa-tt d tameqqrant jar řegnus, iǧis n ujeǧid jar lɛamalat,
tdewřed ɣar tesmuɣi.
2 Bit. Tᵉttru imeṭṭawen imerzagen s ǧiřet,
imeṭṭawen nnes x imeggizen nnes.
War ɣares wi tt ɣa iɛezzan zi marra inni tt ittexsen,
marra imeddukkař nnes ɣdaren-tt,
dewřen as d řɛedyan. ■
3 Gimel. Tettwaḥebbes temmurt n Yahuda zi ssibbet n řeɣben,
u zi ssibbet n řqedd n txemmast nnes iqesḥen.
Tettɣima jar řegnus, war tufi arraḥet,
marra inni tt iḍaffaren ḥarrten xas di řwest n řeḥṣarat nnes.
4 Dalit. Ibriden ɣar Ṣihyun ceḍnen, minzi uřa d ijj war iggur ɛad ɣar řɛid.
Marra tiwwura nnes xřant,
ikehhanen nnes zehharen,
tiɛzariyyin nnes ceḍnent,
uca nettat simant nnes teccur s tarzugi.
5 Hi. Iɣrimen nnes dewřen ḥekkmen xas,
řɛedyan nnes farḥen,
maɣar SIDI issecḍen i-tt,
zi ssibbet n řqedd n řmuɛṣiyyet nnes.
Iḥenjiren nnes imeẓyanen uyuren di tmeḥbast zzat i tiṭṭawin n iɣrimen nsen.
6 Waw. Acewwar n yeǧis n Ṣihyun ingez zzayes,
marra řḥukkam nnes ggin am udaden
inni war ittifen heddu.
Gguren nitni břa jjehd,
zzat i tiṭṭawin n wenni ten iḍaffaren.
7 Zayin. Deg wussan n řeɣben nnes u deg waṭṭas n wetlaɛ nnes
ad teɛqeř Urcalim x marra min dayes iɣřan,
min ɣares tuɣa zic.
Řami iwḍa řgens nnes s ufus n weɣrim,
tuɣa war din wi d as i ɣa iwcen afus.
Iɣrimen nnes ẓrin tt,
stehzan zeg usbeddi n weɛbad di Zzawect Tameqqrant.
8 Xit. Urcalim tuɣa txeṭṭa aṭṭas.
S uyenni tedweř am ict n temɣart deg wussan n weɛzař nnes.
Marra inni tuɣa tt ittweqqaren,
sseḥqarran tt,
minzi ẓrin řeḥya nnes.
Uřa nettat simant nnes tzehhar,
tedweř ɣar ḍeffar. ■
9 Tit. Taxmuji nnes teřṣeq ɣar tmuwwa n ubeḥrur nnes,
aneggaru nnes war dayes txemm.
Aqa tehwa-dd ɣar řaǧaɣ s ijj n webrid isstebhten,
uřa d ijj war tt iɛezzi.
Xzar maca řeɣben inu, a SIDI,
maɣar řeɛdu issmeqqar ixef nnes. ■
10 Yud. Aɣrim isswiẓẓeḍ afus nnes
ɣar marra min dayes iɣřan.
Iwa teẓra nettat mammec udfen řegnus ɣar Zzawect nnes Iqeddsen,
řegnus min xef tumured,
war iɛeddeř ad dd-adfen ɣar wegraw n řgens.
11 Kaf. Qaɛ imezdaɣ nnes zehharen,
arezzun aɣrum.
Nitni wcin řeqcuɛ iɣřan nsen di ṭṭweɛ n macca,
maḥend ad dd-arren řeɛmar nsen.
Xzar, a SIDI, wařa,
mammec dewřeɣ ttwaseḥqareɣ. ■
12 Lamid. Ma war daywem icqi,
kenniw inni iɛeddun x webrid?
Wařam u xzarem,
ma din ca n řeḥriq am řeḥriq i d ayi ittwaggen,
i zi d ayi issxeyyeq SIDI,
deg wass n řḥaduq n weɣḍab nnes.
13 Mim. Zi sennej i zi dd-issekk Netta timessi deg ixsan inu,
tcebbar daysen.
Netta inḍar-dd tracca ɣar iḍaren inu,
yarra ayi ad dewřeɣ ɣar ḍeffar,
aqa yareddeǧ ayi,
issehřec ayi ass am ikmeř.
14 Nun. Ittwacedd uzayřu n iɛediyyen inu s ufus nnes,
aqa ttwamuden, geɛɛden-dd x yiri inu.
Netta yarra jjehd inu ad ifceř.
Iwca ayi SIDI deg ifassen nsen,
necc war zemmareɣ ad beddeɣ ɛad.
15 Samix. Inḍar Sidi inu marra ayt n bu-ṣṣulṭa inu di řwest inu,
ibarreḥ s ijj n wurar ḍidd inu,
maḥend ad yarẓ iḥudriyyen inu,
Sidi inu aqa iɛfes x tsirt n uḍiř,
n teɛzarect, n yeǧis n Yahuda.
16 Ɛayin. S man aya ttruɣ, a tiṭṭ inu, a tiṭṭ inu issazzařen imeṭṭawen,
minzi amesfewwej nni izemmaren ad dd-yarr řeɛmar inu,
iggʷej xafi.
Ttwateḥḥan iḥenjiren inu,
minzi řeɛdu ijhed xasen.■
Anɛam n yeǧis n Ṣihyun
17 Pi. Tesswiẓẓeḍ Ṣihyun ifassen nnes,
maca nettat war ɣares wi tt ɣa issfewwjen.
Yumur SIDI x Yaɛqub,
aqa iɣrimen nnes ad as dd-nnḍen.
Urcalim tedweř jar asen am ict n temɣart deg wussan n weɛzař nnes.
18 Tsadi. SIDI d amsegged,
maɣar necc tuɣa ɣewwɣeɣ x řumurat nnes.
Sřem xenni, marra řegnus,
xzarem ɣar řehřiq inu.
Tiɛzariyyin inu d iḥudriyyen inu uyuren di tmeḥbast.□
19 Quf. Necc řaɣiɣ x yenni d ayi ittexsen,
maca nitni cemten ayi.
Ikehhanen inu d imɣaren inu ḍeřqen i buḥbeř di tendint,
umi tuɣa arezzun macca i yixef nsen,
ḥima ad ssmeḥḍen řeɛmar nsen. ■
20 Rix. Xzar, a SIDI, maɣar necc di řeḥṣaret,
takrict inu tenneḥweř,
uř inu inneqřeb-dd zi daxeř inu,
maɣar tuɣa ɣewwɣeɣ aṭṭas.
Di barra i d ayi yucar ssif iḥenjiren inu,
daxeř aqa-tt am řmewt. ■
21 Cin. Sřin mammec zehhareɣ,
maca necc war ɣari uřa d ijj n umesfewwej.
Marra řɛedyan inu sřin x arẓiyyet inu.
Farḥen aqa Cek i tt iggin.
Xmi dd ɣa tessiwḍed ass i zi dd-tɛeřmed,
xenni ad iřin amecnaw mammec ǧiɣ necc.
22 Taw. Ejj ad dd-yas marra řɣar nsen zzatek,
egg zzaysen am mammec zzayi teggid
zi ssibbet n marra iɛeddiyen inu,
minzi izehharen inu d aṭṭas,
uř inu yuḥeř aṭṭas.