Izři wiss tnayen - Awař n unabi x weɣḍab n Arebbi
2
1 Alif. Mammec idřa Sidi inu tayeǧit Ṣihyun s iseynuten ibarcanen? Aqa aɛuǧi n Israil inḍar i-t
ɣar temmurt zeg ujenna,
Netta war ixarreṣ di tnebdat n iḍaren nnes,
deg wass n weɣḍab nnes.
2 Bit. Iqḍa Sidi inu x marra tizeddaɣ n Yaɛqub,
war tent tejji ad nejment.
Deg uduqqez n ufugem nnes
ihdem lqelɛat n yeǧis n Yahuda,
ibeqqeḍ i-tent x temmurt,
issɛarra tageldit d řḥukkam nnes.
3 Gimel. Di řḥaduq n weɣḍab nnes iqess qaɛ icc n Israil.
Yarra afusi nnes ɣar ḍeffar qbeř ma ad dd-yas řeɛdu,
u Netta yarɣa ḍidd i Yaɛqub am tmessi itteḥduduqen,
tᵉttett marra min i d as dd-innḍen.
4 Dalit. Netta imḥeḍ řqews nnes am řeɛdu,
issgeɛɛed afusi nnes am řeɛdu,
wenni iwtin marra min temmeẓri tiṭṭ.
Deg Uqiḍun n tyeǧit Ṣihyun ifarreɣ asɛar nnes am tmessi.
5 Hi. Sidi inu idweř am řeɛdu,
iṣarḍ Israil,
iṣarḍ marra řeqṣur nnes,
ihdem lbarajat nnes,
u yarni ɛad deg wecḍan d iɣuyyan ɣar yeǧis n Yahuda.
6 Waw. Netta iqřeɛ s lɛunf aɛiccu nnes,
am ijj n weḥwic.
Yareyyeb amcan n umsagar.
Issettu SIDI di Ṣihyun
ass n řɛid d ass n ssebt,
u deg wesxeḍ nnes inḍar ajeǧid d ukehhan.
7 Zayin. Idweř Sidi inu icarreh aɛalṭar nnes,
inḍar Zzawect Iqeddsen nnes,
iwca řeḥyuḍ n yexxamen n řeqṣar
deg ufus n řeɛdu.
Nitni ggin ad sřen i tmijja nsen di Taddart n SIDI,
am deg ijj n wass n řɛid.
8 Xit. SIDI ixarreṣ ad ihdem řḥiḍ n tyeǧit Ṣihyun,
isarreḥ xas fiřu n řeɛbar,
war dd-ijbid ɣares afus nnes zeg uṣarḍ.
Ijja acbar n zzat d řḥiḍ ad ceḍnen,
aqa ttwaɣeḍřen ɣar temmurt.
9 Tit. Tiwwura nnes ɣarqent deg ucař,
iɛumad nnes n ubelleɛ yareddeǧ i-ten, yarẓa i-ten.
Ajeǧid nnes d řḥukkam nnes aqa aten jar řegnus,
war din bu useřmed n Ccariɛa,
inabiyyen nnes war ttifen ca tameẓriwt n SIDI.
10 Yud. Imɣaren n tyeǧit Ṣihyun
qqimen x temmurt, bekmen,
zuzzaran ucař x uzeǧif nsen,
beysen ixef nsen s txuncay n wecḍan.
Tiɛzariyyin n Urcalim ssaḍarent azeǧif nsent ɣar temmurt.
11 Kaf. Tiṭṭawin inu uhřent zeg imeṭṭawen,
takrict inu tᵉttenhezza,
tᵉttwazeǧeɛ tsa inu x temmurt,
x treẓẓit n yeǧis, n řgens inu,
minzi aḥenjir d useymi ttɣacan x wazzayen n tendint.
12 Lamid. Nitni qqaren i yemmatsen:
“Mani iǧa ɛad imendi d binu?”,
xmi weṭṭan x ibriden n tendint am yenni ittwanɣen,
xmi ttwakksen zi tudart nsen x ifadden n yemmatsen.
13 Mim. Min xam i ɣa iniɣ,
min ɣar cem i ɣa ssemquddiɣ,
a tayeǧit Urcalim? Min ɣar cem i ɣa ssemquddiɣ,
ařami cem i ɣa ssfewwjeɣ,
a cem taɛzarect, tayeǧit Ṣihyun,
maɣar tareẓẓit nnem d tameqqrant am řebḥar,
wi izemmaren ad cem issgenfa?
14 Nun. Inabiyyen nnem ẓrin timeẓriwin ixarriqen d ibuḥařiyyen,
war ssɛarran ca x řmuɛṣiyyet nnem
ařami i ɣa ssenqeřben tameḥbast nnem.
Di ṭṭweɛ nnem ẓrin nitni mɣir řeḥkamat ixarriqen d tḥuja n uɣarri.
15 Samix. Marra inni xam dd-ittekken ccaten deg ifassen s unexřiɛ zi ssibbet nnem.
Nitni ttṣeffaren u ssenhezzan azeǧif nsen x tyeǧit Urcalim,
qqaren: ‘Ma d ta d tandint nni umi nnan:
“Ma war iǧi aẓri nnes ikmeř,
d řɛunṣar n řefraḥet i marra ddunect!”?
16 Pi Marra řɛedyan nnem arezmen-dd ɣarwem iqemmumen nsen,
ttṣeffaren u ttɣezzan tiɣmas,
qqaren: “Neccin nṣarḍ i-tt.
Wa d ass i tuɣa nettraja,
řexxu nufa i-t, nettwařa i-t!”
17 Ɛayin. Igga SIDI min ixarreṣ,
ikemmeř awař nnes
wenni yumur zi mecḥař uya.
Ihdem i cem, war xam iḥiweř.
Řeɛdu ijja i-t ifarḥ zzayem,
issgeɛɛed icc n iɣrimen nnem.
18 Tsadi. Uř nsen isɣuyy ɣar Sidi inu,
“A řḥiḍ n tyeǧit Ṣihyun,
ejj ad azzřen imeṭṭawen nnem am teɣzart,
ass d ǧiřet břa ma ad neqṣen,
war ttejji mummu n tiṭṭawin nnem ad ibedd!” ■
19 Quf. Kkar, sɣuyy di ǧiřet,
ɣar umezwaru n tɛessast n ǧiřet,
zeǧeɛ uř nnem am waman
zzat i wudem n Sidi inu.
Sgeɛɛed ɣares ifassen nnem i tudart n iḥenjiren nnem imeẓyanin,
inni iwḍan ɣar temmurt s řaẓ,
ɣar tɣemmar n marra ibriden.
Tandint n Urcalim tessawař x řeḥṣaret nnes
20 Rix. Xzar, a SIDI, wařa mliḥ umi teggid man aya?
Ma ittxeṣṣa xenni ad ccent temɣarin řɣiǧet n uɛeddis nsent,
iḥenjiren nsent i di tthillant nitenti?
Ma ittxeṣṣa ad ittwaneɣ unabi d ukehhan di Zzawect Iqeddsen n SIDI? ■
21 Cin. Iḥudriyyen d iwessura buzzřen x temmurt deg ibriden.
Tiɛzariyyin inu d iḥudriyyen inu wḍan s ssif.
Tenɣid ten deg wass n weɣḍab nnek,
tɣarṣeḍ asen, war xasen tḥiwřed ca.
22 Taw. Tɛarrned-dd ɣari min issaggʷaden zi marra iɣezdisen,
am deg ijj n wass n řɛid.
War injim u war ittɣimi uřa d ijj
deg wass n weɣḍab n SIDI.
Inni i di thilliɣ u arebbiɣ
iqḍa i-ten řeɛdu inu.