Izři wiss třata - Aweddeb d ufewwej n unabi
3
1 Alif. Necc d aryaz nni iẓrin řeɣben s weɛmud n uduqqez n weɣḍab nnes.
2 Alif. Netta indeh ayi uca ijja ayi ad uyureɣ di taǧest,
war iǧi di tfawt.
3 Alif. S tidett, Netta yarra řebda afus nnes ḍidd inu,
ass ikmeř.
4 Bit. Netta iḍeyyeɛ aysum inu d teřmect inu,
yarẓa ixsan inu.
5 Bit. Ibna u iquwwar ayi,
s arrhaj d tamara.
6 Bit. Di ṭṭřam ijja ayi zeddɣeɣ,
am imettan n waṭṭas zeg wami.
7 Gimel. Netta ibelleɛ ayi jar řeḥyuḍ,
war zemmareɣ ad nejmeɣ.
Issedqeř xafi ssnaseř inu n nnḥas.
8 Gimel. Ɛad meřmi ttřaɣiɣ u sɣuyyuɣ,
Netta iqqim ibkem ɣar tẓaǧit inu.
9 Gimel. S tṣuḍar injaren ibelleɛ xafi abrid,
issfarɣ imesraq inu.
10 Dalit. Tuɣa Netta i necc am ddub ittḥaman,
am wayrad deg imucan innufaren.
11 Dalit. Netta yuẓẓeř xafi zeg webrid, imezzeq ayi,
war d ayi ijji ca.
12 Dalit. Netta issemḥeḍ řqews nnes
uca ijja ayi ad iřiɣ d awaḍ i fřitca nnes.
13 Hi. Fřitcat zeg weqrab nnes
ijja i-tent ad adfent di tiẓẓař inu.
14 Hi. Dewřeɣ d taseḍhact i marra řgens inu,
d izři nsen n uzawar ass imun.
15 Hi. Netta issjjiwen ayi s tarzugi,
issessu ayi s cciḥ.
16 Waw. Tiɣmas inu ijja i-tent zeɛɛfent deg uqayas ařami arẓint,
isseɣḍes ayi deg yiɣɣed.
17 Waw. Cek tessiggʷejed řeɛmar inu x řehna,
necc ttuɣ tcuni.
18 Waw. Necc nniɣ: “Jjehd inu iqḍa,
uřa d asitem inu di SIDI.”
19 Zayin. Ɛqeř x řeɣben inu d tmeḥbast inu,
x cciḥ d arrhaj.
20 Zayin. Řeɛmar inu ittxarreṣ nican di man aya,
aqa icḍen dayi.
21 Zayin. Aya xseɣ ad t arreɣ ɣar wuř,
s uyenni ssitimeɣ ɛad.
22 Xit. S tmegga n tmexsiwt icewwaren n SIDI,
aqa war nettwahellek ca,
minzi arreḥmet nnes ɛemmarṣ war tbedd.■
23 Xit. Aqa-tt d jdid kuř ṣṣbeḥ,
řaman nnek d ameqqran. ■
24 Xit. Tasɣart inu d SIDI, ammu i iqqar řeɛmar inu,
s uyenni ttɣimiɣ ssitimeɣ dayes. ■
25 Tit. Iṣbeḥ SIDI i yenni dayes issitimen,
i řeɛmar nni xas yarezzun.
26 Tit. Aqa mliḥ araji s usitem ɣar zzat,
di řhudnet ɣar usenjem zi SIDI.
27 Tit. Mliḥ i weryaz ad yarbu azayřu di temẓi nnes.
28 Yud. Ejj i-t ad iqqim ḥafi, ad isseɣd,
maɣar SIDI igga i-tt xas.
29 Yud. Ejj i-t ad igg aqemmum nnes di tɛejjajt,
ad yini: “Ad taɣ iǧa řayas!” ■
30 Yud. Ejj i-t ad iwc ameggiz i wenni t iccaten,
ejj i-t ad ittwasjjiwen s useḥqar.
31 Kaf. Minzi Sidi inu war ineṭṭar ḥed i řebda,
32 Kaf. maca mařa Netta issecḍen ḥed,
ad xas iḥinn ɛawed,
ɛlaḥsab řemɣaret n tmexsiwt nnes icuwwaren,
33 Kaf. maɣar Netta war iḥeṣṣar niɣ issecḍin tarwa n bnadem s wuř.
34 Lamid. Xmi i ɣa řebzen
marra imeḥbas n temmurt sadu iḍaren,
35 Lamid. xmi i ɣa ḥarrfen tasɣart n weryaz
zzat i wudem n Umɛuǧi x kuřci,
36 Lamid. xmi i ɣa qeřben ddeɛwet n bnadem,
ma zeɛma Sidi inu war ittwiři man aya?
37 Mim. Man wen i iqqaren ca n řḥajjet uca xenni temsar,
mařa war tt yumur Sidi inu?■
38 Mim. Ma war dd-ittis zeg uqemmum n Umɛuǧi x kuřci
marra min war iḥřin uřa d marra min iṣebḥen? ■
39 Mim. Mammec ittcetca xenni bnadem iddaren ɛad?
Ejj maca aryaz ad icetca zi ssibbet n ddnub nnes.
40 Nun. Ejj aneɣ ad nexzar ibriden nneɣ, ad daysen narzu,
u ejj aneɣ ad dd-nedweř ɣar SIDI.
41 Nun. Ejj aneɣ ad nessgeɛɛed ak-d ifassen nneɣ uřa d wuřawen nneɣ,
ɣar Arebbi deg ujenna.
42 Nun. Neccin nɛedda u nɣewweɣ,
cek war teɣfared ca i uya.
43 Samix. Cek třeḥḥfed aneɣ deg weɣḍab u teḍfareḍ aneɣ,
tenɣid, war xaneɣ tḥiwřed ca.
44 Samix. Třeḥḥfed ixef nnek deg useynu,
maḥend ad taf taẓaǧit war tzemmar ad teɛdu.
45 Samix. Cek tarrid-dd aneɣ d taxmuji d wefraḍ
di řwest n řegnus.
46 Pi. Marra řɛedyan nneɣ
arzmen-dd ɣarneɣ aqemmum nsen.
47 Pi. Tiggʷuda d texceft dewřent d azyen zzayneɣ,
axarreb d arẓiyyet.
48 Pi. Zi tiṭṭawin inu ttazzřent imeṭṭawen,
x tareẓẓit n yeǧis n řgens inu.
49 Ɛayin. Tiṭṭ inu teqqim tᵉttazzeř s imeṭṭawen,
war tᵉttareyyiḥ, war tessbeddi,
50 Ɛayin. ař d i ɣa issijj SIDI zeg ujenna, uca ad ittwařa aya.
51 Ɛayin. Tiṭṭ inu tᵉttegg ayi řeḥriq di řeɛmar inu,
zi ssibbet n marra yessis n tendint inu.
52 Tsadi. Areddfen ayi-dd řɛedyan inu s min ɣarsen,
am ijj n wejḍiḍ, břa ssibbet.
53 Tsadi. Nitni ssbekmen tudart inu deg wanu,
uca nḍaren aẓru xafi.
54 Tsadi. Aman ḥemřen-dd x uzeǧif inu,
nniɣ: “Aqa war qqimeɣ ǧiɣ!”
55 Quf. A SIDI, necc řaɣiɣ x Yisem nnek,
zi řaǧaɣ n wanu.
56 Quf. Cek tesřid i tmijja inu,
war tteqqen amezzuɣ nnek zzat i uzehhar inu,
zzat i iɣuyyan inu!
57 Quf. Cek tusid-dd ɣari deg wass i d ac dd-řaɣiɣ,
tennid: “War tteggʷed ca!”
58 Rix. Cek, a SIDI, tarefɛed ddɛawi x řeɛmar inu,
Cek tfekked tudart inu.
59 Rix. A SIDI, teẓrid ddeǧ i dayi iggin,
aɣ ayi tasɣart inu.
60 Rix. Cek teẓrid marra axřaf nsen,
marra min nwan ḍidd inu.
61 Cin. Cek tesřid řḥegra nsen, a SIDI,
marra min nwan ḍidd inu,
62 Cin. awařen nni dd-itteffɣen zi jar iyencicen n yinni xafi iɣewwɣen,
uřa d řemwayař nsen n uxarreṣ xafi ass imun.
63 Cin. Xzar ɣar uɣimi d ubeddi nsen,
necc d izři nsen n ustehzi.
64 Taw. A SIDI, xeǧeṣ i-ten,
ɛlaḥsab timegga n ifassen nsen.
65 Taw. Sdaɣreř uřawen nsen,
ejj nneɛřet nnek ad dd-xasen tewḍa.
66 Taw. Ḍfar i-ten deg weɣḍab nnek,
qḍa xasen zi sadu ujenna n SIDI.