Izři wiss arebɛa - Řmuɛṣiyyet n yeǧis n Urcalim
4
1 Alif. Mammec igga ibbarcen wureɣ ammu, mammec ibeddeř wureɣ iɣřan qaɛ ammu!
Mammec ttwabezzɛen iẓra n Zzawect Iqeddsen
x tɣemmura n ibriden!
2 Bit. Iḥenjiren iɣřan n Ṣihyun ttwaḥesben am wureɣ iqquren.
Mammec d asen tteggen am iɣarrafen n třaxt,
am řxedmet n bu-třaxt!
3 Gimel. Ɛad tuccanin n řexřa i dd-issuffɣen tibbicin,
ssuṭṭuḍent imeẓyanen nsent,
maca yeǧis n řgens inu tedweř tewɛar,
am nnɛamat di řexřa.
4 Dalit. Iřes n weḥḍiḍ iřṣeq ɣar waneɣ nnes s ufadi,
iḥenjiren imeẓyanen tᵉttaren aɣrum,
maca uřa d ijjen war d asen t yebḍi.
5 Hi. Inni tuɣa ittetten zic macca iředden,
ɣacan deg ibriden,
inni ittwaseymen zic x uzeggʷaɣ yuẓɣen,
ḥennḍen řexxu di řeɣbar.
6 Waw. Řmuɛṣiyyet n yeǧis n řgens inu d tameqqrant
x ddnub n tendint n Sadum,
tenni inqeřben deg ijj n umur,
břa ttsaxur n ifassen.
7 Zayin. Ineɣraf nnes ittwaḥuzen tuɣa ṣfan x wedfeř,
d icemřařen x uɣi,
arrimat nsen zewɣen x řmarjan,
addud nsen yareqq am ṣaffir aziza.
8 Xit. Řexxu ibeddeř waddud nsen, idweř d abarcan x taǧest,
war ttwaɛqiřen deg ibriden.
Tiřmect nsen teřṣeq x yexsan nsen,
tuẓeɣ, tedweř am ukeccuḍ.
9 Tit. Iḥřa inni ittwanɣen s ssif,
x yenni ittwanɣen s řaẓ,
maɣar nitni ad fesyen am yenni ittwasnuqqben,
s wenqas n ṣṣabet n yeyyar.
10 Yud. Ifassen n temɣarin nni tuɣa ittḥinnan qbeř,
ssnennan i iḥenjiren nsen.
Nitni dewřen asent d macca,
zi ssibbet n treẓẓit n yeǧis n řgens inu.
11 Kaf. SIDI yarxu i wesɛar nnes,
issfarreɣ řḥaduq n weɣḍab nnes.
Netta issarɣ timessi di Ṣihyun,
timessi tenni iccin dsusa nnes.
12 Lamid. Ɛemmarṣ war tᵉttɣiř i ijeǧiden n temmurt d imezdaɣ n ddunect,
aqa aɣrim d řeɛdu ad dd-adfen ɣar tewwura n Urcalim.
13 Mim. D man aya di ssibbet n ddnub n inabiyyen nnes,
u di ssibbet n řmuɛṣiyyet n ikehhanen nnes,
inni issizzřen idammen n imseggaden di řwest nnes.
14 Nun. Tettliɛen am idarɣařen deg ibriden,
mesřen s idammen,
ařami war izemmar uřa d ijjen ad iḥada arruḍ nsen.
15 Samix. “Aggʷejem, aqa-t ixmej!”,
ttřaɣan xasen:
“Aggʷejem, aggʷejem, war t ttḥadam!”
Uca xenni arewřen, qqimen weddaren.
Ittwanna jar řegnus:
“Nitni war zemmaren ad qqimen din ɛad ktar!”
16 Pi. Aɣembub n SIDI yareyyec i-ten,
War iqqim ad daysen ixzar ɛad.
Tuɣa war ɣarsen aweqqar i ikehhanen,
iwessura war d asen ssecnen aḥinni.
17 Ɛayin. Řebda ttefciřent tiṭṭawin nneɣ, umi xzarent ɣar twiza.
Tuɣa-t baṭeř!
Ɣar marra uraji nneɣ nettraja ijj n řgens
i war izemmaren ad issenjem. ■
18 Tsadi. Nitni ḥṣaren aneɣ,
ařami war neqqim nzemmar ad nuyur x wazzayen nneɣ.
Qeṭṭu nneɣ tuɣa yiweḍ-dd,
ussan nneɣ qḍan,
wah, qeṭṭu nneɣ yusa-dd.
19 Quf. Inni d aneɣ iḍeffaren
tuɣa fsusen x igidaren deg ujenna.
Nitni uẓẓřen xaneɣ x idurar,
ggin aneɣ taxceft di řexřa.
20 Rix. Nnefs n wenzaren nneɣ, lmasiḥ n SIDI,
ittwaḥebbes di txecfin nsen,
wenni x nenna:
“Ad neddar jar řegnus di tiři nnes!”
21 Cin. Sřiwřew u farḥ, a tayeǧit n Idum,
tenni izeddɣen di temmurt n Ɛuṣ!
Maca uřa d cem ad ɣarem dd-yas řkas,
cem ad zzayes tesscared,
u ad tᵉttwaɛarrid.
22 Taw. Ɣar řmuɛṣiyyet nnem ad yiři uneggar, a tayeǧit Ṣihyun!
Netta war i cem ittḥewwis ɛad.
Maca Netta ad zzayem ixeǧeṣ řmuɛṣiyyet nnem, a tayeǧit Idum!
Netta ad iɛarra x ddnub nnem.