Izři wiss xemsa - Taẓaǧit i usenjem
5
1 Ɛqeř, a SIDI, x min i d aneɣ imsaren, xzar-dd u wařa řḥegra nneɣ.
2 Tewḍa tesɣart n řwart nneɣ i ibarraniyyen,
uřa d tudrin nneɣ ruḥent tt ɣar midden.
3 Neccin nedweř d iyujiřen břa babatneɣ,
tiyemmatin nneɣ dewřent am tijjař.
4 Aman nneɣ nsess i-ten s ttmenyat,
akeccuḍ nneɣ nettxeǧaṣ xas.
5 Ḍeffaren aneɣ x yiri nneɣ,
neccin nemmut s řweḥřan,
maca war d aneɣ jjin arraḥet.
6 Aqa nsarreḥ afus ɣar Miṣra, uřa ɣar Accur,
maḥend ad nejjiwen aɣrum.
7 Ibabaten nneɣ xḍan,
war ǧin ɛad.
U neccin narebbu řmuɛṣiyyet nsen.
8 Imsexxaren ddebbaran xaneɣ,
uřa d ijj war d aneɣ issenfekki zeg ifassen nsen.
9 Neccin nsebbeř tudart nneɣ maḥend ad dd-nawi aɣrum nneɣ,
zi ssibbet n ssif di řexřa.
10 Tiřmect nneɣ tᵉtteḥduduq am tefqunt,
zi řḥaduq n tmessi n řaẓ.
11 Ssxargen timɣarin di Ṣihyun,
uřa d tiɛzariyyin di tneddam n Yahuda.
12 Řḥukkam ttwayuyřen s ifassen nsen,
udmawen n iwessura ittwakkes asen řɛezz.
13 Iḥudriyyen arebbun iẓra n tsirt,
u iḥramen ttneqraḍen sadu řeḥmeř n ukeccuḍ.
14 Imɣaren ssbedden aɣimi di tewwura n tendint,
iḥudriyyen ssbedden zeg uzenzun nsen x ifiřan.
15 Tweddar řefraḥet n wuř nneɣ,
ccḍiḥ nneɣ s nnubtat idweř d acḍan.
16 Tewḍa aneɣ tajj x uzeǧif nneɣ.
Uct xaneɣ, maɣar neccin nexḍa.
17 S uyenni yuheř wuř nneɣ,
s uyenni bbarecnent tiṭṭawin nneɣ,
18 zi ssibbet n wedrar n Ṣihyun nni ittwaxarrben,
mani ttawyen ttarran iceɛbawen.
19 Cek, a SIDI, ad teqqimed i řebda,
řkursi igellden nnek aqa-t zi jjiř ař jjiř.
20 Mayemmi texsed Cek ad aneɣ tᵉttud i řebda?
Mayemmi i dayneɣ tsemḥed qaɛ anect uya n wussan?
21 A SIDI, arr aneɣ-dd ɣarek, ḥima ad ɣarek dd-nedweř.
Arr aneɣ-dd ussan nneɣ n jdid am zic.
22 Maɣar ma s tidett tenḍared aneɣ kuřci?
Ma teffugmed xaneɣ ammu qaɛ?