1 Awarni aya yiwi ayi ɛawed ɣar wadaf n Taddart, u xzar, zi sadu tanebdat n Taddart tteffɣen waman ɣar ccarq, minzi aɣezdis n zzat n Taddart tuɣa-t ɣar ccarq, u tuɣa ttazzřen hekkwan aman zi swadday n uɣezdis azeřmaḍ n Taddart, ɣar uɣezdis n ljanub n uɛalṭar. 2 Issuffeɣ ayi-dd zeg ukulwar n řebni n tewwart n ccamal uca indeh ayi ɣar tebridt nni ɣar barra, jjihet n tewwart n barra, ɣar ukulwar nni ixezzaren ɣar ccarq, u xzar, aman ttazzřen zi teɣmart n zzat afusi.

3 Umi dd-iffeɣ Weryaz ɣar ccarq, tuɣa ɣares afiřu n řeɛbar deg ufus nnes uca iɛbar ařef n iɣaǧen. Isseẓwa ayi x waman uca aman iwḍen ař ticeɛbin. 4 Iɛbar ɛawed ařef n iɣaǧen uca isseẓwa ayi x waman uca aman iwḍen ař ifadden. Ɛawed iɛbar ařef n iɣaǧen uca isseẓwa ayi ɛad ktar uca aman iwḍen ař tijɛinnatin. 5 Iɛbar twařat nneɣni ařef n iɣaǧen uca aman dewřen d ijj n yeɣzar war zmireɣ ad t ẓwiɣ x iḍaren, maɣar aman geɛɛden ařami tuɣa ittxeṣṣa ad iɛumm bnadem, aqa-t d ijj n yeɣzar i war izemmar ḥed ad t iẓwa x iḍaren.

6 Netta inna ayi: “Ma teẓrid tt, a mmis n bnadem?” Xenni indeh ayi uca yarra ayi ɣar tma n yeɣzar. 7 Umi dd-dewřeɣ necc, xzar, beddent din aṭṭas n tcejjura x tma n yeɣzar, am ɣar tma aya am ɣar tma nni. ^■   8 Xenni inna ayi: “Aman-a ttazzřen ɣar jjihet n ccarq uca hekkwan ɣar Řewḍa uca ttakkwaḍen ɣar Řebḥar Immuten. Xenni ttazřen di Řebḥar uca ttwasggenfan aman ɛawed. 9 Ad imsar belli kuř řeɛmar i din ittenhezzan ad iddar, mani ma i dd ɣa yaweḍ yeɣzar ijehden nni. Ad din iřin iseřman aṭṭas, minzi aman-a ttazzřen dinni, uca ad ttwassgenfan waman n Řebḥar. Mani ma i dd ɣa yas yeɣzar-a, ad din tiři tudart.

10 Ad imsar belli ad iřin iyemmaren n iseřman zi Ɛayn-Jadyi ař Ɛayn-Ɛiglayim. Ad din iřin imucan i ujeffaf n traccawin. Asřem nsen ad yiři ɛlaḥsab marka nnes, amecnaw asřem n Řebḥar Ameqqran, aṭṭas s waṭṭas,

11 maca tindat nnes d iyeřmamen nnes war ttwaggenfan, ad qqimen meǧḥen.

12 Ɣar yeɣzar, x tma nnes, x tma aya u x tma nni, ad iřin ɛřam kuř ticejjura, maḥend ad zzaysent ccen, tinni umi tafart nsent war tᵉttisřaw u řɣiǧet nsent war t qeṭṭi ca. Kuř ayur ad wcent řɣiǧet d ṭṭri, maɣar aman n yeɣzar ffɣen-dd zi Zzawect Iqeddsen. Řɣiǧet nsent ad tiři i macca d tafart nsent i ugenfu.” ^■  

13 “Ammu i iqqar Sidi inu, SIDI: Wa ad yiři d aymir i x i ɣa tewcim tammurt d řwart i tenɛac n tqebbař n Israil. Yusuf ad iksi tnayen n tseqqar.

14 Kenniw ad tt twartem, ijj amecnaw wenneɣni, i uya ssgeɛɛdeɣ afus inu uca jjuǧeɣ ad tt wceɣ i řejdud nwem. Tammurt-a ad tiři d tasɣart nwem. ^■  

15 Wa ad yiři d aymir n temmurt: ɣar uɣezdis n ccamal, zi Řebḥar Ameqqran x webrid ɣar Hitlun ař dd-tusid ɣar Ṣadad,

16 xenni Ḥamat, Bayruta, Sibrayim nni yeǧa jar weymir n temmurt n Dimacq d weymir n temmurt n Ḥamat, xenni ɣar Ḥaṣr-Hatixun nni yeǧa ɣar weymir n Ḥawran.

17 Zi Řebḥar ad dd-iffeɣ weymir ɣar Ḥasr-Ɛaynun, x uɣezdis n weymir n Dimacq uca xenni ɣar ccamal, ɣar ccamal u x uɣezdis n weymir n Ḥamat. Wa ad yiři d aɣezdis n ccamal.

18 Aɣezdis n ccarq ittekk zi jar Ḥawran d Dimacq u zi jar Jilɛad d temmurt n Israil x L'Urdun. Kenniw ad t tɛebbarem zeg weymir ař řebḥar n ccarq. Wa ad yiři d aɣezdis n ccarq.

19 Aɣezdis n ljanub, aqa-t ɣar ljanub zi Tamar ař aman n Maribut-Qadac, uca ittekk x Teɣzurt n Teɣzart n Miṣra ař Řebḥar Ameqqran. Wa ad yiři d aɣezdis n ljanub ɣar ljanub.

20 Aɣezdis n řɣarb d Řebḥar Ameqqran, zeg weymir nni iǧan ɣar ljanub ɣares ař arendad n webrid ɣar Ḥamat, wa ad yiři d aɣezdis n lɣarb.

21 Ad tebḍam tammurt-a jar awem ɛlaḥsab tiqebbař n Israil. 22 Kenniw ad tt jjen d řwart i kenniw u i ibarraniyyen di řwest nwem, inni urwen iḥenjiren di řwest nwem. Nitni ad awem iřin am yenni dd-ittwaxeřqen di temmurt jar ayt n Israil. Ad asen tiři tasɣart akidwem di řwest n tqebbař n Israil. 23 Ɣar teqbič i ɣar i ɣa izdeɣ am ubarrani, din ad as tewcem tasɣart nnes! Ammu i ɣa tiři, iqqar Sidi inu, SIDI.”