Ixxamen n ikehhanen di Zzawect Tameqqrant n jdid
42
1 Netta issuffeɣ ayi-dd barra ɣar řemraḥ n barra nni iǧan ɣar ccamal. Netta indeh ayi ɣar řebni n ixxamen nni iǧan ɣar ccamal, zzat i řemraḥ ittwaɛezřen u ɣar uɣezdis n řebni, 2 ɣar uɣezdis nnes d azirar n mya n iɣaǧen, ɣar wadaf n ccamal. Tiru nnes tuɣa-tt xemsin n iɣaǧen. 3 Tuɣa řebni zzat i ttasiɛ n ɛicrin n iɣaǧen n řemraḥ n daxeř u qibač i zzellij n řemraḥ n barra. Ijj n řfuqi ak-d ixxamen tuɣa isenned x řfuqi nneɣni, uca aqa din třata n řfuqit. 4 Zzat n ixxamen tuɣa din ijj n ukulwar ad ayes tuyured, s ict n tiru n ɛecra n iɣaǧen, ɣar uɣezdis n řebni n ixammen ɣar daxeř, ict n tebridt n mya n iɣaǧen. Tiwwura n wadaf nsen tuɣa atent ɣar ccamal. 5 Ixxamen n sennej tuɣa aten ḥṣaren, maɣar řefwaqi kksen ktar ttasiɛ zzaysen x yexxamen n wadday u x yexxamen ɣar řwest n řuɛřa n řebni. 6 Minzi tuɣa aten di třata n řfuqit, maca war ɣarsen ipilaren am ipilaren n řemraḥat. S uya tuɣa aten ḥsaren ktar x yenni n wadday d yenni di řwest am ɣarsen txezzared zi temmurt.
7 Řḥiḍ nni iɛdu barra qibač i yexxamen, ɣar uɣezdis nni iǧan ɣar řemraḥ n barra zzat i yexxamen, tuɣa ɣares tuzzeggart n xemsin n iɣaǧen. 8 Minzi tuzzeggart n marra ixxamen nni iǧan ɣar řemraḥ n barra, tuɣa-tt di xemsin n iɣaǧen. Maca xzar, ɣar uɣezdis n Zzawect Tameqqrant tuɣa-tt di mya n iɣaǧen. 9 Swadday n ixxamen-a teggur tebridt manis dd-gguren zi ccarq ḥima ad ɣarsen tuyured zi řemraḥ n barra.
10 Ɣar řḥiḍ d azirar n řemraḥ nni iǧan ɣar ljanub, zzat i řemraḥ ittwaɛezřen u ɣar uɣezdis n řebni, tuɣa din ɛawed ixxamen,
11 uca tabridt dd-ittekken zzatsen tuɣa amecnaw tenni n ixxamen nni iǧan ɣar uɣezdis n ccamal, anect n tuzzeggart anect n tiru, u marra uffuɣen nnes tuɣa aten amecnaw ṣṣenɛat d wadafen nnes ɣar uɣezdis n řebni ɣar ccamal.
12 Am mammec tuɣa din adafen ɣar texxamin ɣar uɣezdis n ljanub, amenni i din iǧa uřa d ijj n wadaf ɣar beddu n tebridt, tabridt nni itteffɣen ɣar jjihet n ccarq zi zzat i řḥid issaren, mani i ɣa tadfed.
13 Xenni inna ayi: “Ixxamen nni iǧan ɣar ccamal u ixxamen nni iǧan ɣar ljanub, inni iǧan ɣar zzat n řemraḥ ittwaɛezřen, aqa aten d ixxamen iqeddsen mani ikehhanen, inni i ɣa dd-iqarrben ɣar SIDI, ad ccen tiwhibin iqeddsen aṭṭas. Din ittxeṣṣa ad sarsen tiwhibin iqeddsen aṭṭas: tawhibt n řɣiǧet d tewhibt n ddenb d tewhibt n umarwas, minzi amcan iqeddes qaɛ.
14 Xmi i ɣa udfen ikehhanen, war iɛeddeř ad uyuren zi Zzawect Iqeddsen ɣar řemraḥ n barra. Ad ssarsen arruḍ nsen n tsexxart, maɣar wanita d amqeddes. Ad arḍen arruḍ nneɣni uca xenni ad dd-qarrben ɣar řemraḥ nni iǧan i řgens.”
Zzawect Tameqqrant n jdid - Tammurt Iqeddsen
15 Umi ikemmeř Netta řeɛbar n min iǧan daxeř n Taddart, issuffuɣ ayi-dd zeg webrid n tewwart nni ixezzaren ɣar ccarq uca iksi řeɛbar zzayes deg wenneḍ n řebni n Zzawect Tameqqrant marra.
16 Iɛbar aɣezdis n ccarq s uɣanim n řeɛbar: xemsa-mya n iɣunam s uɣanim n řeɛbar deg wenneḍ.
17 Iɛbar aɣezdis n ccamal, xemsa-mya n iɣunam s uɣanim n řeɛbar deg wenneḍ.
18 Iɛbar aɣezdis n ljanub, xemsa-mya n iɣunam s uɣanim n řeɛbar.
19 Inuqqar ɣar uɣezdis n lɣarb uca iɛbar xemsa-mya n iɣunam s uɣanim n řeɛbar. 20 Netta iɛbar řebni n Zzawect Tameqqrant ɣar arebɛa n tɣemmura nnes. Tuɣa ɣares deg wenneḍ nnes ijj n řḥiḍ s ict n tuzzeggart n xemsa-mya n iɣaǧen d ict n tiru n xemsa-mya n iɣaǧen maḥend ad ifarz jar min iǧan iqeddsen d min war iǧin iqeddsen.