1 Xenni indeh ayi ɣar tewwart, ɣar tewwart nni ixezzaren ɣar ccarq. 2 Xzar, yusa-dd uɛuǧi n AREBBI n Israil zi jjihet n ccarq uca tmijja nnes tuɣa-tt am řhess n waman aṭṭas, uca tammurt tceɛceɛ s uɛuǧi nnes. 3 Udem n tmeẓriwt nni ẓriɣ tuɣa amecnaw tameẓriwt i ẓriɣ umi dd-usiɣ ḥima ad areddǧeɣ tandint. Aqa d timeẓriwin am tmeẓriwt i ẓriɣ ɣar yeɣzar n Xabur, uca wḍiɣ s wudem inu ɣar temmurt. ^■   4 Aɛuǧi n SIDI yudef ɣar Taddart s tewwart nni ixezzaren ɣar ccarq. 5 Xenni issgeɛɛed ayi-dd Arruḥ uca issidef ayi ɣar řemraḥ n daxeř, uca xzar, aɛuǧi n SIDI iccur Taddart 6 uca sřiɣ ict n tmijja tessawař akidi zi daxeř n Taddart uca Aryaz ibedd ɣar uɣezdis inu. 7 Netta inna ayi: “A mmis n bnadem, wa d amcan n řɛarc inu u amcan n třeqqa n iḍaren inu, mani i ɣa zedɣeɣ di řwest n ayt n Israil i řebda. Uca nitni, taddart n Israil, nitni uřa d ijeǧiden nsen, war ssxemmajen ɛad Isem inu iqeddsen s farq-ccɣeř nsen u s řxecbat n ijeǧiden nsen x řegɛudi nsen mani ttqeddamen tiwhibin nsen, ^■   8 am ggin tanebdat nsen zzat i tnebdat inu, d ṭṭarf n tewwart nsen ɣar ṭṭarf n tewwart inu, iqqim mɣir ijj n weɣbar jar ayi-dd d nitni. Ammu i ssexmejen Isem inu iqeddsen s jjɛayef nsen nni ggin, ařami cciɣ ten deg weɣḍab inu. 9 Nitni ad xafi ssiggʷejen farq-ccɣeř nsen d řxecbat n ijeǧiden nsen, uca Necc ad zedɣeɣ di řwest nsen i řebda.

10 Cek, a mmis n bnadem, barreḥ s Taddart-a i taddart n Israil ḥima ad sseḍḥan zi ssibbet n řmuɛṣiyyat nsen uca ejj i-ten ad ɛbaren ccakl nnes.

11 Mařa sseḍḥan zi marra min ggin, sscen asen xenni ccekl n Taddart d tisars nnes, uffuɣen nnes d adafen nnes d marra ccekl nnes d marra lfarayiḍ nnes, wah marra ickalen nnes d marra tiweṣṣa nnes, uca ari marra man aya zzat i tiṭṭawin nsen, ḥima xenni ad ḥdan marra ccekl nnes d marra lfarayiḍ nnes uca ad zzaysen ggen.”

12 “Ta d ccariɛa n Taddart: x tqiccat n wedrar ad yiři wemcan nnes deg wenneḍ nnes iqeddsen qaɛ. Ta d ccariɛa n Taddart.

13 Ina d řeɛburat n uɛalṭar s iɣaǧen: ijj n uɣiř d ijj n cbar n ufus. Tarya nnes d ijj n uɣiř u tiru nnes d ijj n uɣiř. Tma nnes ɣar ṭṭarf nnes i d as dd-innḍen aqa d ijj n cbar. Wa d dsas n uɛalṭar. ^□  

14 Zi tarya x temmurt ař tareffidet n wadday n uɛalṭar: tnayen n iɣaǧen, u tiru nnes: ijj n uɣiř, u zi treffidet n wadday n uɛalṭar ař tareffidet n sennej n uɛalṭar: arebɛa n iɣaǧen u tiru nnes ijj n uɣiř.

15 Afurnu n uɛalṭar, ‘adrar n Arebbi’, igga arebɛa n iɣaǧen u zeg ufurnu n uɛalṭar, ‘adrar n weyrad n Arebbi’, geɛɛden-dd zzayes arebɛa n waccawen sennej nnes.

16 Afurnu n uɛalṭar ɣares ict n tuzzeggart n tenɛac n iɣaǧen d ict n tiru n tenɛac n iɣaǧen, ijj n ukwadrun s arebɛa n iɣezdisen nnes.

17 Tareffidet nnes sennej ɣares ict n tuzzeggart n arbeɛṭac n iɣaǧen d ict n tiru n arbeɛṭac n iɣaǧen ɣar arebɛa n iɣezdisen nnes, u tma nnes i d as dd-innḍen aqa d azyen n uɣiř, uca tarya nnes ijj n uɣiř deg wenneḍ nnes u tareffidin n ddruj nnes xezzaren ɣar ccarq.”

18 Netta inna ayi: “A mmis n bnadem, ammu i iqqar Sidi inu, SIDI: ‘Tina d lfarayiḍ inu i uɛalṭar deg wass i di t ɣa ggen maḥend ad xas ssgeɛɛden taɣarṣt n tmessi u maḥend ad xas zeǧɛen idammen.’

19 Ammu i iqqar Sidi inu, SIDI: ‘Ad tewced ijj n uyenduz, ameẓyan n ufunas, d tawhibt n tɣarṣt n ddenb i ikehhanen zeg Ilawiyyen, i yenni dd-iqqarṣen zi Ṣaduq, inni ɣari dd-iqarrben maḥend ad ayi sexxaren. 20 Ad teksid zeg idammen nnes uca ad ten tegged ɣar arebɛa n waccawen u ɣar arebɛa n tɣemmura n treffidet u x tma nnes i d as dd-innḍen ɣar ṭṭarf nnes. Ittxeṣṣa ad zzayes tekksed ddenb nnes u ad t tefdid. 21 Awarni as ad teksid ayenduz n tɣarṣt n ddenb uca nitni ad t sscemḍen deg wemcan ittwaggen n Taddart barra i Zzawect Iqeddsen. 22 Deg wass wiss tnayen ad dd-tessqarrbed ijj n iɣayḍ d taɣarṣt n ddenb. Ad zzayes kksen ddenb zeg uɛalṭar am mammec zzayes kksen ddenb s uyenduz. 23 Xmi i ɣa tkemmřed takessit n ddenb, ad dd-tessqarrbed ijj n uyenduz, ameẓyan n ufunas icnan qaɛ, uřa d ijj n icarri icnan qaɛ zeg wuǧi. 24 Ad ten dd-tessqarbed zzat i wudem n SIDI uca ikehhanen ad xas ssuyusen tameǧaḥt u ad ten ssgeɛɛden am tɣarṣt n wecmaḍ i SIDI. 25 Sebɛa n wussan ad tesswejded di kuř ass ijj n wemyan d taɣarṣt n ddenb. Ad sswejden ɛawed ijj n uyenduz, ameẓyan n ufunas, uřa d ijj n icarri n wuǧi, ittxeṣṣa ad iřin cnan aṭṭas. 26 Sebɛa n wussan ad fdin x uɛalṭar uca ad t ssizedgen u ad t ssqeddsen. 27 Mařa kemmřen nitni ussan-a, xenni ad yiři deg wass wiss tmenya, belli ikehhanen ad sswejden tɣarṣa nwem n wecmaḍ d tewhibin nwem n uqadi x uɛalṭar u Necc ad xawem arḍiɣ!’, ammu i iqqar Sidi inu, SIDI.”