1 Netta yiwi ayi ɣar Wexxam n Zzawect Tameqqrant uca iɛbar řeḍruf n řḥiḍ: setta n iɣaǧen ɣar uɣezdis-a u setta n iɣaǧen ɣar uɣezdis nneɣni, x tiru n Uqiḍun. 2 Tiru n wadaf tuɣa-tt ɛecra n iɣaǧen uca udmawen n řeḥyuḍ ɣar uɣezdis n wadaf tuɣa aten xemsa n iɣaǧen ɣar uɣezdis-a u xemsa n iɣaǧen ɣar uɣezdis nneɣni. Iɛbar tuzzeggart nnes: arebɛin n iɣaǧen, uca tiru nnes: ɛicrin n iɣaǧen. 3 Yudef-dd ɣar daxeř uca iɛbar řḥiḍ nni ɣar ṭṭarf n wadaf n Wexxam n Daxeř: tnayen n iɣaǧen, uca tewwart tuɣa-tt setta n iɣaǧen uca tiru n wadaf sebɛa n iɣaǧen. 4 Iɛbar tuzzeggart n Wexxam n Daxeř: ɛicrin n iɣaǧen, uca tiru nnes: ɛicrin n iɣaǧen ɣar zzat n Wexxam n Zzawect Tameqqrant uca inna ayi: “Wa d Aqdas n Uqeddes!”

5 Iɛbar řḥiḍ n Taddart: setta n iɣaǧen, uca tiru n kuř axxam n uɣezdis tuɣa-t di arebɛa n iɣaǧen deg wenneḍ n Taddart marra. 6 tixxamin n uɣezdis tuɣa atent taxxamt zzat i texxamt nneɣni, třata di řuɛřa uca amenni třatin n twařawin, uca tixxamin nni iwḍent ař řḥiḍ n Taddart nni din iǧan i texxamin i d as dd-innḍen, maḥend ad iqeddem asenned i tḥenya n texxamin. War iɛeddeř ad awḍent tḥenya ař daxeř di řḥiḍ n Taddart. 7 Ɣar sennej deg wenneḍ immarni di ttasiɛ nni iǧan ɣar ixxamen n uɣezdis x kuř řfuqi. Maɣar x kuř řfuqi n taddart inneḍ-dd ijj n ukulwar i Taddart marra. S uyenni tedweř Taddart dayes ttasiɛ ktar sennej u ammu i izemmar bnadem ad dd-igeɛɛed zeg wadday ɣar řfuqi sennej s řfuqi n řwest.

8 Ẓriɣ ict n řgeɛɛdet i d as dd-innḍen i Taddart marra, aqa-tt d dsusa n ixxamen n uɣezdis: ijj n uɣanim n řeɛbar ikemmřen, setta n iɣaǧen ař mani munen dsusa. 9 Tiru n řḥiḍ nni igga aɣezdis n barra n řebni ak-d ixxamen n uɣezdis, tuɣa-tt xemsa n iɣaǧen, uca ttasiɛ yarezmen i iqqimen ɣar Taddart ak-d ixxamen n uɣezdis, aqa yusa-dd ak-d Taddart.

10 Tuɣa din ijj n ttasiɛ n ɛicrin n iɣaǧen deg wenneḍ n Taddart marra.

11 Teffeɣ tewwart n řebni n ixxamen n uɣezdis ɣar ttasiɛ yarezmen i iqqimen, ict n tewwart teffeɣ ɣar ccamal uca tawwart nneɣni teffeɣ ɣar ljanub. Tiru n ttasiɛ iqqimen tuɣa-tt di xemsa n iɣaǧen deg wenneḍ nnes marra.

12 Řebni ɣar wudem n řemraḥ ittwaɛezřen ɣar řɣarb tuɣa ɣares ict n tiru n sebɛin n iɣaǧen uca řḥiḍ n řebni tuɣa-t xemsa n iɣaǧen deg wenneḍ nnes marra uca tuzzeggart nnes tuɣa-tt di tesɛin n iɣaǧen.

13 Netta iɛbar tuzzeggart n Taddart: mya n iɣaǧen. Řemraḥ ittwaɛezřen u řebni i dayes iǧan ak-d řeḥyuḍ aqa ɣarsen tuzzeggart d ict: mya n iɣaǧen.

14 Tiru n wudem n Taddart d řemraḥ ittwaɛezřen ɣar uɣɛezdis n ccarq tuɣa-tt mya n iɣaǧen.

15 Iɛbar uřa d tuzzeggart n řebni nni tuɣa zi zzat n řemraḥ ittwaɛezřen qaɛ ař ḍeffar. Ikulwaren nnes ɣar uɣezdis-a u ɣar uɣezdis nneɣni tuɣa aten di mya n uɣiř. Daxeř n Zzawect Tameqqrant, d isqifen ɣar řemraḥ n zzat,

16 d tnebdatin, d řekwazi iḥṣaren, d řebniyyat s ikulwaren i d as dd-innḍen, i třata n ṛefwaqi nsent, tuɣa aten marra ttwasduřyen s ukeccud zzat i tnebdatin n tewwura, zi temmurt ař řekwazi, uca řekwazi simant nsen tuɣa ttwasduřyen.

17 Ař sennej i tewwart, am ɣar wudem n daxeř uřa ɣar udem n barra n Taddart, u x marra řḥiḍ ɣar daxeř u ɣar barra tuɣa din tiřwiḥin n ukeccuḍ.

18 Tuɣa tteggen xasen ikiruben d tcejjura n tini. Aqa din ict n tcejjart n tini jar ijj n ukirub d ijj n ukirub nneɣni, uca kuř akirub ɣares tnayen n wudmawen, ^□  

19 udem n bnadem nni ixezzaren ɣar tcejjart n tini ɣar ijj n uɣezdis d wudem n wayrad ameẓyan ixezzaren ɣar tcejjart n tini ɣar uɣezdis nneɣni. Ammu i ten ggin deg wenneḍ n marra Taddart. 20 Zi temmurt ař sennej n tewwart ttwaggen ikiruben d tcejjura n tini uca ɛawed x řeḥyuḍ n Zzawect Tameqqrant. 21 Řeḍruf ɣar uɣezdis n tewwart n Zzawect Tameqqrant ggin ijj n ukwadrun uca ccuf n Weqdas n Uqeddas iḍhar-dd amecnaw ccuf n Zzawect.

22 Aɛalṭar tuɣa-t n ukeccuḍ, u řuɛřa nnes tuɣa-t třata n iɣaǧen, u řebni sadu nnes tnayen n iɣaǧen. Ɣares tiɣemmura, uca řebni sadu nnes d iɣezdisen nnes tuɣa-t zeg ukeccuḍ. Netta issiweř akidi: “Ta d ṭṭabřa nni iǧan zzat i wudem n SIDI.” 23 Zzawect Tameqqrant d Weqdas n Uqeddas i dayes iǧan ɣarsen tnayen n tewwura. 24 Tuɣa ɣar tiwwura ɣar kuř icten zzaysent tnayen n teřwiḥin am wafriwen, tnayen n teřwiḥin nni zemmaren ad nuqqaren, tnayen i yict n tewwart u tnayen i tewwart nneɣni. 25 Di tewwura n Zzawect Tameqqrant ttwaggen ikiruben d tcejjura n tini nni ittwaggen amecnaw inni x řeḥyuḍ. Tuɣa din tasqift n ukeccuḍ ɣar barra ɣar wudem n wesqif. 26 Tuɣa din řekwazi ḥsaren d tcejjura n tini ɣar uɣezdis-a u ɣar uɣezdis nneɣni, ɣar tnayen n iɣezdisen n wesqif, ɣar ixxamen ɣar uɣezdis n Taddart u ɣar tesqifin.